တရုတ်အာမခံကုမ္ပဏီအန်ဘန်သည် ကန်ဒေါ်လာ ၆ ဒသမ ၅ ဘီလီယံသုံးစွဲ၍ချီကာဂိုအခြေစိုက် Strategic Hotels & Resortsကုမ္ပဏီကို ၀ယ်ယူမည်ဖြစ်ကြောင်း scmp.com တွင် ဖော်ပြသည်။ Strategic Hotels & Resortsသည် ချီကာဂိုအခြေစိုက်ဖြစ်ပြီးအမေရိကန်ပြည်တွင်းတွင် ဟိုတယ် ၁၇ လုံးပိုင်ဆိုင်ပြီးဂျာမနီတွင် ဟိုတယ်တစ်လုံးပိုင်ဆိုင်သည်။
ဘီလ်ဂိတ်သည် ၎င်းပိုင် Cascade Investments Inc. မှတစ်ဆင့် Strategic Hotels & Resorts ၏ ရှယ်ယာအစုပေါင်း၁ ဒသမ ၇၄ သန်းကို ၀ယ်ယူထားပြီး တန်ဖိုးအားဖြင့် ကန်ဒေါ်လာ ၂၁ ဒသမ ၄ သန်းဖိုး ဖြစ်သည်။
Strategic Hotels & Resortsသည် The Blackstone Groupသို့ ကန်ဒေါ်လာ ၆ ဘီလီယံဖြင့် ၂၀၁၅ စက်တင်ဘာတွင် ရောင်းချခဲ့ပြီးနောက်ပိုင်းအန်ဘန်ကုမ္ပဏီက Blackstone ထံမှပြန်လည်ဝယ်ယူခဲ့ခြင်းလည်းဖြစ်သည်။
ယင်းအရောင်းအ၀ယ်ကိုကြည့်ခြင်းအားဖြင့်တရုတ်တို့သည်အမေရိကန်အိမ်ခြံမြေများကိုများစွာမျက်စိကျလျက်ရှိကြောင်းပြသနေသည်။
အန်ဘန်သည်ဟီလ်တန် worldwide ထံမှနယူးယောက်ရှိWaldorf Astoriaဟိုတယ်ကို ၂၀၁၄ ခုနှစ်အတွင်းကန်ဒေါ်လာသန်း ၂ ထောင်ခန့် (၁ ဒသမ ၉၅ ဘီလီယံ)ပေးကာဝယ်ယူခဲ့ရာ ဟိုတယ်ခန်းတစ်ခန်းချင်းဈေးနှုန်းဖြင့်တွက်မည်ဆိုလျှင် အမေရိကန်ဟိုတယ် များတွင် ဈေးအမြင့်ဆုံးပေးကာ ၀ယ်ယူခဲ့ခြင်း ဖြစ်သည်။
ပြီးခဲ့သောနိုဝင်ဘာလအတွင်းကလည်းအန်ဘန်သည်အမေရိကန်အသက်အာမခံကုမ္ပဏီFidelity & Guaranty Lifeကိုကန်ဒေါ်လာ ၁ ဒသမ ၅ ဘီလီယံဖြင့် ၀ယ်ယူခဲ့သည်။
Credit: iMyanmarHouse.com
(iMyanmarHouse.com Team မှ ရေးသား ဖော်ပြသည်။)
