တန်ဖိုးနည်းနှင့် အငှားအိမ်ရာ စီမံကိန်း စတင်ဆောက်လုပ်သည်မှာ တစ်နှစ်ခန့် ကြာမြင့်ချိန်၌ မူလလယ်ပိုင်ရှင်များအား နစ်နာကြေးပေး

ဧရာဝတီတိုင်း ဒေသကြီး ပုသိမ်မြို့ အမှတ် (၁၄) ရပ်ကွက်ရှိ ဥမ္မာဒန္ဓီ တန်ဖိုးနည်း အိမ်ရာစီမံကိန်းနှင့် ဥမ္မာဒန္ဓီ အငှားအိမ်ရာ စီမံကိန်းတို့ တည်ဆောက်ရာ နေရာ၏ မူလလယ်ပိုင်ရှင်များ စတင် ဆောက်လုပ်သည်မှာ တစ်နှစ်ခန့် ကြာမြှင့်ချိန်၌ မူလလယ်ပိုင်ရှင် လေးဦးအား နစ်နာကြေး ၁၉၆ သိန်းကို မတ် ၂၂ ရက်က မြို့ပြနှင့် အိမ်ရာဖွံ့ဖြိုးရေး ဦးစီးဌာန ဧရာဝတီတိုင်းဒေသကြီး ညွှန်ကြားရုံးတွင် ပေးခဲ့ကြောင်း သတင်းရသည်။

၂၀၁၅ ခုနှစ်မေလတွင် စတင်အကောင်အထည်ဖော် တည်ဆောက်ခဲ့ပြီး ၂၀၁၆/၁၇ ဘဏ္ဍာနှစ်အတွင်း အပြီးဆောက်လုပ်ရမည် ဖြစ်ကြောင်း၊ စီမံကိန်းတွင် တန်ဖိုးနည်း အိမ်ရာနှင့် အငှားအိမ်ရာ နှစ်ခုပါဝင်ကာ အငှားအိမ်ရာမှာ တိုင်းဒေသကြီး အစိုးအရအတွက် ပြည်ထောင်စု အစိုးရမှ ထောက်ပံ့ရန်ပုံငွေဖြင့် တည်ဆောက်ပြီး၊ တန်ဖိုးနည်း အိမ်ရာကိုလည်း မြို့ပြနှင့် အိမ်ရာဖွံ့ဖြိုး တိုးတက်ရေးဦးစီးဌာန လှည့်ပတ်ရန်ပုံငွေဖြင့် တည်ဆောက်ပြီး အရစ်ကျ ပေးသွင်းစနစ်ဖြင့် ရောင်းချမည်ဖြစ်ကြောင်း သိရသည်။

“အခုက မူလပိုင်ရှင်တွေကို လျော်ကြေးငွေပေးတာပါ။ ဧက အကျယ်အ၀န်းက ၉ ဒသမ ၃၄ ဧကရဲ့ မူလပိုင်ရှင် လေးဦးကို ပေးခဲ့တာပါ။ ဒီနစ်နာကြေးကို ဆောက်လုပ်ရေး ၀န်ကြီးဌာနရဲ့ လှည့်ပတ်ရန်ပုံငွေက ပေးတာပါ။ ဒီတန်ဖိုးနည်း အိမ်ရာတွေက ဆောက်လုပ်ရေး ၀န်ကြီးဌာနမှ လှည့်ပတ်ရန်ပုံငွေဆိုတာ ဆောက်လုပ်ပြီး ပြန်လည်ရောင်းချလို့ ထွက်တဲ့ ငွေနဲ့ဆက်ပြီး ဆောက်လုပ်သွားတာပါ” ဟု မြို့ပြနှင့် အိမ်ရာဖွံ့ဖြိုးရေး ဦးစီးဌာန ဧရာဝတီတိုင်း ဒေသကြီး လက်ထောက်ညွှန်ကြားရေးမှူး ဦးဇော်မင်းဦးက ပြောကြားသည်။

အဆိုပါ စီမံကိန်းတွင် တန်ဖိုးနည်းအိမ်ယာ ရှစ်ခန်းတွဲ ခြောက်ထပ် ခုနစ်လုံး။ ခြောက်ခန်းတွဲ ငါးထပ် ၁၀ လုံး၊ နှစ်ခန်းတွဲ လေးထပ်ငါးလုံးနှင့် ငှားရမ်းအိမ်ရာ ငါးလုံးတို့ ပါဝင်ကာ စုစုပေါင်း အဆောက်အအုံ ၂၇ လုံးပါဝင်ကြောင်း၊ ကုမ္ပဏီ ရှစ်ခုတို့မှ တာဝန်ယူ တည်ဆောက်လျက်ရှိကြောင်း မြို့ပြနှင့်အိမ်ရာ ဖွံ့ဖြိုးရေး ဦးစီးဌာန ဧရာဝတီတိုင်း ဒေသကြီး ညွှန်ကြားရုံး စာရင်းများအရ သိရသည်။

“သိမ်ခံထားရတာ ကြာပါပြီ။ ဟိုးအရင် ကတည်းက ပုသိမ်မြို့သစ် စီမံကိန်းနဲ့ အသိမ်းခံရတာ အခုလိုမျိုး တစ်ဧကကို ၂၁ သိန်းလောက်နဲ့ ပြန်ရတော့ ၀မ်းသာမိပါတယ်။ မိသားစုကတော့ နှစ်နာခဲ့ရတာ နှစ်မနည်းတော့ပါဘူး” ဟု နစ်နာကြေးရရှိသည် မူလလယ်ပိုင်ရှင် မိသားစုဝင် တစ်ဦးက ပြောကြားသည်။

အဆိုပါ စီမံကိန်း၏ ကျသင့်ငွေတန်ဖိုးမှာ အခြေခံဖြစ်သော လမ်း၊ မီး၊ ရေ၊ မိလ္လာ စနစ်များ လုပ်ဆောင်ပြီးချိန်မှသာ ပြောနိုင်မည်ဖြစ်ကြာင်းနှင့် ငှားရမ်းရန်နှင့် ရောင်းချရန်များမှာ ဆောက်လုပ်ရေး ၀န်ကြီးဌာန၏ အိမ်ရာဖွံ့ဖြိုး တိုးတက်ရေး ၀န်ကြီးဌာနနှင့် ဧရာဝတီတိုင်း ဒေသကြီး အစိုးရတို့ ညှိနှိုင်း၍ မူဝါဒချပြီးမှသာ မူဝါဒအတိုင်း ရောင်းချငှားရမ်းသွားမည် ဖြစ်ကြောင်း မြို့ပြနှင့် အိမ်ရာ ဖွံ့ဖြိုးရေးဦးစီးဌာန ဧရာဝတီတိုင်း ဒေသကြီး ညွှန်ကြားရုံးမှ သိရသည်။

Credit : Eleven Media Group