ဟောင်ကောင်တွင် သင်္ဘောကွန်တိန်နာပုံးအရွယ်မျှသာရှိသည့် လူနေခန်းတစ်ခန်းကို ဟောင်ကောင်ဒေါ်လာ ၈ သန်းခန့်ဖြင့် ရောင်းချ

ဟောင်ကောင်တွင် သင်္ဘောကွန်တိန်နာပုံးအရွယ်ထက် အနည်းငယ်မျှသာ ပိုမိုကျယ်ဝန်းသည့် လူနေခန်းတစ်ခန်းကို ဟောင်ကောင်ဒေါ်လာ ၈ သန်းခန့်ဖြင့် ရောင်းချလိုက်ရာ ဟောင်ကောင်ရှိ ကျဉ်းမြောင်းလှသည့် လူနေခန်းတို့အနက် စံချိန်တင် ဈေးနှုန်း ဖြစ်သွားသည်။

နေအိမ်ခန်းအကျယ်မှာ စတုရန်းပေ ၂၀၉ ပေသာရှိရာ သင်္ဘောကွန်တိန်နာပုံးထက် အနည်းငယ်မျှသာ ပိုမိုကျယ်ဝန်းလေသည်။

ဟောင်ကောင်ဒေါ်လာ ၇ ဒသမ ၈၆ သန်း ( ကန်ဒေါ်လာ ၁ သန်း) ဖြင့် ရောင်းချခဲ့ခြင်းဖြစ်ရာ စတုရန်း ၁ ပေလျှင် ဟောင်ကောင်ဒေါ်လာ ၃၇၆၅၁ အထိ ကျသင့်နေသည်။

ဟောင်ကောင်သည် ကမ္ဘာပေါ်တွင် အိမ်ခြံမြေဈေးအကြီးဆုံးအဖြစ် စံချိန်တင်ထားသည့် မြို့လည်းဖြစ်ပြီး ဟောင်ကောင်မြို့သား ၄ ဦးလျှင် ၁ ဦးက ၎င်းတို့၏ဘဝသက်တမ်းအတွင်း နေအိမ်အပိုင်ဝယ်ယူနိုင်ရန် မျှော်လင့်ချက်မရှိကြောင်း ပြောကြားကြသည်။

ရောင်းချလိုက်သည့်အခန်းမှာ ဟောင်ကောင်ရှိ ပေါ့ခ်ဖူလမ်အရပ်တွင် တည်ရှိသည်။

ဟောင်ကောင် developer ဖြစ်သော Kowloon Development က ထုတ်ပြန်ရာတွင် ပေါ့ခ်ဖူလမ်အိမ်ရာစီမံကိန်းရှိ နေအိမ်ခန်းပေါင်း ၃၅၀ အနက် ၆၀ ရာခိုင်နှုန်းကို ရောင်းချခဲ့ပြီးဖြစ်ကြောင်း ထုတ်ပြန်ထားသည်။

ယင်းစီမံကိန်းရှိ လူနေခန်းများမှာ စတုရန်းပေ ၂၀၉ ပေမှ ၃၁၀ ပေကြားသာ ကျယ်ဝန်းပြီး ဈေးနှုန်းမှာ ဟောင်ကောင်ဒေါ်လာ ၁၁ ဒသမ ၂၉ သန်းနှင့် အထက်ရှိသည်။

အချက်အလက်များအရ ဟောင်ကောင်သား ၂၇ ရာခိုင်နှုန်းမှာ နေအိမ်ဝယ်ယူနိုင်ရန် မျှော်လင့်ချက်မထားကြတော့ကြောင်း အိမ်ခြံမြေကြော်ငြာကုမ္ပဏီတစ်ခုဖြစ်သည့် REA Group မှ စီးပွားရေးပညာရှင် နီရီဒါ ကိုနစ်ဘီက ပြောကြားသည်။

နေအိမ်မဝယ်ယူနိုင်ခြင်းကြောင့် အခြားသော လူမှုပြဿနာများလည်း ပေါ်ပေါက်လာစေရာ စုံတွဲများအနေဖြင့် လက်ထပ်ရန် နှောင့်နှေးသွားကြခြင်းကဲ့သို့ အကြောင်းရပ်များဖြစ်သည်ဟု REA Group ၏ သုတေသနအချက်အလက်များတွင် ဖော်ပြသည်။

ဟောင်ကောင်တွင် ယင်းကဲ့သို့ လူနေခန်းများကို နာနိုတိုက်ခန်း၊ ဆေးတောင့် တိုက်ခန်း၊ ဖိနပ်ဘူးတိုက်ခန်းဟု အမျိုးမျိုး အမည်ပေးထားကြသည်။

ဟောင်ကောင်တွင် နေထိုင်သူထက်ဝက်နီးပါး (၄၈ ရာခိုင်နှုန်း) ကပြောကြားကြသည်မှာ အကယ်၍ ဈေးနှုန်းသာ မျှတမည်ဆိုပါက နာနိုတိုက်ခန်းများကို ဝယ်ယူလိုကြောင်း ပြောကြားကြသည်ဟု စစ်တမ်းတွင် ဖော်ပြသည်။
ယင်းအနက် အချို့က ကိုယ်တိုင်နေထိုင်ရန်ဖြစ်ပြီး အချို့ကမူ ရင်းနှီးမြှုပ်နှံရန်အတွက်ဖြစ်သည်ဟု ဆိုသည်။

ထိုစစ်တမ်းများအပေါ်အခြေခံ၍ developer တို့က နာနိုတိုက်ခန်းများ အလုံးအရင်းဆောက်လုပ်လာကြမှုကြောင်းလည်း ဈေးကွက်တွင် ရောင်းလိုအား လွန်ကဲမှုဖြစ်ပေါ်လာဖွယ်ရှိနေသည်။

လက်ရှိဆောက်လုပ်နေဆဲ စီမံကိန်းများအရ လာမည့် ၂၀၂၀ ပြည့်နှစ်တွင် ဟောင်ကောင်၌ နာနိုတိုက်ခန်းပေါင်း အနည်းဆုံး ၂၁၀၀ ခန့် ဈေးကွက်သို့ ရောက်ရှိလာဦးမည်ဖြစ်သည်။

Henderson Land က အကောင်အထည်ဖော်နေသည့် အိမ်ရာစီမံကိန်းများဆိုလျှင် အကျယ်အဝန်း စတုရန်းပေ ၂၀၀ ပင်မရှိချေ။

ကွန်တိန်နာတစ်လုံး၏ ပုံမှန်အရွယ်အစားမှာ ပေ ၂၀ ဖြစ်ပြီး စတုရန်းပေ ၁၆၅ ပေရှိကာ ဗြိတိန်တွင် ကားပါကင်နေရာတစ်ခု၏ ပုံမှန်အကျယ်အဝန်းမှာ ၁၂၆ စတုရန်းပေ ဖြစ်သည်။

Credit: iMyanmarHouse.com
(iMyanmarHouse.com Team မှ ရေးသား ဖော်ပြသည်။)