ဧရာဝတီတိုင်းဒေသကြီးရှိ ပညာရေးဆိုင်ရာ အဆောက်အအုံများ အပါအဝင် တင်ဒါ အောင်မြင်ပြီး လုပ်ငန်း အပ်နှံခံရသော ကုမ္ပဏီများ အနေနှင့် အဆောက်အအုံများ ဆောက်လုပ်ရာတွင် စာချုပ်ပါ စည်းကမ်းချက်များကို မလိုက်နာပါက ချက်ချင်း အရေးယူမည် ဖြစ်ကြောင်း ဧရာဝတီတိုင်းဒေသကြီး လူမှုရေးဝန်ကြီး ဒေါက်တာလှမြတ်သွေးက ပြောကြားသည်။
စက်တင်ဘာ ၆ ရက်နေ့က ကျင်းပသော တိုင်းဒေသကြီး လွှတ်တော် ဒုတိယ ပုံမှန် အစည်းအဝေး၊ ဒုတိယနေ့တွင် ဝါးခယ်မမြို့နယ်၊ မဲဆန္ဒနယ် အမှတ်(၂)မှ ဒေါ်မြင့်မြင့်စန်း မေးမြန်းသည့် ဝါးခယ်မမြို့နယ်တွင် ဆောင်ရွက်ခဲ့သော တည်ဆောက်ရေး လုပ်ငန်းများမှ တင်ဒါအောင် ဆောက်လုပ်ခွင့်ရ ကုမ္ပဏီများ၏ လုပ်ငန်း ဆောင်ရွက်မှုနှင့် ပတ်သက်သည့် အခြေအနေကို သိရှိ လိုကြောင်းကို ဝန်ကြီးက အထက်ပါအတိုင်း ဖြေကြားခဲ့ခြင်း ဖြစ်သည်။
၂ဝ၁၆-၂ဝ၁၇၊ ၂ဝ၁၇-၂ဝ၁၈ ဘဏ္ဍာနှစ်များတွင် တင်သွင်းထားသော တင်ဒါများ၊ လေလံ အောင်ထားသည့် ကုမ္ပဏီများကို သက်ဆိုင်ရာ လွှတ်တော်ကိုယ်စားလှယ်များက ဒေသခံ ပြည်သူများနှင့် ပူးပေါင်း စောင့်ကြည့် စိစစ်ရန်လိုကြောင်း၊ ယခင် အခြေအနေအတိုင်း ဖြစ်လာမည် ဆိုပါက တိုင်းဒေသကြီး အစိုးရအဖွဲ့ရှိ တည်ဆောက်ရေးနှင့် စိစစ်ရေး ကော်မတီထံလည်းကောင်း၊ သက်ဆိုင်ရာ ဝန်ကြီးနှင့် ဌာနဆိုင်ရာများသို့လည်းကောင်း ချက်ချင်း အကြောင်း ကြားပေးစေလိုကြောင်း၊ စာချုပ်ပါ စည်းကမ်းချက်များအတိုင်း အချိန်နှင့် တစ်ပြေးညီ အရေးယူ ဆောင်ရွက်မည်ဖြစ်ကြောင်း ဧရာဝတီတိုင်းဒေသကြီး လူမှုရေးဝန်ကြီး ဒေါက်တာ လှမြတ်သွေးက ပြောကြားသည်။
လာမည့်နှစ်တွင် ပညာရေးဌာနမှ ဆောက်လုပ်မည့် အဆောက်အအုံများအတွက် တင်ဒါခေါ်ယူခဲ့ရာ လျှောက်ထားသော ကုမ္ပဏီ ၂ဝဝ ကျော် ရှိကြောင်း၊ ယင်း ကုမ္ပဏီများ၏ စာရင်းကို ပြုစုပြီးပါက လွှတ်တော်ကိုယ်စားလှယ်များထံ ဖြန့်ဝေပေးမည်ဖြစ်ပြီး ကုမ္ပဏီများက မိမိတို့ ဒေသတွင် အရည်အချင်းရှိရှိနှင့် ပြည့်ပြည့်ဝဝ ဆောင်ရွက်ခဲ့သော ကုမ္ပဏီ ဟုတ်၊ မဟုတ်၊ အမည်ပျက်စာရင်း သွင်းထားခံရပြီး အမည်သစ်ဖြင့် ပြန်လည် လျှောက်ထားသည့် ကုမ္ပဏီ ဟုတ်၊ မဟုတ် စစ်ဆေး ပေးစေလိုကြောင်း ၎င်းက ပြောဆိုသည်။
