နိုင်ငံခြားသားများ မိုးကုတ်ဒေသသို့ လည်ပတ်ခွင့်ရပြီ

မန္တလေးတိုင်းဒေသကြီး မိုးကုတ်ဒေသသို့ နိုင်ငံခြားသားခရီးသွားများလည်ပတ်ခွင့်ကို လုံခြုံရေးအရ တားမြစ်ထားရာမှ စက်တင်ဘာ ၁၀ ရက်မှ စတင်ပြီး ခွင့်ပြုချက်ရယူကာ လည်ပတ်သွားလာနိုင်ရန် ညွှန်ကြားစာထွက်လာပြီဖြစ်ကြောင်း တိုင်းဒေသကြီး သယံဇာတနှင့် သဘာဝပတ်ဝန်းကျင်ထိန်းသိမ်းရေး ဝန်ကြီးဌာနမှ သိရသည်။

မိုးကုတ်ဒေသလည်ပတ်ခွင့်အတွက် တင်ပြခဲ့ခြင်းကြောင့် သြဂုတ်လနောက်ဆုံးအပတ်က ပြည်ထောင်စုမှ သဘောတူခွင့်ပြုခဲ့၍ တိုင်းဒေသကြီးအစိုးရအဖွဲ့နှင့်သက်ဆိုင်ရာဌာနများသို့ စက်တင်ဘာ ၁၀ ရက်က ညွှန်ကြားချက်ထုတ်ပြန်ပေးခဲ့သည်။

''ညွှန်ကြားချက်ထွက်လာပြီ။ လည်ပတ်ခွင့်ပဲရမယ်။Conference တွေ လုပ်ခွင့်မရှိ။ဖြေလျှော့ပေးတာက ပထမဆုံး Pilot Project ဖြစ်တယ်။ခရီးသွားတွေမှာ Tour Guide ပါရမယ်။လမ်းကြောင်းက မန္တလး-သပိတ်ကျင်း -မိုးကုတ် လမ်းပိုင်းပဲခွင့်ပြုပြီး စက်ဘီး၊ဆိုင်ကယ်၊သုံးဘီး၊ခြေလျင် သွားခွင့်မပြုဘူး။ကားနဲ့ ဒါမှမဟုတ် အငှားကားနဲ့ပေါ့။ ခရီးသွားကုမ္ပဏီဘက်က လိုင်စင်သက်တမ်းရှိရမယ်။ခရီးသွားဧည့်သည်ကို အာမခံပေးရမယ်”ဟု ဟိုတယ်နှင့် ခရီးသွား(မန္တလေး)မှ လက်ထောက်ညွှန်ကြားရေးမှူး ဦးစန်းယုက ပြောသည်။

ယင်းသို့ခွင့်ပြုရာတွင် မန္တလေး-ပြင်ဦးလွင်-မိုးကုတ်လမ်းပိုင်းမှ သွားလာခွင့်ပြုမည်မဟုတ်ဘဲ မိုးကုတ်မြို့သည် ရတနာထွက်ရှိရာဖြစ်၍ ဒေသခံများ၏ မိုးကုတ် ကျောက်အရောင်းအဝယ်တိုးတက်လာရန်နှင့် လေ့လာနိုင်ရန် ဖြစ်ရာ လုံခြုံရေးလက်လှမ်းမီသည့် နေရာထိ ခွင့်ပြုမည်ဖြစ်ကြောင်း သိရသည်။

“ဟိုတယ်ခရီးနဲ့ ညှိနှိုင်းပြီး လာခွင့်ပြုတဲ့သဘောပါ။ စက်တင်ဘာ ၁၀ရက်နေ့ စာနဲ့ဝင်တယ်။ နိုင်ငံခြားသားဝင် ထွက်မှုက တရုတ်လူမျိုးတွေက ဝင်ရောက်မှုများလာတယ်။ ပိတ်ထားတာကတော့ တစ်နှစ်ခွဲလောက် ရှိပြီလို့ခန့်မှန်းရတယ်။ အခုအစိုးရလက်ထက်မှာမှ ပိတ်တာပါ”ဟု မိုးကုတ်မြို့နယ် အထွေထွေအုပ်ချုပ်ရေး ဦးစီးဌာန ဦးကံထူးက ပြောသည်။

မိုးကုတ်ကျောက်မျက်များရောင်းဝယ်သည့် ထာပွဲတွင် နိုင်ငံခြားသားများဝင်ရောက်လာမှုကြောင့် အရောင်း အဝယ်ပိုကောင်းလာနိုင်ရန်၊ဗဟုသုတလေ့လာနိုင်ရန် အတွက် ခွင့်ပြုလိုက်ခြင်းဖြစ်နိုင်ကြောင်း၊ခွင့်ပြုရာတွင်လည်း မြို့တွင်းနေရာများတွင် သွားလာခွင့်ပြုမည်ဖြစ်ကြောင်း၊ယင်းသို့ဝင်ရောက်ခွင့်အတွက် ဟိုတယ်ခရီးတွင် လျှောက်ထားရမည်ဖြစ်ပြီး သက်ဆိုင်ရာတိုင်းဒေသကြီး ဝန်ကြီးဌာနက ခွင့်ပြုချက်ပေးမည်ဖြစ်ကြောင်း သိရသည်။

“ဒီဘက်ခေတ်မှာ ပိတ်လိုက်ပြီး လုံခြုံရေးအရ ဘာမှကိုပေးမလာဘူး။ သူငယ်ချင်းတစ်ယောက်ဆီမှာ မိုးကုတ် လာချင်တဲ့ နိုင်ငံခြားဧည့်သည် ၄၀ လောက် ရှိနေတယ်။လာချင်တဲ့သူက အများကြီးပါ။ ထာပွဲတွေမှာ သူတို့လာ တော့ အောက်ကျောက်တွေနဲ့ အမှတ်တရပစ္စည်းတွေ ရောင်းရတယ်။အထက်ကျောက်ကတော့ သူ့ဈေးနဲ့သူ အရောင်းအဝယ်ရှိပြီးသားပါ”ဟု မိုးကုတ်ကျောက်မျက်ပွဲစား(ထာပွဲ)ဘဏ္ဍာရေးမှူး ကိုမင်းသူက ပြောသည်။

Credit:  The Myanmar Times