အခွန်ကြွေးကျန်ရှိပြီး လုပ်ငန်း မလုပ်တော့သည့် ကုမ္ပဏီများကို စိစစ် ပယ်ဖျက်မည်

ရန်ကုန်တိုင်းဒေသကြီး အတွင်းမှ အခွန်ပေးဆောင်ရန် ကြွေးကျန်ရှိပြီး လုပ်ငန်းလုပ်ကိုင်ခြင်း မရှိတော့သည့် ကုမ္ပဏီများကို အခွန်အကြွေးစာရင်းမှ ပယ်ဖျက်ပေးမည်ဖြစ်ကြောင်း ပြည်တွင်း အခွန်များ ဦးစီးဌာနထံမှ သိရသည်။

သက်ဆိုင်ရာ မြို့နယ် အခွန်ရုံးများက ကြွေးကျန်ရှိသည့် ကုမ္ပဏီများကို လုပ်ငန်းလုပ်ကိုင်ခြင်း အမှန်တကယ် ရှိ မရှိ စစ်ဆေး၍ ပြည်တွင်း အခွန်များ ဦးစီးဌာန ရုံးချုပ်သို့ တင်ပြရပြီး ယင်းမှတစ်ဆင့် ဝန်ကြီးရုံးသို့ တင်ပြရခြင်းဖြစ်သည်။

“ဒါပေမဲ့ ပေးဖို့ကျန်နေတဲ့သူတွေဆီကတော့ မရအရ လိုက်ကောက်နေပါတယ်။ ဒီလို လုပ်ငန်း ပိတ်သွားတယ်ဆိုတာလည်း အခွန်ကြွေးတွေ အရမ်းများပြီး ပိတ်သွားရတာတွေလည်း ရှိတယ်”ဟု ပြည်တွင်း အခွန်များ ဦးစီးဌာနမှ အကြီးတန်းအရာရှိတစ်ဦးက ပြောဆိုသည်။

နှစ်အဆက်ဆက် ပေးဆောင်ရန် ကျန်ရှိသည့် အခွန်ငွေများကို သက်ဆိုင်ရာ မြို့နယ် အခွန်ရုံးများမှတစ်ဆင့် ဆက်လက် ကောက်ခံလျက်ရှိပြီး ကြွေးကျန်ရှိသူများ အနေနှင့် မဖြစ်မနေ လာရောက် ပေးဆောင်ရမည်ဖြစ်ကာ ပေးဆောင်ခြင်း မရှိသေးသည့် အခွန်ကြွေးကျန်ရှိသူများကို အခွန် အကောက် ဥပဒေအရ အရေးယူမည်ဖြစ်ကြောင်း ယင်းဌာနက ထုတ်ပြန်ထားသည်။

ရန်ကုန်တိုင်းဒေသကြီးအတွင်း အိမ်၊ ခြံ၊ မြေနှင့် မော်တော်ယာဉ်တို့မှ ၂၀၁၆-၁၇ ဘဏ္ဍာနှစ်အတွင်းက ပေးဆောင်ရန် ကျန်ရှိသည့်အကြွေး (နှစ်သစ်ကြွေး) ကျပ် ၉၀ ဘီလီယံခန့် ကောက်ခံရရှိပြီးဖြစ်ကြောင်း ပြည်တွင်း အခွန်များဦးစီး ဌာနထံမှ သိရသည်။

Credit: The Voice