ဂျက်ကလင်းကနေဒီ ကလေးဘဝကနေထိုင်ခဲ့သော မန်ဟက်တန်တိုက်ခန်း ဒေါ်လာ ၂၅ သန်းဖြင့် ရောင်းထွက်ပြီ

လုပ်ကြံသတ်ဖြတ်ခံခဲ့ရသော အမေရိကန်သမ္မတ ဂျွန်အက်ဖ်ကနေဒီ၏ ဇနီး ဂျက်ကလင်းကနေဒီ ငယ်စဉ်က နေထိုင်ခဲ့ဖူးသော မန်ဟက်တန်တိုက်ခန်းသည် အရောင်းဈေးကွက်တွင် နှစ်ပေါင်းများစွာ ရောင်းမထွက်ဘဲ ရှိနေခဲ့ရာမှ ယခုအခါတွင် ဒေါ်လာ ၂၅ သန်းဖြင့် ရောင်းထွက်သွားပြီဖြစ်ကြောင်း နယူးယောက်အခြေစိုက် အိမ်ခြံမြေသတင်းဝက်ဘ်ဆိုက်တစ်ခုတွင် ဖော်ပြသည်။

နေအိမ်ခန်းတည်ရှိသည့်နေရာမှာ အမေရိကန်ပြည်ထောင်စု၊ နယူးယောက်မြို့၊ မန်ဟက်တန်အရပ်ရှိ အမှတ် ၇၄၀၊ ပန်းခြံရိပ်သာ လမ်းတွင် တည်ရှိပြီး ဈေးကွက်တွင် နှစ်ပေါင်းများစွာ ရောင်းမထွက်ဘဲ ရှိနေခဲ့ကာ အကြိမ်ကြိမ်ဈေးလျှော့ပေးပြီးနောက် ယခုအခါ ကန်ဒေါ်လာ ၂၅ ဒသမ ၂၅ သန်းဖြင့် ရောင်းထွက်သွားခြင်း ဖြစ်သည်။

Duplex အခန်းဖြစ်သော ယင်းအခန်းသည် ဈေးကွက်အတွင်းသို့ ပထမဆုံးစတင်ရောက်ရှိခဲ့သည်မှာ ၂၀၁၄ ခုနှစ်တွင်းကဖြစ်ပြီး ထိုစဉ်က ခေါ်ဈေးမှာ ကန်ဒေါ်လာ ၄၄ သန်းဖြစ်သည်။

ရောင်းမထွက်သောကြောင့် အကြိမ်ကြိမ်ဈေးနှုန်းလျှော့ချပြီးနောက် နောက်ဆုံးအကြိမ်အဖြစ် Sotheby’s International Realty မှ ကန်ဒေါ်လာ ၂၉ ဒသမ ၅ သန်းဖြင့် မူရင်းခေါ်ဈေးအောက် ကန်ဒေါ်လာ ၁၄ သန်းခန့်အထိ ဈေးနှုန်းလျှော့ချဈေးကွက်တင်ခဲ့သည်။

ယင်းသို့ ဈေးကွက်တင်ခဲ့သည်မှာ ပြီးခဲ့သော ၂၀၁၆ ခုနှစ် နိုဝင်ဘာလအတွင်ကဖြစ်ပြီး အဆိုပါသတင်းကို iMyanmarHouse.com တွင် ရေးသားတင်ပြခဲ့ပြီးဖြစ်ရာ ပြန်လည်ဖတ်ရှုလိုပါက http://www.imyanmarhouse.com/news/read/538317 အင်တာနက်လင့်ခ်တွင် ဖတ်ရှုနိုင်ပါသည်။

ဝယ်လက်၏ အမည်ကို ထုတ်ဖော်ပြောကြားရန်မူ Sotheby’s International ၏ ပြောရေးဆိုခွင့်ရပုဂ္ဂိုလ်က ငြင်းဆိုခဲ့သည်။
ရောင်းချသူများမှာ စီးပွားရေးလုပ်ငန်းရှင်ဖြစ်သော ဒေးဗစ်ဂါနက်ခ်နှင့် ဇနီးဖြစ်သူ ဒင်နီယယ်လီတို့ဖြစ်ပြီး ၂၀၀၅ ခုနှစ်အတွင်း ကန်ဒေါ်လာ ၁၉ ဒသမ ၁ သန်းဖြင့် ဝယ်ယူခဲ့ခြင်းဖြစ်သည်။

မစ္စက် အိုနာစစ်သည် အဆိုပါတိုက်ခန်းတွင် ၁၉၃၀ ပြည့်လွန်ကာလများအတွင်း မိဘများနှင့်အတူ နေထိုင်ခဲ့ကြောင်း မိုက်ကယ် ဂရော့စ်ရေးသားသည့် “740 Park: The Story of the World’s Richest Apartment Building” အမည်ရှိ စာအုပ်အတွင်း ရေးသားဖော်ပြထားသည်။

ယင်းအဆောက်အအုံကို မစ္စက် အိုနာစစ်၏ အဘိုးဖြစ်သူ ဂျိမ်းစ် တီ-လီက ၁၉၃၀ ပြည့်နှစ်ဝန်းကျင်တွင် ဆောက်လုပ်ခဲ့ခြင်း ဖြစ်သည်။

ဂျက်ကလင်း ကနေဒီ ငယ်စဉ်က နေထိုင်ခဲ့ဖူးသည့် အခြားနေအိမ်များ အရောင်းဈေးကွက်သို့ ရောက်ရှိလာသည့် သတင်းများကိုလည်း iMyanmarHouse.com တွင် ရေးသားဖော်ပြခဲ့ဖူးရာ ပြန်လည်ဖတ်ရှုလိုပါက (၁) http://www.imyanmarhouse.com/news/read/568400 (၂) http://www.imyanmarhouse.com/news/read/617462
အင်တာနက်လင့်ခ်များတွင် ဖတ်ရှုနိုင်ပါသည်။

Credit: iMyanmarHouse.com
(iMyanmarHouse.com Team မှ ရေးသား ဖော်ပြသည်။)