တရားမျှတမှုမရှိသော အခွန်မူဝါဒကို ဖျက်သိမ်းပေးရန် ဗီယက်နမ်အိမ်ခြံမြေလုပ်ငန်းရှင်များလိုလား

ဗီယက်နမ် အိမ်ခြံမြေဈေးကွက် သည် ပြန်လည်ဦးမော့ လာပြီဖြစ်သောကြောင့် အမြတ်အစွန်းများ ရရှိလာကြပြီဖြစ်သော်လည်း အိမ်ခြံမြေကဏ္ဍတစ်ခု တည်းအပေါ် ဦးတည်ထားသည့် အကောက်ခွန်စည်းမျဉ်းကို ဖျက်သိမ်းပေးစေရန်လိုလား လျက်ရှိကြပြီး ယင်းစည်းမျဉ်းမှာ တရားမျှတမှုမရှိသည့်အပြင် ခွဲခြားဆက်ဆံမှုတစ်ရပ် လည်း ဖြစ်ကြောင်းပြောကြားကြသည်ဟု ဟနွိုင်းအခြေစိုက် အိမ်ခြံမြေသတင်း ၀က်ဘ်ဆိုက်တစ်ခုတွင် ဖော်ပြသည်။

အိမ်ခြံမြေကဏ္ဍမှ အမြတ်အစွန်းများကို အခြားအရှုံးပေါ်သည့် လုပ်ငန်းများတွင် ခုနှိမ်ခြင်းမပြုရန် တားမြစ်ထားခြင်းအပေါ် အိမ်ခြံမြေလုပ်ငန်းရှင်များ ကကန့်ကွက်ကြခြင်းဖြစ်သည်။
ယင်းသို့ပြဌာန်းခြင်းမှာ အိမ်ခြံမြေလုပ်ငန်းတစ်ခုတည်း ကိုသာတားမြစ်ပိတ်ပင်ထားခြင်း ဖြစ်သောကြောင့် ခွဲခြားဆက်ဆံမှုအဖြစ် ရှုမြင်ကြသည်။

ဗီယက်နမ်တွင် အချို့ အိမ်ခြံမြေလုပ်ငန်းရှင်များသည် အမြတ်အစွန်းများစွာ ရရှိသော်လည်း အခွန်ပေးဆောင်မှု နည်းပါးလှသောကြောင့် ၂၀၀၄ ခုနှစ်အတွင်းက အဆိုပါဥပဒေကို ပြဌာန်းခဲ့ခြင်းဖြစ်သည်။ မူလကအခြားစီးပွား လုပ်ငန်းများမှ အမြတ်အစွန်းများကိုအိမ်ခြံမြေကဏ္ဍတွင် ခုနှိမ်ခြင်းမပြုရန်တားမြစ်ခဲ့သော်လည်း ၂၀၁၄ ခုနှစ်အတွင်းယင်းစည်းမျဉ်းကိုဖျက်သိမ်းခဲ့သည်။

ယခုနောက်ပိုင်းအိမ်ခြံမြေလောကတွင် ပြိုင်ဆိုင်မှု အလွန်ပြင်းထန်လာသောကြောင့် ယခင်ကကဲ့သို့ အမြတ်အစွန်းရသည့်လုပ်ငန်းအလွန်နည်းပါးသွားပြီဖြစ်ကြောင်းဗီယက်နမ်စီးပွားရေးပညာရှင် ဒင်သီဟိုင်ယန် ကပြောကြားပြီးယင်းစည်းမျဉ်းကိုဖျက်သိမ်းပေးရန် ဗီယက်နမ်အစိုးရကိုတိုက်တွန်းခဲ့သည်။

အခြားကဏ္ဍများတွင် စီးပွားရေးလုပ်ငန်းတစ်ခုမှ အမြတ်အစွန်းကိုအခြားအရှုံးပေါ်သည့်လုပ်ငန်းတွင် ခုနှိမ်နိုင်သော်လည်းအိမ်ခြံမြေကဏ္ဍတစ်ခုတည်းအပေါ် တားမြစ်ထားသည့် အဆိုပါစည်းမျဉ်းမှာ တရားမျှတမှုမရှိ သည့်အပြင် ကျိုးကြောင်းဆီလျော်မှုလည်း မရှိကြောင်း ဗီယက်နမ် အမျိုးသားအိမ်ခြံမြေအသင်းဥက္ကဌ ငုယင်ထရန်နမ်ကပြောကြားသည်။

ဗီယက်နမ်တွင် အိမ်ခြံမြေဈေးကွက် ပြန်လည်ဦးမော့ လာမှုနှင့်အတူအိမ်ခြံမြေကုမ္ပဏီ ၅၅ ခု၏ ယခင်နှစ် ဘဏ္ဍာငွေမှာဗီယက်နမ်ငွေ
၆၁ ဒသမ ၇၅ ထရီလီယံ (ကန်ဒေါ်လာ ၂ ဒသမ ၇၃ ဘီလီယံ) အထိရှိခဲ့ပြီး ၂၀၁၄ ခုနှစ်ထက် ၂၅ ရာခိုင်နှုန်း မြင့်တက်လာခဲ့သည်။
အသားတင်အမြတ်အစွန်းမှာဗီယက်နမ်ငွေ ၆ ဒသမ ၇၉ ထရီလီယံ (ကန်ဒေါ်လာ ၃၀၀ ဒသမ ၂ သန်း) အထိရှိခဲ့သည်။


Credit: iMyanmarHouse.com
(iMyanmarHouse.com Team မှ ရေးသား ဖော်ပြသည်။)