အိမ်ခြံမြေ ဈေးကစားတာတွေမရှိတော့လို့ ဈေးကွက်အေး

အိမ်ခြံမြေဈေးကွက်က တချို့နေရာတွေ အရောင်းအဝယ်ပြန်ရှိနေပေမဲ့ ပြန်ရောင်းရင် အထွက်ခက်တာ ၊ ဝယ်ထားတဲ့ဈေး ပြန်မရနိုင်မှာ စိုးတာတွေ ဈေးကွက်အေးနေတယ်လို့ သိရတယ် ။

ဝယ်ချင်သူတွေအကြိုက် ဈေးကွက်ဖြစ်နေပေမဲ့ အရင်ကလို ဈေးကစားဖို့ ဝယ်ယူမှုတွေမရှိတော့တာကြောင့် ဈေးကွက်က အေးနေတယ် ယူဆနေကြတာလို့ အကျိုးဆောင်တချို့က ပြောပါတယ် ။ အိမ်ခြံမြေဈေးကွက်က အရောင်းအဝယ်တစ်ခုတည်းမဟုတ်ဘဲ အငှား ၊ အပေါင်စတဲ့ဈေးကွက်တွေပါ ပါဝင်နေတာကြောင့် ဈေးကွက်တစ်ခုအေးနေရင် တစ်ခုကလည်ပတ်နေသေးတာကြောင့် အိမ်ခြံမြေဈေးကွက်က မရပ်တာဖြစ်တယ်လို့လည်း အကျိုးဆောင်တချို့က ပြောပါတယ် ။

‘အခုဈေးကွက်ထဲမှာက ကြည့်တဲ့သူတွေပဲများတယ် ၊ အဝယ်နည်းနေတာ ၊ အငှားဈေးကွက်ကတော့ အမြဲရှိပါတယ် ၊ ဈေးကစားပြီး ပွဲဖြစ်ခဲ့တဲ့အချိန်ကလို အရောင်းအဝယ်ပြန်ဖြစ်ဖို့ကတော့ စောင့်ဆိုင်းရဦးမှာ ၊ လက်ရှိမှာတော့ ဈေးလျော့ရောင်းတာမျိုးရှိတယ်ဆိုတာက ဆက်မကိုင်ထားနိုင်သူတွေပါ ၊ တကယ်နေရာကောင်းပြီး မြို့ထဲပိုင်းတွေလို နေရာတွေမှာ ဈေးလျော့ရောင်းတာတွေ မရှိပါဘူး’ လို့ ဝါရင့်အကျိုးဆောင် ဦးမောင်မောင်က ဈေးကွက်အခြေအနေကို ပြောပါတယ် ။

ဈေးကွက်ထဲမှာ ဝယ်မယ်ဆိုရင် ဝယ်သူတွေအနေနဲ့ ကိုယ်ဝယ်ထားပြီး ပြန်ရောင်းမထုတ်သေးဘဲ ထားနိုင်တာမျိုးမှ အဆင်ပြေနိုင်မယ် ။ ပြန်ရောင်းလို့လည်းလွယ်ကူမယ် ၊ လူကြိုက်များတဲ့နေရာမျိုးတွေကို ရွှေးဝယ်သင့်တယ် ။ အခုချိန်မှာ ဝယ်သူတွေအတွက် စိတ်ကြိုက်ဈေးနဲ့ ညှိနှိုင်းပြီး ရွှေးလို့ရနေတာကြောင့် ဝယ်ထားသင့်တာပါ ။ တချို့တွေကတော့ ပြန်ရောင်းထုတ်ရင် ခက်တဲ့လက်ရှိဈေးကွက်ကိုပဲကြည့်ပြီး မဝယ်ရဲကြသေးတာလို့ အကျိုးဆောင်တချို့က ပြောပါတယ် ။
ဝယ်ရောင်းအကျိုးဆောင် ဦးဝင်းနိုင်က ‘အိမ်ခြံမြေ ဈေးကွက်က အခုလိုဈေးကွက်အေးတာမျိုးက အရင်ကလဲ ကြုံခဲ့ဖူးကြတာပဲ ၊ နောက်ပိုင်းပြန်ကောင်းလာတာပဲလေ ၊ အိမ်ခြံမြေက ဝယ်ထားရင် မှားတယ်ဆိုတာမျိုးမရှိပါဘူး ၊ မြေဝယ်မကျဆိုတဲ့ စကားလက်ကိုင်ခဲ့ကြတာပဲ ၊ အခုလိုအချိန်က နေရာကောင်းတွေ သိမ်းလို့ကောင်းတဲ့အချိန်ပဲ’လို့ ပြောပါတယ် ။

လက်ရှိမှာ ရင်းနှီးမျြုပ်နှံဖို့ ဝယ်ယူမယ်ဆို အလားအလာကောင်းတာက တိုက်ခန်းတွေနဲ့ ကွန်ဒိုတွေဖြစ်တယ် ။ ပြန်မရောင်းနိုင်သေးလည်း အငှားထားရင် ဈေးကောင်းရတာကြောင့် တွက်ခြေကိုက်တဲ့ ရင်းနှီးမှုတစ်ခု ဖြစ်တယ်လို့ ပြောပါတယ် ။


Credit: The Kumudra