ဆော်ဒီတွင် တည်ဆောက်နေသော ရန်ကုန်တိုင်း၏ ၂ ဆကျော် ကျယ်ဝန်းမည့် မြို့တော်သစ်ကြီးအတွက် ဆော်ဒီဘိလပ်မြေ ကုမ္ပဏီများက ထုတ်လုပ်မှု မြှင့်တင်လျက်ရှိ

ဆော်ဒီအာရေးဘီးယားနိုင်ငံ မြောက်ပိုင်းတွင် တည်ဆောက်လျက်ရှိသော ကန်ဒေါ်လာ ၅၀၀ ဘီလီယံအထိ ကုန်ကျမည့် Neom အမည်ရှိ မြို့တော်သစ်ကြီးအတွက် ဆော်ဒီဘိလပ်မြေကုမ္ပဏီများက ဘိလပ်မြေထုတ်လုပ်မှု မြှင့်တင်လျက်ရှိကြောင်း အရှေ့အလယ်ပိုင်းအခြေစိုက် သတင်းဝက်ဘ်ဆိုက်တစ်ခုတွင် ဖော်ပြသည်။

ဆော်ဒီဘိလပ်မြေကုမ္ပဏီများဖြစ်သော Tabuk Cement နှင့် Hail Cement တို့က ဘိလပ်မြေထုတ်လုပ်မှုများ မြှင့်တင်လျက်ရှိရာ ပြီးခဲ့သည့် ၂၀၁၆ ခုနှစ် ပထမ ၆ လတာကာလနှင့် နှိုင်းယှဉ်လျှင် ၂၀ ရာခိုင်နှုန်းနှင့် ၅၅ ရာခိုင်နှုန်းအသီးသီးမြင့်တက်လာကြောင်း ဘလွန်းဘာ့ဂ်ျသတင်းတစ်ရပ်တွင် ဖော်ပြသည်။

Neom မြို့တော်သစ်ကြီး ဆောက်လုပ်မည်ဖြစ်ကြောင်း ဆော်ဒီမင်းသား မိုဟာမက် ဘင် ဆယ်လ်မန်က ပြီးခဲ့သော ၂၀၁၇ ခုနှစ်အတွင်း ထုတ်ဖော်ကြေညာခဲ့ခြင်းဖြစ်သည်။

ဆော်ဒီအာရေးဘီးယားတွင် ယနေ့ခေတ်မရှိသေးသော နည်းပညာမြင့် လူနေမှုဘဝမျိုးကို ရရှိနိုင်မည်ဖြစ်ကြောင်း ဘင် ဆယ်လ်မန်က ကတိပြုထားသည်။

ဆော်ဒီအာရေးဘီးယားသည် ရေနံအပေါ် စီးပွားရေးမှီခိုနေရခြင်းမှ ရှောင်လွှဲနိုင်ရန် စီးပွားရေးကဏ္ဍသစ်များစွာ အကောင်အထည်ဖော် လာလျက် ရှိနေသည်။

Neom မြို့သစ်ကြီး၏ အကျယ်အဝန်းမှာ စတုရန်းကီလိုမီတာ ၂၆၅၀၀ အထိ ရှိမည်ဖြစ်ရာ မြန်မာနိုင်ငံရှိ ရန်ကုန်တိုင်း၏ ၂ ဆကျော် ကျယ်ဝန်းပြီး ရဝမ်ဒါနိုင်ငံနှင့် ဘီလစ်ဇ်နိုင်ငံတို့ထက် ပိုမိုကျယ်ဝန်းသည်ဟု ဆိုသည်။

Neom မြို့သစ်ကြီးကို အစိုးရနှင့် ပုဂ္ဂလိက ဘဏ္ဍာငွေ ကန်ဒေါ်လာ ၅၀၀ ဘီလီယံကျော်ဖြင့် ဆောက်လုပ်သွားမည်ဖြစ်ကြောင်း ဆော်ဒီအစိုးရက ထုတ်ပြန်ထားသည်။

ယင်းမြို့သစ်ကြီးဆောက်လုပ်မည်ဖြစ်ကြောင်း ကြေညာပြီးနောက်ပိုင်း ဘိလပ်မြေကုမ္ပဏီများ၏ ရှယ်ယာဈေးနှုန်းများ မြင့်တက်သွားခဲ့သည်။

Credit: iMyanmarHouse.com
(iMyanmarHouse.com Team မှ ရေးသား ဖော်ပြသည်။)