ကန်ထရိုက်လယ်ယာစနစ်ခွင့်ပြုထားသည့်မြေနေရာများကို စက်မှုဇုန်ပြောင်းမည်

ရန်ကုန်တိုင်းဒေသကြီး ဒဂုံမြို့သစ် (တောင်ပိုင်း) တွင်ကန်ထရိုက်လယ်ယာစနစ်ခွင့်ပြုထားပြီးဖြစ်သည့် ဧကထောင်ချီရှိမြေနေရာများကို စက်မှုဇုန်အဖြစ်ပြောင်းမည်ဖြစ်ကြောင်း ယနေ့ (ဇန်နဝါရီလ ၂၂ ရက်) ကျင်းပသည့် ပြည်သူ့လွှတ်တော်၌ ရန်ကုန်တိုင်းဒေသကြီးအစိုးရအဖွဲ့ ကိုယ်စား ဆောက်လုပ်ရေးဝန်ကြီးဌာန ဒုတိယဝန်ကြီး ဦးကျော်လင်းက ဖြေကြားခဲ့သည်။

“ဒဂုံမြို့သစ် တောင်ပိုင်းမှာ ဧက ထောင်နဲ့ချီပြီးတော့ ကန်ထရိုက် Firming (စက်မှုလယ်ယာ ကန်ထရိုက်) တွေခွင့်ပြုထားတာရှိပါတယ်။ အဲဒါတွေကလည်း လက်တွေ့အောင်မြင်တဲ့ လယ်ယာဇုန် တွေမဟုတ်ဘူးဆိုပြီးတော့ ဒါတွေကို စက်မှုဇုန်ပြောင်းဖို့ စီစဉ်ဆောင်ရွက်လျက်ရှိပါတယ်။ ကန်ထရိုက် Firming တွေကို စက်မှုဇုန်ပြောင်းဖို့ ရန်ကုန်တိုင်းဒေသကြီးအစိုးရ အဖွဲ့က လက်ရှိမှာ ကြိုးစားဆောင် ရွက်လျက်ရှိပါတယ်”ဟု ဒုတိယဝန်ကြီးကပြောသည်။

ရန်ကုန်တိုင်းဒေသကြီး ဒဂုံမြို့သစ် (တောင်ပိုင်း) မြို့နယ်အတွင်း ၁၉၉ဝ ပြည့်နှစ် ဒဂုံမြို့သစ်တည်ဆောက်ရေးစီမံကိန်နှင့်ဆက်စပ်၍ ဒဂုံ တောင်စက်မှုဇုန် အမှတ်(၁) အကြီးစားနှင့် အလတ်စားစက်မှုမြေကွက်များ၊ ဒဂုံတောင်စက်မှုဇုန် အမှတ်(၂) အသေးစားစက်မှုမြေကွက်များကို ဆောက်လုပ်ရေးဝန်ကြီးဌာန မြို့ရွာနှင့်အိုးအိမ် ဖွံ့ဖြိုးရေးဦးစီးဌာနက ဖော်ထုတ်ခဲ့ပြီး စက်မှုလုပ်ငန်းလုပ်ကိုင်နေသူ လုပ်ငန်းရှင်များကို တစ်ဧကလျှင် သိန်း ၉ဝ နှုန်းဖြင့် စတင်ရောင်းချပေးခဲ့ကြောင်း သိရသည်။

ဒဂုံတောင် စက်မှုဇုန် အမှတ် (၃)ကို မူလက စီးပွားရေးဇုန် အမည်ဖြင့် စက်မှုလက်မှုဆိုင်ခန်းများ နေရာချထားပေးခဲ့ပြီး စက်မှုလုပ်ငန်းများတိုးချဲ့လုပ်ကိုင် လာကြသဖြင့် စက်မှုမြေကွက်များလိုအပ်၍ ၂ဝဝ၆ ခုနှစ်တွင် ဒဂုံတောင် စက်မှုဇုန် တိုးချဲ့စက်မှုဇုန် မြေတိုင်းရပ်ကွက် အမှတ် ၁၄၄၊ ကျန်စစ်သားစက်မှုဇုန် နှင့် ရိုးမရိပ် သာစက်မှုဇုန် ၊ ဒဂုံအရှေ့စက်မှုဇုန် တိုးချဲ့ အသံ၊ အနံ့ အသေးစားမြေကွက်များကို ထပ်မံတိုးချဲ့ဖော်ထုတ်ရောင်းချပေးခဲ့ကြောင်း သိရသည်။

အဆိုပါ စက်မှုဇုန် အမှတ် ၁၊ ၂၊ ၃ တွင် စက်ရုံအလုပ်ရုံ၊ လုပ်ငန်းငယ်၊ ဆိုင်ခန်း စုစုပေါင်း ၂ဝဝဝ ခန့်ရှိကြောင်း သိရသည်။

Credit:  Pyi Myanmar