ဆော်ဒီတွင် ကန်ဒေါ်လာ ၁ ဘီလီယံကျော် အကုန်အကျခံတည်ဆောက်မည့် လူနေအိမ်ရာစီမံကိန်းသစ် စတင်ဆောက်လုပ်

ဆော်ဒီအာရေးဗီးယားအစိုးရသည် လူနေအိမ်သစ်ပေါင်း ၇၀၀၀ ကို ကန်ဒေါ်လာ ၁ ဒသမ ၁၉ ဘီလီယံအကုန်အကျခံ၍ တည်ဆောက်မည့် စီမံကိန်းသစ်ကို စတင်ဆောက်လုပ်တော့မည်ဖြစ်ကြောင်း အရှေ့အလယ်ပိုင်းအခြေစိုက် အိမ်ခြံမြေသတင်းဝက်ဘ်ဆိုက်တစ်ခုတွင် ဖော်ပြသည်။

ယင်းအိမ်ရာစီမံကိန်းကို ရီယာ့ဒ်မြို့အရှေ့ဘက် အကျယ်အ၀န်း စတုရန်းမီတာ ၆ ဒသမ ၅ သန်း ကျယ်ဝန်းသော မြေနေရာပေါ်တွင် တည်ဆောက်သွားမည် ဖြစ်သည်။

အဆိုပါအိမ်ရာကို “ပုပ္ဗမုဒ်” East Gate ဟု အမည်ပေးထားပြီး အိုးအိမ်ဝန်ကြီးဌာနနှင့် ပုဂ္ဂလိကတို့ ပထမဆုံးအကြိမ် ပူးပေါင်းတည်ဆောက်သည့် စီမံကိန်းဖြစ်ကာ နိုင်ငံသားများအတွက် တန်ဖိုးမျှတလူနေအိမ်များ ရှားပါးလာမှုကို ဖြေရှင်းပေးနိုင်ရန် ရည်ရွယ်တည်ဆောက်ခြင်းဖြစ်သည်ဟု ဆိုသည်။
နေအိမ်တစ်လုံးလျှင် ကန်ဒေါ်လာ ၁၇၀၅၇၈ ခန့်ကျသင့်မည်ဖြစ်ပြီး အကျယ်အ၀န်း ၃၁၆ စတုရန်းမီတာ ကျယ်ဝန်းမည်ဖြစ်သည်။

ဆော်ဒီအာရေးဗီးယားပြည်ထဲရေးဝန်ကြီးဌာနအဆောက်အအုံအနီးတွင် တည်ရှိသည့် ယင်းစီမံကိန်းကို အမေရိကန် ကုမ္ပဏီတစ်ခုမှ ကွပ်ကဲဆောက်လုပ်မည်ဖြစ်ကြောင်း ဆော်ဒီအခြေစိုက် ဟာမက်နှင့် အာမက်မိုဟာမက် အယ်လ် မူဇိုင်းနီအိမ်ခြံမြေကုမ္ပဏီက ပြောကြားသည်။

“နေအိမ်တွေမှာ အတွင်း၊ အပြင်ဒီဇိုင်းအမျိုးမျိုးရှိမှာ ဖြစ်ပါတယ်။ ၀ယ်လက်တွေရဲ့ အကြိုက်နဲ့ ကျသင့်တဲ့တန်ဖိုးအပေါ်မှာ မူတည်တယ်”ဟု အိမ်ခြံမြေကုမ္ပဏီ၏ ဘုတ်အဖွဲ့ဥက္ကဌဖြစ်သူ ဟာမက် မူဇိုင်းနီက ပြောကြားသည်။

ဝယ်လက်တို့အနေဖြင့် ဆော်ဒီအစိုးရ၏ အိမ်ခြံမြေဖွံ့ဖြိုးရေးရန်ပုံငွေ (REDF) မှ ချေးငွေများ ထုတ်ယူနိုင်မည်ဖြစ်ပြီး ကန်ဒေါ်လာ ၁၃၃၂၆၄ ခန့်အထိ ချေးငွေထုတ်ယူနိုင်ဖွယ်ရှိသည်ဟုလည်း ၎င်းက ဆက်လက်ပြောကြားသည်။

REDF ကို ဆော်ဒီအစိုးရက ၁၉၇၄ ခုနှစ်တွင် တည်ထောင်ခဲ့ပြီး ဆော်ဒီနိုင်ငံသားတို့ လူနေမှုအဆင့်အတန်းမြင့်မားစေရန်နှင့် နေအိမ်များ အရည်အသွေးတိုးတက်ကောင်းမွန်စေရန် ရည်ရွယ်ခြင်း ဖြစ်သည်။

Credit: iMyanmarHouse.com
(iMyanmarHouse.com Team မှ ရေးသား ဖော်ပြသည်။)