ဆောက်လုပ်ရေးကုမ္ပဏီများ စည်းကမ်းချက်နှင့် မညီပါက အမည်ပျက်စာရင်း သွင်းမည်

ကရင်ပြည်နယ်ရှိ ဒေသဖွံ့ဖြိုးရေး လုပ်ငန်းများကို ဆောင်ရွက်ရာတွင် ဆောက်လုပ်ရေး ကုမ္ပဏီများအနေနှင့် တင်ဒါစည်းကမ်းချက်နှင့် မကိုက်ညီပါက အမည်ပျက်စာရင်း(Black List)သွင်းကာ တည်ဆဲဥပဒေနှင့် အရေးယူမည်ဖြစ်ကြောင်း ကရင်ပြည်နယ် သဘာဝပတ်ဝန်းကျင် ထိန်းသိမ်းရေး၊ သစ်တော၊ သတ္တု၊ သယံဇာတနှင့် လမ်းပန်းဆက်သွယ်ရေး ဝန်ကြီး ဦးစောပြည်သာက ပြောကြားသည်။

ဇူလိုင်လ ၂၄ ရက်က ကျင်းပသော ဒုတိယအကြိမ် ကရင်ပြည်နယ်လွှတ်တော် ပဉ္စမ ပုံမှန် အစည်းအဝေးတွင် ကော့ကရိတ်မြို့နယ် မဲဆန္ဒနယ် အမှတ် (၁)မှ ပြည်နယ် လွှတ်တော်ကိုယ်စားလှယ် ဒေါ်နန်းသူဇာဝင်းက ကရင်ပြည်နယ် ၂၀၁၆-၂၀၁၇ ဘဏ္ဍာရေးနှစ်အတွင်း ဒေသဖွံ့ဖြိုးရေး အဆောက်အအုံများ ဆောက်လုပ်ရာတွင် တင်ဒါအောင် ကုမ္ပဏီများ၏ စံချိန်စံညွှန်းနှင့် မညီမှုများအပေါ် မေးခွန်းမေးမြန်းရာ ဝန်ကြီးက အထက်ပါအတိုင်း ပြောကြားသည်။

စံချိန်စံညွန်းနှင့် ကိုက်ညီစွာ မဆောင်ရွက်နိုင်သော ကုမ္ပဏီများကို ပြည်နယ်ရှိ တင်ဒါခေါ်ယူမှုများတွင် ပါဝင်မယှဉ်ပြိုင် နိုင်စေရန် Black List (အမည်ပျက်) စာရင်းတွင် သတ်မှတ်သွားမည် ဖြစ်ကြောင်း၊ ယင်းအပြင် စစ်ဆေးတွေ့ရှိချက်များအပေါ် မူတည်ပြီး တင်ဒါစည်းကမ်းများနှင့် မကိုက်ညီပါက သက်ဆိုင်ရာ ဌာနမှ တည်ဆဲ ဥပဒေနှင့်အညီ အရေးယူမည်ဖြစ်ကြောင်း ၎င်းက ပြောဆိုသည်။

“အဆောက်အအုံတွေကို သွားစစ်တဲ့အခါမှာ နံရံတွေ အက်ကွဲတာ၊ ခေါင်မိုး မလုံတာတွေ၊ မျက်နှာကြက်များ ပြိုကျတဲ့အတွက် အဆောက်အအုံတွေကို ပြိုကျတဲ့အတွက် ထီးဆောင်း စစ်ဆေးရတာတွေလည်း ရှိပါတယ်၊ သက်ဆိုင်ရာ အစိုးရကို အစီရင်ခံစာ တင်ပြပေမယ့်လည်း ကုမ္ပဏီတွေက မပြင်ဆင်တာတွေလည်း ရှိတာကို တွေ့ရတယ်”ဟု ကော့ကရိတ်မြို့နယ် မဲဆန္ဒနယ် အမှတ် ၁ မှ ပြည်နယ်လွှတ်တော် ကိုယ်စားလှယ် ဒေါ်နန်းသူဇာဝင်းက ပြောကြားသည်။

ဒေသအတွင်း စာသင်ကျောင်းများ၊ ကျေးလက် ဆေးပေးခန်းများ၊ ဝန်ထမ်းအိမ်ရာများ ဆောက်လုပ်ရာတွင် တင်ဒါစည်းကမ်းပါ စံချိန်စံညွှန်းများအတိုင်း ဆောက်လုပ်ခဲ့ခြင်း မရှိသဖြင့် ဆောက်လုပ်မှု မပြီးခင်တွင် ပျက်စီးနေသည်များကိုလည်း တွေ့ရကြောင်း ၎င်းထံမှ သိရသည်။

Credit: The Voice