လက်ရှိအားဖြင့် ဂျပန်ပြည်တွင်းတွင် မရရှိနိုင်သည့် အမြတ်အစွန်းကြီးမားသော အက်ဆက်စ်များတွင် ရင်းနှီးမြှုပ်နှံရန် ရှာဖွေလျက်ရှိသည့် ဂျပန်ရင်းနှီးမြှုပ်နှံသူများကို ဘန်ကောက်အိမ်ခြံမြေကဏ္ဍသို့ ၀င်ရောက်လာကြစေရန် ဆွဲဆောင်နိုင်ဖွယ်ရှိသည်ဟု ထိုင်း developer တို့က ယုံကြည်လျက်ရှိကြောင်း ဘန်ကောက်အခြေစိုက် အိမ်ခြံမြေသတင်းဝက်ဘ်ဆိုက်တစ်ခုတွင် ဖော်ပြသည်။
ထိုင်း developer တို့သည် ဂျပန်ဝယ်လက်တို့ အလုံးအရင်းဝင်ရောက်လာစေရန်ပစ်မှတ်ထားကာ စီမံကိန်းများ ရေးဆွဲလျက်ရှိကြသည်။
တရုတ်စီးပွားရေးနှေးကွေးမှုကဲ့သို့ ပြင်ပအကြောင်းခြင်းရာများက ထိုင်းပြည်တွင်းစီးပွားရေး၏ အခြားကဏ္ဍများအပေါ် ကြီးမားသည့် ရိုက်ခတ်မှုများရှိခဲ့သော်လည်း ထိုင်းနိုင်ငံအတွင်း ကွန်ဒိုဝယ်လိုအားမှာမူ အားကောင်းလျက်ရှိဆဲဖြစ်ကြောင်း ထိုင်း developer စန်ဆီရီ၏ ဒုတိယဥက္ကဌ ယူထိုင်းဆန်စွပ်က ပြောကြားသည်။
ထိုင်း developer စန်ဆီရီသည် ဂျပန်တွင် အိမ်ခြံမြေပြပွဲကျင်းပရန် စီစဉ်ထားပြီး ယင်းပြပွဲမှ ကန်ဒေါ်လာ ၈ သန်းမှ ၁၀ သန်းဖိုးအထိ ရောင်းအားမြှင့်နိုင်မည်ဟု မျှော်မှန်းထားသည်။
၂၀၁၅ ခုနှစ်အတွင်း စန်ဆီရီ၏ ရောင်းချရမှုမှာ ကန်ဒေါ်လာ ၂ သန်းဖိုး ဖြစ်သည်။
အကယ်၍ စန်ဆီရီသည် ၎င်းတို့လျာထားချက်အတိုင်း ရောင်းအားပြည့်မီခဲ့မည်ဆိုပါက ယင်းပမာဏမှာ စုစုပေါင်းပြည်ပရောင်းချရမှု၏ ၇ ရာခိုင်နှုန်းအထိ ရှိမည်ဖြစ်သည်။
ဂျပန်ဗဟိုဘဏ်က အစိုးရငွေတိုက်စာချုပ်များကို အတိုးမပေးရန်ဆုံးဖြတ်လိုက်သောကြောင့် ဂျပန်ရင်းနှီးမြှုပ်နှံသူတို့မှာ ပြည်ပတွင် ရင်းနှီးမြှုပ်နှံရန် ဦးလှည့်လာလျက်ရှိကြသည်။
ပြီးခဲ့သော ၂၀၁၅ ခုနှစ်နှစ် နောက်ဆုံး ၃ လပတ်ကာလအတွင်း ထိုင်းဂျီဒီပီမှာ ၂ ဒသမ ၈ ရာခိုင်နှုန်း မြင့်တက်လာခဲ့သည်။
ထိုင်းနိုင်ငံ၏ အိမ်ခြံမြေကဏ္ဍတွင် ရင်းနှီးမြှုပ်နှံခြင်းမှ အမြတ်အစွန်း ၅ ရာခိုင်နှုန်းမှ ၈ ရာခိုင်နှုန်းအကြားရရှိနိုင်ကြောင်း ယူထိုင်းဆန်စွပ်က ပြောကြားသည်။
Credit: iMyanmarHouse.com
(iMyanmarHouse.com Team မှ ရေးသား ဖော်ပြသည်။)
