စင်္ကာပူအစိုးရပိုင် ကုမ္ပဏီက အမေရိကန်ကုမ္ပဏီခွဲတစ်ခုနှင့် ပူးပေါင်းကာ တရုတ်ပြည်အငှားအိမ်ရာဈေးကွက်တွင် ကန်ဒေါ်လာ ၁ ဘီလီယံခန့် ရင်းနှီးမြှုပ်နှံမည်

စင်္ကာပူအစိုးရပိုင် ကုမ္ပဏီ GIC သည် အမေရိကန်ကုမ္ပဏီခွဲတစ်ခုနှင့် ပူးပေါင်းကာ တရုတ်ပြည်အငှားအိမ်ရာဈေးကွက်တွင် ကန်ဒေါ်လာ ၁ ဘီလီယံခန့် ရင်းနှီးမြှုပ်နှံရန် စီစဉ်လျက်ရှိကြောင်း ရှန်ဟိုင်းအခြေစိုက် အိမ်ခြံမြေသတင်းဝက်ဘ်ဆိုက်တစ်ခုတွင် ဖော်ပြသည်။

GIC ၏ မူလအမည်မှာ စင်္ကာပူအစိုးရ ရင်းနှီးမြှုပ်နှံရေး ကော်ပိုရေးရှင်းဖြစ်ပြီး စင်္ကာပူ၏ နိုင်ငံခြားအရန်ငွေများကို စီမံခန့်ခွဲနိုင်ရန် ၁၉၈၁ ခုနှစ်တွင် တည်ထောင်ခဲ့ခြင်းဖြစ်သည်။

ယခုအခါ GIC က အမေရိကန်ပြည်ထောင်စု၊ နယူးယောက်အခြေစိုက် Warburg Pincus ကုမ္ပဏီ၏ ကုမ္ပဏီခွဲ၊ အိမ်ခြံမြေကုမ္ပဏီ ဖြစ်သော Nova နှင့် လက်တွဲကာ တရုတ်ပြည်အငှားအိမ်ခြံမြေဈေးကွက်တွင် ကန်ဒေါ်လာ ၁ ဘီလီယံခန့် ရင်းနှီးမြှုပ်နှံရန် စီစဉ် လာခြင်းလည်း ဖြစ်သည်။

GIC နှင့် Nova တို့၏ ပူးတွဲကြေညာချက်တစ်ရပ်အရ တရုတ်ပြည်အတွင်းရှိ ပထမတန်းစားမြို့ကြီးများ၏ အချက်အခြာနေရာများတွင် အရည်အသွေးမှီ အငှားလူနေအိမ်ရာစီမံကိန်းများ အကောင်အထည်ဖော်ရန် ဝယ်ယူခြင်း၊ ပြန်လည်မွမ်းမံခြင်းနှင့် လုပ်ငန်းလည်ပတ်ခြင်း ကဏ္ဍများအတွက် ယွမ်ငွေ ၄ ဒသမ ၃ ဘီလီယံ (ကန်ဒေါ်လာ ၆၇၅ သန်း) ခန့် ရင်းနှီးမြှုပ်နှံသွားကြမည်ဖြစ်ကြောင်း ကြေညာထားသည်။

သဘောတူညီမှုတွင် Nova ကုမ္ပဏီ၏ ရှယ်ယာအချို့ကို ဝယ်ယူခွင့်ပြုမည့်အချက်လည်း ပါဝင်ကာ ယခုနှစ် တတိယ ၃ လပတ်တွင် အကောင်အထည်ဖော်သွားဖွယ်ရာရှိသည်။

ဘဏ္ဍာငွေ ကန်ဒေါ်လာ ၃၀၀ ဘီလီယံခန့်ရှိနိုင်သည်ဟု ခန့်မှန်းထားကြသော GIC သည် Nova ကုမ္ပဏီတွင် ပူးတွဲတည်ထောင်သူများပြီးလျှင် အကြီးမားဆုံး ပူးပေါင်းရင်းနှီးမြှုပ်နှံသူဖြစ်လာမည်ဖြစ်ကာ Nova ၏ စီမံကိန်းများတွင် ကန်ဒေါ်လာ ၁ ဘီလီယံကျော် ရင်းနှီးမြှုပ်နှံသွားဖွယ်ရှိသည်။

“မြို့ပြလူနေမှုအသွင်ကို ကူးပြောင်းနေပြီး လျင်မြန်စွာဖွံ့ဖြိုးကြီးထွားလာနေတဲ့ တရုတ်ပြည် အငှားလူနေခန်းဈေးကွက်ဟာ ကျွန်တော်တို့ကို ရေရှည်ရင်းနှီးမြှုပ်နှံသူအဖြစ် ဝင်ရောက်ဖို့ ဆွဲဆောင်မှုတွေရှိနေပါတယ်။

ကျွန်တော်တို့ ပစ်မှတ်ထားတဲ့ ဝင်ငွေရှိတဲ့ အုပ်စုတွေဟာ အိမ်ငှားနေထိုင်သူပမာဏ များပြားလာတာကို တွေ့နေရတယ်” ဟု GIC ၏ ရင်းနှီးမြှုပ်နှံမှုဆိုင်ရာ အကြီးအကဲ လီကော့ဆန်က ပြောကြားသည်။

Credit: iMyanmarHouse.com
(iMyanmarHouse.com Team မှ ရေးသား ဖော်ပြသည်။)