သြစတေးလျနိုင်ငံ၊ဆစ်ဒနီကမ်းခြေရှိ နေအိမ်ကြီးတစ်လုံးကို နိုင်ငံသမိုင်းတွင်အများဆုံး စံချိန်တင်ခေါ်ဈေးဖြင့် တရုတ်သန်းကြွယ်သူဌေးများထံ ဆက်သွယ်ရောင်းချလျက်ရှိ

သြစတေးလျနိုင်ငံ၊ ဆစ်ဒနီမြို့ရှိ အိမ်ခြံမြေအကျိုးဆောင်တစ်ဦးသည် သြစတေးလျတွင် ဈေးအကြီးဆုံးဖြစ်သော နေအိမ်ကြီးတစ်လုံးကိုတရုတ်သန်းကြွယ်သူဌေးများထံဆက်သွယ်ကာ
ရောင်းချလျက်ရှိကြောင်း ဟောင်ကောင်အခြေစိုက်သတင်း
ဝက်ဘ်ဆိုက်တစ်ခုတွင် ဖော်ပြသည်။

အဆိုပါနေအိမ်ကြီးသည် ဆစ်ဒနီမြို့၊ ပင်လယ်ကမ်းခြေတွင်တည်ရှိပြီး သြစတေးလျဒေါ်လာ
သန်း ၈၀ (ကန်ဒေါ်လာ ၆၁ ဒသမ ၇ သန်း) ဖြင့် ဈေးခေါ်ရောင်းချလျက်ရှိခြင်း ဖြစ်သည်။

ခြံဝန်းအကျယ်အ၀န်းမှာ ၁ ဒသမ ၇၅ ဧကရှိပြီး အိပ်ခန်း ၇ ခန်း၊ ရေချိုးခန်း ၅ ခန်း ပါဝင်သည်။
မိသားစုတစ်ခုမှ မျိုးရိုးစဉ်ဆက်ပိုင်ဆိုင်ခဲ့ခြင်းဖြစ်ပြီး
၁၈၉၁ ခုနှစ်ကတည်းက ပိုင်ဆိုင်ထားခဲ့ကြခြင်းဖြစ်ကာ အရောင်းဈေးကွက်တင်ကာ ရောင်းထုတ်နေသည်မှာ နှစ်ကာလအတန်ကြာခဲ့ပြီဖြစ်၍ယနေ့တိုင်ရောင်းမထွက်သေးခြင်း
လည်း ဖြစ်သည်။

ယင်းနေအိမ်ကြီးကို ၁၈၆၃ ခုနှစ်တွင် ဆောက်လုပ်ခဲ့ခြင်းဖြစ်ပြီး ၀ိတိုရိယဗိသုကာဟန်ဖြင့် ဆောက်လုပ်ထားခြင်းဖြစ်ကာ ဆစ်ဒနီဆိပ်ကမ်းကို ရှုမျှော်ခံစားနိုင်မည့် လသာဆောင်များစွာ ပါဝင်သည်။
ပိုင်ဆိုင်သည့်မိသားစုမှာ သြစတေးလျတွင် အကြီးမားဆုံးမီဒီယာလုပ်ငန်းပိုင်ရှင်များဖြစ်ပြီး မျိုးဆက် ၄ ဆက် ပိုင်ဆိုင်ထားခြင်း ဖြစ်သည်။

ပြီးခဲ့သော ၂၀၁၅ ခုနှစ်၊ နှစ်ကုန်ပိုင်းတွင် အဆိုပါနေအိမ်ကြီးကို ပြန်လည်ပြုပြင်မွမ်းမံရန်အတွက်
လျှောက်ထားခဲ့ရာ သြစတေးလျ နိုင်ငံခြားရင်းနှီးမြှုပ်နှံမှု သုံးသပ်ရေးဘုတ်အဖွဲ့ (FIRB) က အတည်ပြုပေးခဲ့ခြင်း ဖြစ်သည်။

ယင်းသို့မွမ်းမံခြင်းအားဖြင့် နိုင်ငံခြားဝယ်လက်များသို့ ရောင်းချနိုင်မည့်အလားအလာများရှိကြောင်းသုံးသပ်ကာ FIRB က အတည်ပြုခဲ့ခြင်းလည်း ဖြစ်သည်။

FIRB ၏ ထုတ်ပြန်ချက်အရ တရုတ်ရင်းနှီးမြှုပ်နှံသူတို့သည် သြစတေးလျ အိမ်ခြံမြေကဏ္ဍတွင် ၂၀၁၄ ခုနှစ်၊ ဇွန်လမှ ၂၀၁၅ ခုနှစ် ဇွန်လအကြား ကန်ဒေါ်လာ ၁၈ ဒသမ ၅ ဘီလီယံခန့်အထိ ရင်းနှီးမြှုပ်နှံခဲ့ကြကြောင်း ထုတ်ပြန်ထားသည်။

ယခုခေါ်ဈေးဖြင့်သာ ရောင်းထွက်မည်ဆိုပါက သြစတေးလျတွင် ဈေးအကြီးဆုံးနေအိမ်အဖြစ် စံချိန်တင်မည် ဖြစ်သည်။

လက်ရှိစံချိန်တင်ထားသည်မှာ ၂၀၁၅ ခုနှစ်အတွင်း စီးပွားရေးလုပ်ငန်းရှင် ရှိုချက်ခ်ဝင်းက ဆစ်ဒနီရှိနေအိမ်ကြီးတစ်လုံးကို သြစတေးလျဒေါ်လာ
သန်း ၇၀ (ကန်ဒေါ်လာ ၅၄ သန်း) ဖြင့် ၀ယ်ယူထားမှုပင် ဖြစ်လေသည်။

Credit: iMyanmarHouse.com
(iMyanmarHouse.com Team မှ ရေးသား ဖော်ပြသည်။)