မုံရွာမြို့တွင် ရေရှည်ရင်းနှီးမြှုပ်နှံလိုသူများက အိမ်ခြံမြေများကို လာရောက်ဝယ်ယူမှုကြောင့် အိမ်ခြံမြေဈေးကွက်သွက်နေ

စစ်ကိုင်းတိုင်းဒေသကြီး မုံရွာခရိုင် မုံရွာမြို့တွင် ရေရှည်ရင်းနှီးမြှုပ်နှံလိုသူများက အိမ်ခြံမြေများကို လာရောက်ဝယ်ယူနေမှုကြောင့် အိမ်ခြံမြေကွက်များ ပိုမိုရောင်းအားနေကြောင်း မြို့ခံအိမ်ခြံမြေအရောင်းအဝယ် ပြုလုပ်သူများ၏ ပြောကြားချက်အရ သိရသည်။

အိမ်ခြံမြေကွက်များ ပိုမိုရောင်းအားနေရခြင်းသည် ရေရှည်ရင်းနှီးမြှုပ်နှံလိုသူများက ၎င်းတို့ မူလအလုပ်ကိုစွန့်ပယ်ပြီး အဆောင်တည်ဆောက်ခြင်း၊ လက်ဖက်ရည်ဆိုင်၊ စားသောက်ဆိုင်များ ဖွင့်လှစ်ရန်အတွက် ဖြစ်နိုင်ခြေများတာဖြစ်နိုင်ကြောင်း အဆောင်တည်ဆောက်မှု၊ လက်ဖက်ရည်ဆိုင်နှင့် စားသောက်ဆိုင် ဖွင့်လှစ်သူများလည်း ပိုမိုများပြားလာကြောင်း မုံရွာမြို့ အိမ်ခြံမြေအကျိုးတော်ဆောင် ကိုအောင်သူက ပြောကြားသည်။

“ပုံမှန် ကျွန်တော်တို့ ဖြစ်တာကတော့ တစ်ပွဲလောက် အရောင်းအဝယ်လုပ်ရတယ်။ အချို့ရက်တွေမှာဆိုရင်တော့ နှစ်ပွဲလောက် အရောင်းအဝယ်လုပ်ရတယ်။ စီးပွားရေး တက်လာသလားဆိုတော့ အခြားလုပ်ငန်းတွေဖြစ်တဲ့ ကုန်သည်ပွဲစားတွေက အခြားပြဿနာလေးတွေရှိလို့လား မသိဘူး။ အဆောင်တို့ လက်ဖက်ရည်တို့၊ စားသောက်ဆိုင်တို့ဘက်ကို ဦးစားပေးလာသလားဆိုတာတော့ မသိဘူး။ စားသောက်ဆိုင် လုပ်ချင်တဲ့သူတွေ လက်ဖက်ရည်ဆိုင် လုပ်ချင်တဲ့သူတွေ အဆောင်ဖွင့်ချင်တဲ့သူတွေကတော့ ပိုပေါတယ်။ ရေရှည်ရင်းနှီးမြှုပ်နှံသူတွေက အိမ်ခြံမြေကွက်တွေကို လာရောက်ဝယ်ယူတာများပါတယ်” ဟု မုံရွာမြို့အိမ်ခြံမြေ အကျိုးတော်ဆောင် ကိုအောင်သူက ဆက်လက်ပြောကြားသည်။

မုံရွာမြို့၏ အိမ်ရှင်အိမ်ငှားဈေးကွက်၏ ဈေးနှုန်းသည် ကျပ်ငွေတစ်သိန်းကနေ ကျပ်ငွေသိန်းနှစ်ဆယ်အထိ ဈေးပေါက်နေကြောင်း ကုမ္ပဏီများကလည်း ငှားရမ်းမှုများ လည်းရှိနေသေးကြောင်း ယင်းကဲ့သို့ ငှားရမ်းမှုမှာ ရပ်ကွက်နှင့် လမ်းမပေါ်မူတည်ကာ အိမ် ရှင်အိမ်ငှားမှုသည် ဈေးနှုန်းကွာဟချက်များစွာရှိကြောင်း မုံရွာမြို့အိမ်ခြံမြေအကျိုးတော်ဆောင် ကိုဖိုးခွားက ဆိုသည်။

“မုံရွာမြို့မှာ အိမ်ရှင်နှင့် အိမ်ငှားဈေးကွက်ကတော့ အနည်းဆုံးကတော့ ကျပ်ငွေတစ်သိန်းကနေ တစ်သိန်းခွဲအထိရှိတယ်။ အချို့လုပ်ငန်းရှင်တွေဆိုရင် မြေယာအကျယ်ကြီးတွေကို ငှားကြတယ်။ အဲလိုမြေယာအကျယ်ကြီးတွေ ငှားကြတဲ့နေရာမှာ ဈေးနှုန်းကတော့ တစ်ဆယ့်ငါးသိန်းကနေ သိန်းနှစ်ဆယ်အထိရှိတယ်။ ဈေးနှုန်းကတော့ အစားစား ရှိပါတယ်။ လမ်းမတွေပေါ်မူတည်ပြီးတော့ အိမ်ငှားဈေးကွက်ကလည်း ကွာခြားသွားတယ်။ အိမ်ရှင်နဲ့ အိမ်ငှားဖြစ်နေတဲ့ နေရာတွေကတော့ မြို့သစ်ရပ်ကွက်နဲ့ ဗိုလ်ချုပ်လမ်းမကြီးတွေပေါ်မှာ ငှားရမ်းရတာ များပါတယ်” ဟုကိုဖိုးခွားက ပြောကြားသည်။

မုံရွာမြို့တွင် ရေရှည်ရင်းနှီးမြှုပ်နှံလိုသူများက အိမ်ခြံမြေများကို လာရောက်ဝယ်ယူနေကြသည့်အထဲတွင် ကျေးလက်တောရွာနေသူအချို့၊ စစ်ကိုင်းတိုင်းဒေသကြီး အထက်ပိုင်းဒေသများတွင် နေထိုင်သူအချို့အပါအဝင် အရာတော်၊ ယင်းမာပင် စသည့်မြို့နယ်များကလည်း မြေကွက်ဝယ်ယူမှုများလည်းရှိကြောင်း မုံရွာမြို့၏ အိမ်ခြံမြေဈေးနှုန်းမှာလည်း ရပ်ကွက်၊ လမ်းများပေါ်မူတည်ကာ ငွေကြေးကွာခြားများလည်း ရှိကြောင်း သိရသည်။

Credit:  Eleven Media Group