BREXIT ကြောင့် ဗြိတိန်၌ ဆုံးရှုံးမှုများဖြစ်နေချိန်တွင် ဟောင်ကောင်သူကြွယ်က လန်ဒန်ရှိ ဟိုတယ်တစ်လုံးကို ကန်ဒေါ်လာ ၉၂ သန်းကျော်ဖြင့် ၀ယ်ယူ

ဥရောပသမဂ္ဂမှ ဗြိတိန်နှုတ်ထွက်လိုက်ခြင်းဖြစ်ရပ် BREXIT ကြောင့် ဗြိတိန်အိမ်ခြံမြေနှင့် စီးပွားရေးလောကတို့၌ ဆုံးရှုံးမှုများ ဖြစ်နေချိန်တွင် ဟောင်ကောင်သူကြွယ်က လန်ဒန်ရှိ ဟိုတယ်တစ်လုံးကို စတာလင်ပေါင် ၇၀၃၀၀၀၀၀ (ကန်ဒေါ်လာ ၉၂ ဒသမ ၉သန်း) ဖြင့် ၀ယ်ယူလိုက်ကြောင်း ရှန်ဟိုင်းအခြေစိုက် အိမ်ခြံမြေသတင်းဝက်ဘ်ဆိုက်တစ်ခုတွင် ဖော်ပြသည်။

အဆိုပါအရောင်းအ၀ယ်မှာ ဗြိတိန်၏မြို့တော်တွင် အိမ်ခြံမြေဈေးကွက် အလားအလာပြန်လည်ကောင်းမွန်လာဖွယ်ရှိကြောင်း မျှော်လင့်ရသည့် ခြေလှမ်းတစ်ရပ်လည်း ဖြစ်သည်။
ဟိုတယ်တည်နေရာမှာ လန်ဒန်မြို့၊ ကင်းစ်ခရော့စ်လမ်း၊ အမှတ် ၁၀၀ တွင်တည်ရှိပြီး ၆ ထပ်အဆောက်အအုံဖြစ်ကာ အခန်းပေါင်း ၄၀၈ ခန်း ပါဝင်၍ ဟိုတယ်အမည်မှာ Travelodge Royal Scot ဟိုတယ် ဖြစ်သည်။
ယင်းဟိုတယ်ကို ကုမ္ပဏီ ၃ ခုမှ ပူးပေါင်းဝယ်ယူလိုက်ခြင်းဖြစ်ပြီး Magnificent Hotel Investments ၊ Shun Ho Technology Holdings နှင့် Shun Ho Resources Holdings ကုမ္ပဏီများ ဖြစ်ကြကာ စတုရန်းတစ်ပေလျှင် ၅၉၁ ဒေါ်လာဈေးဖြင့် ၀ယ်ယူလိုက်ကြခြင်း ဖြစ်သည်။
အဆိုပါကုမ္ပဏီ ၃ ခုစလုံးမှာ ဟောင်ကောင်အိမ်ခြံမြေလုပ်ငန်းရှင် သန်းကြွယ်သူဌေးကြီး ၀ီလျံချန်းကိုင်မန်း ပိုင်ဆိုင်သော ကုမ္ပဏီများ ဖြစ်ကြသည်။
တရုတ်ရင်းနှီးမြှုပ်နှံသူတို့သည် ဟိုတယ်လုပ်ငန်းကဏ္ဍတွင် ရင်းနှီးမြှုပ်နှံရန်အတွက် မကြာသေးမီလများအတွင်း စိတ်ဝင်စားလာကြသည်။
BREXIT ကြောင့် ဗြိတိန်အိမ်ခြံမြေကဏ္ဍ ပြိုလဲလိမ့်မည်ဟူသည့် ခန့်မှန်းချက်များ ထွက်ပေါ်နေချိန်တွင် ၀ီလျံချန်း၏ ရင်းနှီးမြှုပ်နှံမှု ခြေလှမ်းမှာမူ သမိုင်းမှတ်တိုင်တစ်ခု ဖြစ်လာခဲ့သည်။
ဗြိတိန်ခရီးသွားလုပ်ငန်း ဆက်လက်ဖွံ့ဖြိုးနေမည်ဟူသော မှန်းဆချက်ဖြင့် အဆိုပါဟိုတယ်ကို ၀ယ်ယူလိုက်ကြခြင်း ဖြစ်သည်။
ဝီလျံချန်းသည် ဟောင်ကောင်နှင့် ရှန်ဟိုင်းတို့တွင် ဟိုတယ်များပိုင်ဆိုင်ထားပြီး ဟိုတယ်ခန်းပေါင်း ၂၃၀၀ ကျော် လည်ပတ်လုပ်ကိုင် နေသူတစ်ဦး ဖြစ်သည်။

Credit: iMyanmarHouse.com
(iMyanmarHouse.com Team မှ ရေးသား ဖော်ပြသည်။)