နိုင်ငံခြားအာမခံကုမ္ပဏီများ အသက်အာမခံ လုပ်ငန်းလိုင်စင်လျှောက်ထားပါက ရာနှုန်းပြည့် ရင်းနှီးမြှုပ်နှံခွင့်ပြုမည်ဖြစ်ကြောင်း စီမံကိန်းနှင့် ဘဏ္ဍာရေးဝန်ကြီးဌာနမှ အကြီးတန်းအရာရှိတစ်ဦးက ပြောကြားသည်။
လက်ရှိတွင် အာမခံလိုင်စင်များချပေးရာ၌ အသက်အာမခံလုပ်ငန်းနှင့် အထွေထွေအာမခံလုပ်ငန်းဟူ၍ နှစ်မျိုးရှိကြောင်း၊ အထွေထွေအာမခံလုပ်ငန်း လုပ်ချင်သည့် နိုင်ငံခြားကုမ္ပဏီအနေနှင့် ပြည်တွင်းကုမ္ပဏီများနှင့် ဖက်စပ်လုပ်ကိုင်နိုင်ပြီး ကုမ္ပဏီ ဥပဒေအရ ၃၅ ရာခိုင်နှုန်း ရှယ်ယာထည့်ဝင်နိုင်ကြောင်း ၎င်းက ဆိုသည်။
“ဘာဖြစ်လို့ အသက်အာမခံကို ရာနှုန်းပြည့်ပေးဖို့ စဉ်းစားရတာလဲဆိုရင် ပြည်တွင်းဈေးကွက်မှာ လူ့အသက်ထက် ပစ္စည်းတွေကို အာမခံထားတာများတယ်။ အထွေထွေကိုပေးလိုက်ရင် ပြည်တွင်းကုမ္ပဏီတွေလည်း ဈေးကွက်မယှဉ်နိုင်ဘူးဖြစ်မယ်။ အသက်အာမခံတို့၊ ကျန်းမာရေးအာမခံတို့က လူစိတ်ဝင်စားမှု နည်းနေတဲ့အတွက် သူတို့ရဲ့နည်းပညာနဲ့ဆွဲဆောင်ပြီး ပိုကောင်းလာစေဖို့ စီစဉ်ထားတာပါ”ဟု ၎င်းက ရှင်းပြသည်။
အာမခံလုပ်ငန်းကြီးကြပ်ရေးအဖွဲ့သို့ လာရောက်လျှောက်ထားသည့် နိုင်ငံခြားအာမခံကုမ္ပဏီ ၂၄ ခုရှိပြီး တရုတ်၊ ဂျပန်၊ ကိုရီးယား၊ အိန္ဒိယနှင့် အမေရိကတို့မှ ကုမ္ပဏီများဖြစ်ကြောင်း၊ ယင်းကုမ္ပဏီများသည် ပြီးခဲ့သည့်နှစ်ကတည်းက အစိုးရထံ လျှောက်လွှာတင်ထားခြင်းဖြစ်ကြောင်း စီမံကိန်းနှင့် ဘဏ္ဍာရေးဝန်ကြီးဌာနထံမှ သိရသည်။
နိုင်ငံခြားအာမခံကုမ္ပဏီများကို လုပ်ကိုင်ခွင့်ပေးမည်ဖြစ်သောကြောင့် ပြည်တွင်းကုမ္ပဏီများကိုလည်း အာမခံ အမျိုးအစားအသစ်များ ရောင်းချခွင့် တဖြည်းဖြည်းချပေးထားပြီး နောက်ပိုင်းတွင်လည်း ကျန်ရှိသည့် အာမခံအမျိုးအစား ၁၄ မျိုးကို လုပ်ကိုင်ခွင့်ပေးမည်ဟု ကြားသိရကြောင်း ဂလိုဘယ်ဝေါလ် အာမခံကုမ္ပဏီ၏ ဒါရိုက်တာ ဦးစိုးဝင်းသန့်က ပြောကြားသည်။
“အထွေထွေအာမခံ လုပ်ငန်းလိုင်စင်လုပ်တဲ့ ကုမ္ပဏီက ပြည်တွင်းမှာ ခုနစ်ခုပဲ ရှိတယ်။ ကုမ္ပဏီသက်တမ်းတွေလည်း နုသေးတဲ့အတွက် နိုင်ငံခြားတွေကို မယှဉ်နိုင်ဘူး။ တွဲပြီးလုပ်ရမယ်ဆိုရင် အနည်းဆုံးတော့ လုပ်ငန်းရှင်တွေအတွက် နည်းပညာ အကူအညီရတာပေါ့”ဟု ၎င်းက ဆိုသည်။
လက်ရှိတွင် မြန်မာ့အာမခံလုပ်ငန်း အပါအဝင် ပုဂ္ဂလိကအာမခံကုမ္ပဏီ ၁၁ ခုက အာမခံဝန်ဆောင်မှုလုပ်ငန်းများ လုပ်ကိုင်လျက်ရှိပြီး ယင်းလုပ်ငန်းအားလုံးမှ နှစ်စဉ်ရရှိသည့် ပရီမီယံကြေးမှာ ကျပ် ၁၁၄ ဒသမ ၃ ဘီလီယံရှိကြောင်း စီမံကိန်းနှင့် ဘဏ္ဍာရေးဝန်ကြီးဌာနထံမှ သိရသည်။
Credit: The Voice
