ဒေါ်နယ်ထရမ့်၏ သားမက်ဖြစ်သူ သမ္မတအကြံပေးပုဂ္ဂိုလ် ဂျရက်ဒ် ကွတ်ရ်ှနာ မိသားစုပိုင် အိမ်ခြံမြေကုမ္ပဏီအတွက် စာရွက်စာတမ်းအတုများစွာ ပြုလုပ်တင်သွင်းခဲ့ကြောင်း အေပီသတင်းဌာနက ဖွင့်ချ

အမေရိကန်သမ္မတ ဒေါ်နယ်ထရမ့်၏ သားမက်ဖြစ်သည့်အပြင် သမ္မတအကြံပေးပုဂ္ဂိုလ်အဖြစ်လည်း တာဝန်ထမ်းဆောင်လျက်ရှိသူ ဂျရက်ဒ် ကွတ်ရ်ှနာသည် မိသားစုပိုင် Kushner Companies အိမ်ခြံမြေကုမ္ပဏီအတွက် စာရွက်စာတမ်းအတုများစွာ ပြုလုပ်တင်သွင်းခဲ့ကြောင်း အေပီသတင်းဌာနက ဖွင့်ချလိုက်သည်။

Kushner Companies သည် ၂၀၁၅ ခုနှစ်အတွင်း နယူးယောက်မြို့၊ ကွင်းစ်အရပ်တွင် လူနေအိမ်ရာ အဆောက်အအုံ ၃ ခု ဝယ်ယူခဲ့သည်။

အဆိုပါအိမ်ရာများမှာ နေထိုင်သူများကို အထူးစည်းမျဉ်းဥပဒေများဖြင့် အကာအကွယ်ပေးထားပြီး developer တို့အနေဖြင့် အိမ်ငှားခ တိုးမြှင့်ကောက်ခံခြင်း၊ အိမ်ငှားများကို နှင်ထုတ်ခြင်းများ မပြုလုပ်နိုင်ရန် အကာအကွယ်ပေးထားသည်။

သို့စေကာမူ ကွတ်ရ်ှနာ၏ ကုမ္ပဏီသည် ဝယ်ယူပြီး ၂ နှစ်အကြာတွင် အဆောက်အအုံ ၃ ခုလုံးကို ကန်ဒေါ်လာ သန်း ၆၀ ဖြင့် ပြန်လည်ရောင်းထုတ်ခဲ့သည်။

မူလဝယ်ယူခဲ့စဉ်က ဈေးနှုန်းထက် ၅၀ ရာခိုင်နှုန်းနီးပါး မြင့်မားသောဈေးဖြင့် ရောင်းချခဲ့ခြင်း ဖြစ်သည်။

Kushner Companies က နယူးယောက်မြို့တစ်လွှား ၎င်းတို့ပိုင်ဆိုင်ထားသော ဒါဇင်ဂဏန်းပမာဏရှိ အဆောက်အအုံများတွင် ငှားရမ်းနေထိုင်သူမရှိကြောင်း စာရွက်စာတမ်းအမှားများ မကြာခဏတင်သွင်းခဲ့သည်ဟု ဆိုသည်။
အမှန်စင်စစ်တွင် နယူးယောက်၌ Kushner Companies ပိုင်ဆိုင်ထားသည့် အဆောက်အအုံပေါင်း ရာနှင့်ချီ၍ရှိသည်ဟု ဆိုသည်။

Kushner Companies က တုံ့ပြန်ကြေညာချက်ထုတ်ရာတွင် ကွတ်ရ်ှနာကုမ္ပဏီအနေဖြင့် ငှားရမ်းနေထိုင်သူတို့၏ အခွင့်အရေးများကို မည်သည့်အခါတွင်မျှ ငြင်းပယ်ခဲ့လိမ့်မည်မဟုတ်ကြောင်း၊ ကုမ္ပဏီသည် လွန်ခဲ့သည့်နှစ်ပေါင်း ၃၀ ကာလအတွင်း လူနေခန်း ထောင်ပေါင်းများစွာကို ပြန်လည်ပြုပြင်မွမ်းမံမှုများ ပြုလုပ်ခဲ့ကြောင်း ဖော်ပြခဲ့သည်။

Housing Rights Initiative ၏ ထုတ်ပြန်ချက်အရမူ Kushner Companies သည် ၂၀၁၃ ခုနှစ်မှ ၂၀၁၆ ခုနှစ်အကြား နယူးယောက်မြို့တစ်လွှားရှိ အဆောက်အအုံပေါင်း ၃၄ ခု၏ ဆောက်လုပ်ရေးပါမစ်အတွက် စာရွက်စာတမ်းအမှားများ အနည်းဆုံး ၈၀ ခုခန့် တင်ပြခဲ့သည်ဟု ဆိုသည်။

အဆိုပါစာရွက်စာတမ်းအားလုံးတွင် ဖော်ပြထားသည်မှာ ကုမ္ပဏီပိုင် အဆောက်အအုံများတွင် အိမ်ငှားနေထိုင်သူများမရှိဟု ဖော်ပြခဲ့သည်ဟုလည်း ဆိုသည်။

Credit: iMyanmarHouse.com
(iMyanmarHouse.com Team မှ ရေးသား ဖော်ပြသည်။)