ဝါးခယ်မမြို့နယ်ရှိ စာသင်ကျောင်းသစ်များ ဆောက်လုပ်ရန်အတွက် ၂ဝ၁၃-၂ဝ၁၄ ဘဏ္ဍာရေးနှစ်တွင် ၁၃ကျောင်း၊ ၂ဝ၁၄-၁၅ ဘဏ္ဍာရေး နှစ်တွင် ၄ ကျောင်းကို ရွှေဇင်ယော် ကုမ္ပဏီ တစ်ခုတည်းကိုသာ ဆောက်လုပ်ခွင့်ပြုခဲ့သဖြင့် လာမည့် ဆောက်လုပ်ရေး ကိစ္စရပ်များတွင် ကုမ္ပဏီ တစ်ခုတည်းကို ဒေသတစ်ခုတည်းအတွက် ချထားပေးခြင်းမျိုးကို စဉ်းစားပေးရန် လိုအပ်ကြောင်း ဝါးခယ်မမြို့နယ်၊ တိုင်းဒေသကြီး လွှတ်တော်ကိုယ်စားလှယ် ဒေါ်မြင့်မြင့်စန်းက အကြံပြုသည်။
အခြေခံပညာ ကျောင်းများကို စာသင်ဆောင် လိုအပ်ချက်၊ ပြင်ဆင် ထိန်းသိမ်းရန် လိုအပ်ချက်များအရ ပြုပြင် တိုးချဲ့ ဆောက်လုပ်ခြင်း၊ အသစ် ဆောက်လုပ်ခြင်းများ အပါအဝင် တိုင်းဒေသကြီးအတွင်း ဒေသဖွံ့ဖြိုးရေးအတွက် လုပ်ငန်းများ ဆောင်ရွက်ရန် ဘဏ္ဍာရန်ပုံငွေများ ချထားပေးနေကြောင်း၊ ဆောက်လုပ်ခွင့် ရသော ကုမ္ပဏီများ၊ ကန်ထရိုက်များက လွှတ်တော်ကိုယ်စားလှယ်များ၊ ကျောင်း အကျိုးတော်ဆောင်များနှင့် ရပ်မိရပ်ဖများက စိတ်ဝင်တစား လာရောက်ကြည့်ရှု မေးမြန်းကြသည်ကို လိုလား နှစ်သက်မှု မရှိကြကြောင်း တိုင်းဒေသကြီး လွှတ်တော်ကိုယ်စားလှယ်များက ပြောကြားသည်။
ယင်းသို့ ကြည့်ရှုရာတွင် တာဝန်ယူ တာဝန်ခံနိုင်သူများကို မတွေ့ရဘဲ အလုပ်သမား ခေါင်းဆောင်များနှင့်သာ တွေ့ရပြီး အဆောက်အအုံပုံစံ၊ အသုံးပြုမည့် ပစ္စည်း၊ ဆောက်လုပ်မည့် နည်းပညာပိုင်းများကို ပွင့်လင်း မြင်သာစွာ မရှင်းပြနိုင်ကြောင်း၊ ယင်းအပြင် အဆောက်အအုံ ရုပ်လုံး မပေါ်မီ အက်ကြောင်း ပေါ်လာခြင်း၊ အရည်အသွေး မမှန်သော ပစ္စည်းများ တပ်ဆင် အသုံးပြုခြင်း၊ အချို့ အဆောက်အအုံများမှာ သတ်မှတ် ကာလအတွင်း မပြီးစီးသည်ကို တွေ့ရကြောင်း၊ အရည်အသွေး မပြည့်မီခြင်း၊ ဘဏ္ဍာငွေနှင့် မကိုက်ညီသော အဆောက်အအုံများကို မြင်တွေ့ရသောကြောင့် စာရင်းစစ်ရုံးများ အနေနှင့် တည်ဆောက်ရေး လုပ်ငန်းများကို ကွင်းဆင်းပြီး တိကျစွာ စစ်ဆေးသင့်ကြောင်း လွှတ်တော်ကိုယ်စားလှယ်များက ပြောဆိုသည်။
Credit: The Voice
