တတိယအကြိမ်မြောက်ဆောက်လုပ်ရေးပစ္စည်းပြပွဲ(ရန်ကုန်)သို့ ကမ္ဘာတစ်ဝန်းမှ လုပ်ငန်းရှင်များလာရောက်ကြမည်

တတိယအကြိမ်မြောက်ဆောက်လုပ်ရေးပစ္စည်းပြပွဲ(ရန်ကုန်) BuildTech Yangon 2016 ကိုမြန်မာကွန်ဗန်းရှင်းစင်တာတွင် လာမည့် မေ ၂၆ မှ ၂၈ အထိကျင်းပမည်ဖြစ်ရာဗီယက်နမ်လုပ်ငန်းရှင် အများအပြားတက်ရောက်ကြမည်ဖြစ်ကြောင်းဟနွိုင်းအခြေစိုက် သတင်းဝက်ဘ်ဆိုက်တစ်ခုတွင် ဖော်ပြသည်။

BuildTech Yangon 2016 ပြပွဲသို့ သြစတေးလျ၊ တရုတ်၊ အင်ဒိုနီးရှား၊ ကိုရီးယား၊ ထိုင်း၊ ဗီယက်နမ်၊ စင်္ကာပူနှင့် အိမ်ရှင် မြန်မာနိုင်ငံတို့ အပါအ၀င် ကမ္ဘာ့နိုင်ငံအများအပြားမှ ကုမ္ပဏီပေါင်း ၁၂၀ ကျော် ၀င်ရောက်ပြသကြမည် ဖြစ်သည်။

အဆိုပါပြပွဲတွင် ဆောက်လုပ်ရေးစက်ယန္တရားများ၊ mechanical engineeringဆိုင်ရာများ၊ interior finishing နှင့် ဗိသုကာဆိုင်ရာထုတ်ကုန်များ ပြသသွားမည် ဖြစ်သည်။
မြန်မာစီးပွားရေးသည် ကမ္ဘာနှင့်ထိတွေ့လာပြီးနောက်ပိုင်း မြန်မာအိမ်ခြံမြေကဏ္ဍ ဦးမော့လာလျက်ရှိသောလက်ရှိအခြေအနေများအရ ပြပွဲကျင်းပရခြင်းဖြစ်သည်ဟုဆိုသည်။

သို့ရာတွင် မြန်မာနိုင်ငံ၏ ဆောက်လုပ်ရေးကဏ္ဍတွင် လုပ်ငန်းခွင်အန္တရာယ်ကင်းရှင်းမှုမှာ များစွာစောင့်ကြည့်ခံရလျက်ရှိသောအကြောင်းရပ်ဖြစ်နေရာယခုနှစ် BuildTech Yangon ပြပွဲအတွက် စိန်ခေါ်မှုတစ်ရပ်ဖြစ်နေသည်။ အခြေခံအဆောက်အအုံ ဆောက်လုပ်ရေးကဏ္ဍ သည် မြန်မာနိုင်ငံ၏ ဆောက်လုပ်ရေးနယ်ပယ်တွင် ဒုတိယအကြီးမားဆုံးဈေးကွက်ဖြစ်ပြီးကန်ဒေါ်လာ ၇၆၅ သန်းခန့် တန်ကြေးရှိသည်။

မြန်မာအစိုးရသည် အခြေခံအဆောက်အအုံ တိုးတက်ကောင်းမွန်ရေးအပေါ် အာရုံစိုက်လျက်ရှိ သောကြောင့် လမ်း၊ အဆောက်အအုံ၊ ပိုက်လိုင်း၊ လျှပ်စစ်ဓာတ်အားဖြန့်ဝေမှုဆိုင်ရာ ကဏ္ဍများတွင် အဓိကဆောက်လုပ်မှုများ ပြုလုပ်သွားဖွယ်ရာရှိပြီး နိုင်ငံခြားတိုက်ရိုက် ရင်းနှီးမြှုပ်နှံမှုများမှာ လည်းအလွန်မြင့်တက်လာလျက်ရှိ သောကြောင့် အိမ်ခြံမြေကဏ္ဍတွင် ရုံးခန်းနေရာသစ်များ ပိုမိုလိုအပ်လာမည်ဖြစ်ကြောင်း မြန်မာနိုင်ငံဆောက်လုပ်ရေးလုပ်ငန်းရှင်များအသင်းဥက္ကဌဦးသာဌေးကပြောကြားသည်ဟု အဆိုပါဝက်ဘ်ဆိုက်တွင် ဖော်ပြသည်။

ယခုနှစ် BuildTech Yangon ပြပွဲကို Sphere Exhibits မှ စီစဉ်ပြီး မြန်မာနိုင်ငံဆောက်လုပ်ရေး လုပ်ငန်းရှင်များ အသင်းကကူညီပံ့ပိုး ပေးထားသည်။

Credit: iMyanmarHouse.com
(iMyanmarHouse.com Team မှ ရေးသား ဖော်ပြသည်။)