အီရတ်၏ ဒုတိယအကြီးဆုံးမြို့တော်တွင် ဒူဘိုင်းရှိလက်ရှိကမ္ဘာ့အမြင့်ဆုံးအဆောက်အအုံထက်ပိုမိုမြင့်မားမည့် အဆောက်အအုံကြီး ဆောက်လုပ်ရန် စီစဉ်

အီရတ်နိုင်ငံ၏ ဒုတိယအကြီးဆုံးမြို့တော် ဘာဆရာတွင် ဒူဘိုင်းရှိလက်ရှိကမ္ဘာ့အမြင့်ဆုံးအဆောက်အအုံ ဘာ့ဂ်ျခါလီဖာထက် ပိုမိုမြင့်မားမည့် အဆောက်အအုံကြီးကြီးတစ်ခု ဆောက်လုပ်ရန် ဘာဆရာမြို့အုပ်ချုပ်ရေးအဖွဲ့က စီစဉ်လျက်ရှိကြောင်း အရှေ့အလယ်ပိုင်းအခြေစိုက် အိမ်ခြံမြေသတင်းဝက်ဘ်ဆိုက်တစ်ခုတွင် ဖော်ပြသည်။

ဘာဆရာသည် အစ္စလာမ်တို့၏သမိုင်းတွင် အရေးပါသော အခန်းကဏ္ဍမှ ပါဝင်ခဲ့ပြီး သင်္ဘောသားဆင်းဘတ်၏ သမိုင်းဝင်နေရာဖြစ်သည့်အပြင် ကျမ်းစာအရ ဧဒင်ဥယျာဉ်တည်ရှိသည့် နေရာလည်း ဖြစ်သည်ဟု ဆိုသည်။ယခုအခါ ဘာဆရာမြို့တွင် လက်ရှိကမ္ဘာ့အမြင့်ဆုံးအဆောက်အအုံထက် ပိုမိုမြင့်မားမည့်အဆောက်အအုံကြီးတစ်ခုဆောက်လုပ်ရန် ဘာဆရာမြို့အာဏာပိုင်တို့က စီစဉ်လျက်ရှိကြသည်။

လက်ရှိကမ္ဘာ့အမြင့်ဆုံးအဆောက်အအုံမှာ ဒူဘိုင်းရှိ ဘာ့ဂ်ျခါလီဖာ အဆောက်အအုံဖြစ်ပြီး ၈၂၈ မီတာမြင့်မားသည်။
ဆော်ဒီအာရေးဘီးယားနိုင်ငံ၊ ဂျက်ဒါတွင် ဆောက်လုပ်ဆဲဖြစ်သည့် ကင်းဒမ်းတာဝါမှာ မီတာ ၁၀၀၀ အမြင့်ရှိမည်ဖြစ်သည်။

ဘာဆရာမြို့တွင် ဆောက်လုပ်ရန် ရည်ရွယ်ထားသည့် မိုးမျှော်အဆောက်အအုံကြီးကို The Bride ဟု အမည်ပေးထားပြီး ၁၁၅၂ မီတာ အမြင့်ဆောက်လုပ်ရန် ရည်မှန်းထားရာ ဒူဘိုင်းနှင့် ဆော်ဒီတို့ထက် ပိုမိုမြင့်မားသည့် အဆောက်အအုံကြီး ဖြစ်လာမည် ဖြစ်သည်။
ယင်းအဆောက်အအုံကြီး၏ စီမံကိန်းမန်နေဂျာမှာ ဗြိတိသျှ ဗိသုကာအဖွဲ့ AMBS မှ ဒါရိုက်တာတစ်ဦးဖြစ်သူ မားကို့စ် ဒီ အင်ဒရေဖြစ်သည်။

ဘာဆရာမြို့အုပ်ချုပ်ရေးအဖွဲ့သည် ဘာဆရာမြို့ကို ၂၀၂၅ ခုနှစ်တွင် ကမ္ဘာ့နံပါတ်တစ် ဒေါင်လိုက်မြို့တော် world’s first vertical city ဖြစ်လာစေရန် ရည်မှန်းထားသည်။
The Bride အဆောက်အအုံကြီးတွင် မျှော်စင် ၄ ခု ပါဝင်မည်ဖြစ်ပြီး မျှော်စင်တို့၏ အမြင့်မှာ ၁၁၅၂ မီတာ၊ ၇၂၄ မီတာ၊ ၄၈၄ မီတာနှင့် ၆၁ မီတာ အသီးသီးရှိမည်ဖြစ်ပြီး မိုးမျှော်ဥယျာဉ်များဖြင့် ဆက်သွယ်ထားမည် ဖြစ်သည်။
မြေနေရာအကျယ်အ၀န်း ၁၅၅၀၀၀၀ စတုရန်းမီတာပေါ်တွင် ဆောက်လုပ်မည်ဖြစ်ပြီး လူနေခန်းများ၊ စာသင်ကျောင်းနှင့် ဈေးဝယ်စင်တာများ ပါဝင်မည်ဖြစ်သည်။

Credit: iMyanmarHouse.com
(iMyanmarHouse.com Team မှ ရေးသား ဖော်ပြသည်။)