ရန်ကုန်တိုင်းအတွင်းရှိ ပြည်သူ့အိမ်ရာများ တွင် နိုင်ငံခြားသားများ ငှားရမ်းနေထိုင်မှုများ ကို စိစစ်တွေ့ရှိပါက အရေးယူမည်ဟု တိုင်း လျှပ်စစ်၊ စက်မှုလက်မှုနှင့် လမ်းပန်းဆက်သွယ်ရေးဝန်ကြီး ဒေါ်နီလာကျော်က မေ ၂၈ ရက်က ကျင်းပသော တိုင်းလွှတ်တော်တွင် ပြောကြားခဲ့သည်။
ပြည်သူ့အိမ်ရာဆိုသည်မှာ အိမ်မပိုင်သူ များနှင့် နေရေးအခက်အခဲရှိသော ဝန်ထမ်းများအတွက် ယခင်အစိုးရအဆက်ဆက် လက်ထက်က ဆောက်လုပ်ပေးကာ အဖိုးနှုန်းချိုသာစွာဖြင့် ငှားရမ်းပေးသည့် အိမ်ရာများကို ဆိုလိုခြင်းဖြစ်ပြီး မြို့ပြနှင့် အိမ်ရာဖွံ့ဖြိုးရေး ဦးစီးဌာနလက်အောက်တွင် ရန်ကုန်တိုင်း အတွင်း၌ ပြည်သူ့အိမ်ရာ ၁၆ ခုရှိသည်ဟု တိုင်းအစိုးရ၏အဆိုအရ သိရသည်။
''ပြည်သူ့အိမ်ရာတွေမှာ နိုင်ငံခြားသားများ တရားဝင်နေထိုင်ခွင့်မရှိပါဘူး။ ညအိပ် ညနေဧည့်သည်အဖြစ် တည်းခိုမယ်ဆိုရင် သက်ဆိုင်ရာဝန်ကြီးဌာနတွေရဲ့ ဥပဒေ၊ စည်းမျဉ်းစည်းကမ်းများအတိုင်းသာ စိစစ်ဆောင်ရွက်သွားမှာ ဖြစ်ပါတယ်''ဟု ဒေါ်နီလာကျော်က ဆိုသည်။
မြို့ပြနှင့် အိမ်ရာဖွံ့ဖြိုးရေးဦးစီးဌာနအနေဖြင့် သက်တမ်းကြာမြင့်နေပြီဖြစ်သော ပြည်သူ့အိမ်ရာများကို ကွင်းဆင်းစစ်ဆေးပြီး အဆင့်အတန်းမြှင့်တင်ခြင်းများ လုပ်ဆောင်ရန်၊အိမ်ရာများတွင် သတ်မှတ်စည်းကမ်းများနှင့် ညီညွတ်မှုမရှိပါက အရေးယူဆောင်ရွက်ရန်နှင့် ပြည်သူ့အိမ်ရာများတွင် နိုင်ငံခြားသားများ နေထိုင်မှုကို စိစစ်အရေးယူရန် ကိစ္စရပ်များကို ဒဂုံမြို့နယ် မဲဆန္ဒနယ်အမှတ် ၂ မှ တိုင်းအမတ် ဦးကျော်ဇေယျက မေးမြန်းခဲ့သည်။
ပြည်သူ့အိမ်ရာများတွင် နိုင်ငံခြားသားများအနေဖြင့် တရားဝင်နေထိုင်ခွင့် မရှိသော်လည်း ပြည်သူ့အိမ်ရာအများစုတွင် နိုင်ငံခြားသားများအား တစ်ဆင့်ပြန်လည်ငှားရမ်းထားသည်များကို တွေ့ရကြောင်းလည်း ၄င်းကဆိုသည်။
'' ဦးဝိစာရအိမ်ရာမှာဆိုရင် အခန်းပေါင်း ၆၈၄ ခန်းမှာ အခန်း ၂ဝ လောက်က နိုင်ငံခြားသားတွေကို ပြန်ငှားထားတယ်။ အစိုးရကိုသွင်းတော့ တစ်လမှ ငါးထောင်ခြောက်ထောင်လောက်ပဲ သွင်းရတယ်။ နိုင်ငံခြားသားကိုငှားတော့ ခြောက်သိန်း၊ ခုနစ်သိန်းလောက် ရတယ်လေ။ အခြားနေရာတွေမှာလည်း အများကြီးရှိတယ်''ဟု ၄င်းက ပြောသည်။
ပြည်သူ့အိမ်ရာများအတွင် ငှားရမ်းနေထိုင်သူများအတွက် အိမ်ရာအုပ်ချုပ်ရေးစခန်းများ ဖွင့်လှစ်ပြီး အိမ်ငှားစည်းကမ်းချက် ၂၆ ချက်ပါ အိမ်ငှားစာချုပ်ချုပ်ဆိုပြီး စီမံခန့်ခွဲလျက်ရှိကြောင်း၊ စည်းကမ်းဖောက်ဖျက်ပါက လူမှုရေးနည်းလမ်းအရ အုပ်ချုပ်ရေးစခန်းနှင့် သာယာရေးကော်မတီ ပူးပေါင်းဖြေရှင်းပြီး လိုအပ်ပါက စီမံခန့်ခွဲမှုနည်းလမ်းအရ အရေးယူခြင်းများ ဆောင်ရွက်လျက်ရှိကြောင်းလည်း ဝန်ကြီးက ဆက်လက်ပြောကြားခဲ့သည်။
Credit: The Myanmar Times
