မန္တလေးမြို့တွင် အထပ်မြင့် ဟိုတယ်နှင့် အဆောက်အအုံများတွင် လုံလောက်သည့် ယာဉ်ရပ်နားရန် နေရာ ပါရှိမှ ဆောက်လုပ်ခွင့်ပြုမည်ဟု မန္တလေးမြို့တော် စည်ပင်သာယာရေးကော်မတီ၊ အဆောက်အအုံနှင့် ကုန်ရုံဌာနဌာနမှ ခေတ္တဌာနမှူး ဦးဇော်ဝင်းက ပြောသည်။
၎ ထပ်နှင့်အထက် ရှိမည့် ဟိုတယ်များနှင့် အဆောက်အအုံများ အနေဖြင့် ယာဉ်ရပ်နားနေရာ ထည့်သွင်းထားသည့် ပုံစံဒီဇိုင်းများဖြင့် လျှောက်ထားရမည် ဖြစ်ပြီး အခန်းအရေအတွက်၊ တည်းခိုမည့် လူဦးရေနှင့် ကိုက်ညီသည့် အကျယ်အဝန်း ထားရှိရမည် ဖြစ်ကြောင်း သိရသည်။
ထို့ပြင် အသုံးပြုမည့် ယာဉ်အစီးရေ၏ ၂၀ ရာခိုင်နှုန်းအတွက် လုံလောက်သည် ကားပါကင် ပါရှိရန် သေချာစိစစ်နေကြောင်း၊ ဆောက်လုပ်ခွင့် ချထားပေးပြီးနောက် စည်းကမ်းမလိုက်နာသည့် ဆောက်လုပ်ခြင်းများ စစ်ဆေးတွေ့ရှိရပါက ဥပဒေနှင့်အညီ အရေးယူသွားမည်ဟု မန္တလေးမြို့တော် စည်ပင်သာယာရေးကော်မတီ၊ အဆောက်အအုံနှင့် ကုန်ရုံဌာန၏ သတင်းထုတ်ပြန်ချက်အရ သိရသည်။
“အရင်က ကားပါကင် သတ်မှတ်ချက် ရှိခဲ့ပေမယ့် စစ်ဆေး အရေးယူမှုအပိုင်းမှာ အားနည်းမှုတွေ ရှိခဲ့ပါတယ်။ လက်ရှိမှာ မြို့တွင်းမှာလည်း ယာဉ်ကြောပိတ်ဆို့မှုတွေ ဖြစ်ပေါ်နေတော့ နောက်ပိုင်းမှာ မြို့ရဲ့ လူဦးရေ တိုးတက်များပြားလာနိုင်တာကြောင့် အခုလို စိစစ် ဆောင်ရွက်မှုတွေ လုပ်ဆောင်ရတာဖြစ်ပါတယ်” ခေတ္တဌာနမှူး ဦးဇော်ဝင်းက ရှင်းပြသည်။
မန္တလေးမြို့တော် စည်ပင်သာယာရေးဥပဒေအရ ခွင့်ပြုထားသည့် အဆောက်အအုံ ပုံစံနှင့် ကွဲပြားခြားနားစွာ ဆောက်လုပ်ပါက အနည်းဆုံး ဒဏ်ငွေ ကျပ် ၃ သောင်းမှ အများဆုံး ကျပ် ၃ သိန်း ဖြစ်စေ၊ ထောင်ဒဏ် ၃ လအထိ ဖြစ်စေ၊ ဒဏ်နှစ်ရပ်လုံး ဖြစ်စေ အရေးယူနိုင်သည်ဟု သိရသည်။
မန္တလေးမြို့ပြ ပိုမိုဖွံ့ဖြိုးလာစေရေး အထပ်မြင့် အဆောက်အအုံများ ဆောက်လုပ်ခွင့်ကို ၄ ထပ်နှင့်အထက် အဆောက်အအုံများတွင် လုံလောက်သည့် ကားပါကင် ပါရှိရမည်ဖြစ်ပြီး မျက်နှာဖွင့် ပေ ၄၀ အောက်လျော့နည်းသည့် အဆောက်အအုံများကို ဘေးနှစ်ဘက် အမိုးစွန်းမှ ဝင်းခြံအထိ ၃ ပေ ချန်၍ ဆောက်ထားရန်၊ မျက်နှာဖွင့် ပေ ၄၀ အထက် အဆောက်အအုံများကို ဘေးနှစ်ဘက် အမိုးစွန်းမှ ဝင်းခြံအထိ ၅ ပေ ချန်၍ ဆောက်ထားရမည်ဖြစ်ပြီး သတ်မှတ်ချက်များ ပြည့်စုံမှ ခွင့်ပြုပေးမည်ဖြစ်ကြောင်း ကော်မတီ၏ အဆိုအရ သိရသည်။
“နောက်ပိုင်း ကာလမှာဆိုရင် ကော်မတီက အင်ဂျင်နီယာ လိုင်စင်တွေကို ချထားပေးမှာ မဟုတ်တော့ပါဘူး။ မြန်မာနိုင်ငံ အင်ဂျင်နီယာကောင်စီကနေပဲ RE၊ PE၊ RSE စတဲ့ အဆင့်သတ်မှတ်ချက်အတိုင်း ချထားပေးတဲ့အပေါ်မှာ စာရင်းလက်ခံပေးတာပဲ ပြုလုပ်သွားမှာ ဖြစ်ပါတယ်”ဟု ခေတ္တဌာနမှူး ဦးဇော်ဝင်းက ပြောသည်။
ထို့ပြင် တည်ဆောက်ရေး လုပ်ငန်းများအတွက် အရေးကြီးသည့် အင်ဂျင်နီယာလိုင်စင်များနှင့် ကန်ထရိုက် လုပ်ငန်းလိုင်စင်များကိုလည်း စိစစ်ခွင့်ပြု ချထားပေးလျက်ရှိသဖြင့် မြန်မာနိုင်ငံ အင်ဂျင်နီယာကောင်စီ အသိအမှတ်ပြု RE၊ PE၊ RSE ဖြေဆိုမှုများအတွက် အထောက်အကူ ဖြစ်စေမည်ဟု ၎င်းက ပြောကြားသည်။
ယခုအခါ ကန်ထရိုက် လုပ်ငန်းလိုင်စင် ချထားပေးမှုမှာ ကုမ္ပဏီ ၁၃၅ ခု၊ အကြီးတန်း အင်ဂျင်နီယာလိုင်စင် ၅၅၁ ဦး၊ အငယ်တန်း အင်ဂျင်နီယာလိုင်စင် ၄၀၇ ဦး ဖြစ်သည်ဟု သိရသည်။
Credit : Irrawaddy News
