One Direction မှ ဟယ်ရီစတိုင်က လော့စ်အိန်ဂျလိနေအိမ်ကို ဒေါ်လာ ၅ သိန်းဈေးလျှော့ကာ ဈေးကွက်ပြန်တင်

ကမ္ဘာကျော် boy band ဖြစ်သော One Direction မှ အဆိုတော် ၊ ဗြိတိသျှ ပေါ့ပ်ကြယ်ပွင့် ဟယ်ရီစတိုင်သည် အမေရိကန်ပြည်၊ လော့စ်အိန်ဂျလိရှိ နေအိမ်ကို ဒေါ်လာ ၅ သိန်းဈေးလျှော့ကာ ဈေးကွက်ပြန်တင်လာသည်။

ဟယ်ရီစတိုင်က အဆိုပါနေအိမ်ကို ပြီးခဲ့သော မေလအတွင်း ပထမဆုံးအရောင်းဈေးကွက်တင်ခဲ့ခြင်း ဖြစ်သော်လည်း ရောင်းမထွက်ခဲ့ချေ။

လော့စ်အိန်ဂျလိမြို့၊ အနောက်မြောက်ပိုင်း Sunset Strip အရပ်တွင် တည်ရှိပြီး ယခုခေါ်ဈေးမှာ ကန်ဒေါ်လာ ၇ ဒသမ ၄၉ သန်းဖြစ်ကြောင်း အရောင်းမှတ်တမ်းများတွင် ဖော်ပြသည်။

နေအိမ်အကျယ်အဝန်း စတုရန်းပေ ၄၄၀၁ ရှိပြီး အိပ်ခန်း ၄ ခန်း ပါဝင်သည်။

နေအိမ်အတွင်း အိမ်တွင်းရုပ်ရှင်ရုံ၊ အားကစားလေ့ကျင့်ခန်းမ၊ ရေကူးကန်၊ ရေပူကန်တို့ ပါဝင်ပြီး ကြီးမားသည့် ပြတင်းပေါက်များ၊ လသာဆောင်များမှတဆင့် Sunset Strip နှင့် လော့စ်အိန်ဂျလိ၏ မြင်ကွင်းကို စီးမိုးတွေ့မြင်နိုင်သည့် မြင်ကွင်းရှိသည်။

ခေါ်ဈေးလျှော့ချလိုက်သည့်နည်းတူ ဈေးကွက်တင်သည့် ကုမ္ပဏီလည်း ပြောင်းလဲသွားပြီး Westside Estate Agency ကုမ္ပဏီမှ အိမ်ခြံမြေအကျိုးဆောင် ကာ့ထ် ရာပါပေါ့ထ်က ဈေးကွက်တင်ပေးခဲ့ခြင်းဖြစ်သည်။

အသက် ၂၄ နှစ်ရှိပြီဖြစ်သော ဟယ်ရီစတိုင်သည် အဆိုပါနေအိမ်ကို ၂၀၁၆ ခုနှစ်အတွင်း ကန်ဒေါ်လာ ၆ ဒသမ ၈၇ သန်းဖြင့် ဝယ်ယူခဲ့ခြင်းဖြစ်သည်။

မေလအတွင်း ဈေးကွက်တင်ခဲ့စဉ်က ခေါ်ဈေးမှာ ကန်ဒေါ်လာ ၈ ဒသမ ၄၉ သန်းဖြစ်၏။ ဟယ်ရီစတိုင် ပိုင်ဆိုင်ထားစဉ်ကာလအတွင်း ခေတ်ပြိုင်ဟန် မွမ်းမံမှုအချို့ ပြုလုပ်ခဲ့ရာ မီးဖိုဆောင်ကြမ်းခင်း၊ ဘားခန်းနှင့် ဧည့်ခန်းနေရာများတွင်ဖြစ်ပြီး မီဒီယာခန်းမကို အနက်ရောင်ဆေးသုတ်ခြင်းလည်း ပါဝင်သည်။

ဟယ်ရီစတိုင်သည် ၂၀၁၆ ခုနှစ်အတွင်း နယူးယောက်မြို့၊ မန်ဟက်တန်၊ ထရိုင်ဘက္ကာအရပ်ရှိ အကျော်အမော်တို့အခြေချရာ 443 Greenwich အဆောက်အအုံကြီးရှိ အိပ်ခန်း ၃ ခန်းပါ လူနေခန်းကို ကန်ဒေါ်လာ ၈ ဒသမ ၇ သန်း သုံးစွဲကာ ဝယ်ယူထားခဲ့သေးသည်။

 

Credit: iMyanmarHouse.com (iMyanmarHouse.com Team မှ ရေးသား ဖော်ပြသည်။)