အမေရိကန်တွင် မီးပြတိုက် ၆ လုံး လေလံတင်ရောင်းချမည်ဖြစ်ပြီး ဈေးအနိမ့်ဆုံးမီးပြတိုက်၏ ကြမ်းခင်းဈေးမှာ ကန်ဒေါ်လာ ၁၀၀၀၀ (မြန်မာငွေ ၁၃၅ သိန်းကျော်) ဖြစ်

အမေရိကန်တွင် အသုံးမပြုတော့သော မီးပြတိုက် ၆ လုံး လေလံတင်ရောင်းချမည်ဖြစ်ပြီး ဈေးအနိမ့်ဆုံးမီးပြတိုက်၏ ကြမ်းခင်းဈေးမှာ ကန်ဒေါ်လာ ၁၀၀၀၀ (မြန်မာငွေ ၁၃၅ သိန်းကျော်) ဖြစ်ကြောင်း သြစတေးလျအခြေစိုက် အိမ်ခြံမြေသတင်းဝက်ဘ်ဆိုက်တစ်ခုတွင် ဖော်ပြသည်။

အဆိုပါမီးပြတိုက်များကို ၁၉၃၀ ပြည့်နှစ်မတိုင်မီကာလများက ဆောက်လုပ်ခဲ့ခြင်းဖြစ်ပြီး ယခုအခါ ပြည်ထောင်စုအစိုးရက လေလံတင်ရောင်းချလာခြင်း ဖြစ်သည်။

ပြတိုက် ၅ ခုမှာ မီချီဂန်ပြည်နယ်တွင် တည်ရှိပြီး ဗာဂျီးနီးယားပြည်နယ်အရှေ့ဘက် Chesapeake Bay တွင် တစ်ခုဖြစ်သည်။
သာယာလှပသော ဝန်းကျင်မြင်ကွင်းများနှင့် အမြဲမပြတ်မွမ်းမံမှုများ ပြုလုပ်နိုင်ရန် လုံ့လရှိသူများအနေဖြင့် မီးပြတိုက်များ ဝယ်ယူသင့်လေသည်။

အချို့ကမူ ဝယ်ယူလိုကြသော်လည်း ပြုပြင်ထိန်းသိမ်းစရိတ် အလွန်ကုန်ကျမည်ကိုလည်း ထည့်သွင်းတွက်ချက်လျက် ရှိကြသည်။
မီးပြတိုက်များကို ရောင်းချရခြင်း၏ အကြောင်းရင်းမှာလည်း ပြုပြင်ထိန်းသိမ်းစရိတ် မြင့်မားခြင်းကြောင့်ဖြစ်ကြောင်း ၂၀၁၅ ခုနှစ်အတွင်းက ထုတ်ပြန်သည့် အစိုးရ၏ အစီရင်ခံစာတစ်ရပ်တွင် ဖော်ပြသည်။

မက်ဆာချူးဆက်ပြည်နယ်ရှိ Borden Flats မီးပြတိုက်ကို နစ်ခ် ကော်စတက်ဒ်အမည်ရှိသူက ၂၀၁၀ ပြည့်နှစ်အတွင်း လေလံပွဲတစ်ခုတွင် ကန်ဒေါ်လာ ၅၆၀၀၀ ဖြင့် ဝယ်ယူခဲ့သည်။

ယင်းနောက် မီးပြတိုက်ကို မူရင်းမပျက်ပြုပြင်မွမ်းမံရန် ကန်ထရိုက်တာများကို ဆက်သွယ်စုံစမ်းရာ ကန်ဒေါ်လာ ၃၀၀၀၀၀ မှ ၄၀၀၀၀၀ အကြားကုန်ကျမည်ဟု ပြောကြားခဲ့ကြသည်။

သို့ဖြင့် ကိုယ်တိုင်ပြုပြင်ရန် ကော်စတက်ဒ်က ဆုံးဖြတ်လိုက်သည်။
“ရိုးရိုးသားသားပြောရရင်တော့ တကယ်အံ့သြစရာပါ။ မူလအတိုင်းပြုပြင်တာမှာ ဒေါ်လာ ၃၀၀၀၀ ပဲ ကုန်ခဲ့တယ်” ဟု ကော်စတက်ဒ်က ဆိုသည်။

၁၃၆ နှစ်သက်တမ်းရှိ အဆိုပါမီးပြတိုက်ကို မွမ်းမံပြုပြင်ရန်အတွက် နာရီပေါင်း ၃၀၀ ကြာမြင့်ခဲ့ပြီး နှစ်စဉ် ကန်ဒေါ်လာ ၁၅၀၀၀ ကုန်ကျခဲ့သည်။

ယခုလေလံတင်ရောင်းချမည့် မီးပြတိုက်များကို General Services Administration ၏ ဝက်ဘ်ဆိုက်တွင် ဖော်ပြထားသည်။
ယခုလေလံတင်ရောင်းချမည့် မီးပြတိုက်များမှာ မြောက်အမေရိကရှိ အကြီးမားဆုံး ရေကန်ကြီး ၅ ခုတွင် အပါအဝင်ဖြစ်သော Lake Erie အနီး ၁၈၈၅ ခုနှစ်တွင် ဆောက်လုပ်ခဲ့သည့် Detroit River မီးပြတိုက်၊ ဗာဂျီးနီးယားပြည်နယ်အရှေ့ဘက် Chesapeake ပင်လယ်အော်ရှိ Craighill Channel Lower Range Front မီးပြတိုက် (၁၉၃၇ ခုနှစ်တွင် ဆောက်လုပ်) ၊ ကနေဒါ- အမေရိကန်နယ်စပ်တွင် တည်ရှိသော Laurentian Great Lakes အနီး ၁၉၂၈ ခုနှစ်တွင် ဆောက်လုပ်ခဲ့သော Lansing Shoal မီးပြတိုက်တို့ ဖြစ်ကြသည်။

မီးပြတိုက် ၆ ခုအနက် ၄ ခုမှာ ကြမ်းခင်းဈေး ကန်ဒေါ်လာ ၁၅၀၀၀ ဖြစ်ပြီး၊ တစ်ခုမှာ ၂၇၀၀၀ ဖြစ်ကာ ဈေးအနည်းဆုံးမှာ
ဒေါ်လာ ၁၀၀၀၀ ဖြစ်သည်။

၂၀၀၀ ပြည့်နှစ်မှ စတင်ပြီး အမေရိကန်အစိုးရသည် မီးပြတိုက်ပေါင်း ၁၃၃ ခုကို လေလံတင်ရောင်းချခဲ့ပြီးဖြစ်ပြီး
ယင်းတို့အနက်မှ ၇၈ လုံးကို သမိုင်းဝင်အဆောက်အအုံထိန်းသိမ်းသူများက အခကြေးငွေမပေးရဘဲ ရရှိသွားကြပြီး ၅၅ ခုကို လေလံတင်ရောင်းချခဲ့ခြင်း ဖြစ်သည်။


Credit: iMyanmarHouse.com
(iMyanmarHouse.com Team မှ ရေးသား ဖော်ပြသည်။)