တန်ဖိုးမျှတအိမ်ရာ ဝယ်ယူခွင့်လျှောက်လွှာ အခုလ ၂၆ ရက်နေ့ စတင်ရောင်းချမည်

အခုလ ၂၆ ရက်နေ့မှာ စတင်ရောင်းချပေးမယ့် တန်ဖိုးမျှတအိမ်ရာ ဝယ်ယူခွင့်ရရှိမယ့်သူတွေက လက်ရှိတာဝန်ထမ်းဆောင်နေဆဲဖြစ်ရမှာဖြစ်ပြီး ဝန်ထမ်းလုပ်သက် ၂၅ နှစ်ရှိရမှာဖြစ်တယ်လို့ မန္တလေးမြို့တော်စည်ပင်သာယာရေးကော်မတီက သိရပါတယ်။

‘အရင်က တန်ဖိုးနည်းအိမ်ရာ ဝယ်ယူခွင့်လျှောက်ထားပြီး မရလိုက်တဲ့သူတွေ ဒီအထဲမှာ အကျုံးဝင်တယ် ၊ အဲဒီလူတွေ ထပ်လျှောက်စရာမလိုပါဘူး’ လို့ မန္တလေးမြို့တော်စည်ပင်သာယာရေးကော်မတီ တွဲဖက်အတွင်းရေးမှူး ဦးသက်နိုင်ထွန်းက ပြောပါတယ်။

အခန်းပေါင်း ၄၀၀ ရှိတဲ့ တန်ဖိုးမျှတအိမ်ရာဟာ လေးထပ် ၊ လေးခန်းတွဲတိုက်ခန်းတွေ ဖြစ်ပြီး တိုက်ခန်းတစ်ခန်းကို စတုရန်းပေ ၆၅၀ အကျယ်ရှိမှာဖြစ်ကာ အိပ်ခန်း နှစ်ခန်း ၊ ဧည့်ခန်း ၊ ရေချိုးခန်း ၊ အိမ်သာ ၊ မီးဖိုဆောင်နဲ့ ထမင်းစားခန်းပါရှိမှာဖြစ်ကာ ချမ်းမြသာစည်မြို့နယ်အတွင်းမှာ တည်ဆောက်မှာဖြစ်တယ်လို့ သိရပါတယ်။

‘လျှောက်လွှာတွေကို တစ်စောင်ကိုကျပ် ၅၀၀ နဲ့ရောင်းချမယ် ၊ မတ်လ ၄ ရက်နေ့အထိရောင်းချသွားမယ်’လို့ ဦးသက်နိုင်ထွန်းက ပြောပါတယ်။

တန်ဖိုးမျှတအိမ်ရာတွေကို တန်ဖိုးနည်းအိမ်ရာရောင်းခဲ့စဉ်ကလိုပဲ လက်ငင်းငွေချေစနစ် ၊ ဘဏ်ချေးငွေစနစ်တွေနဲ့ ရောင်းချသွားမှာဖြစ်တယ်လို့ ဆိုပါတယ်။

တန်ဖိုးမျှတအိမ်ရာတိုက်ခန်းတွေကို မဲစနစ်နဲ့ရောင်းချသွားမှာဖြစ်ပြီး ချေးငွေစနစ်နဲ့ ဝယ်ယူမယ်ဆိုရင် မိသားစုရဲ့ လစဉ် ဝင်ငွေ ၊ ထွက်ငွေ တွေကို တိကျခိုင်မာတဲ့အထောက်အထားပြရမယ် ။ ဝယ်ယူခွင့်ရှိမယ်ဆိုရင် ငါးနှစ်အတွင်းတိုက်ခန်းကို လွှဲပြောင်းရောင်းချခြင်း ပြုလုပ်ခွင့်မရှိဘဲ သတ်မှတ်ကာလ ကျော်လွန်လို့ လွှဲပြောင်းရောင်းချချင်တယ်ဆိုရင် စည်ပင်သာယာရေးကော်မတီကို တင်ပြပြီးမှသာ ပြုလုပ်ခွင့်ရှိမှာ ဖြစ်တယ်လို့သိရပါတယ်။

ယခင် တန်ဖိုးနည်းအိမ်ရာဝယ်ယူခွင့်ရရှိဖို့ လျှောက်ထားသူတွေထဲက လုပ်သက် ၂၅ နှစ်အထက်ရှိတဲ့ ဝန်ထမ်း ၆၀၀၀ ကျော် ရှိပါတယ်။ ရောင်းချမယ့်ဈေးနှုန်းတွေက မြေညီထပ်က ကျပ် ၁၆၅ သိန်း ၊ ဒုတိယထပ်က ၁၅၅ သိန်း ၊ တတိယထပ်က ၁၄၅ သိန်း ဖြစ်ကာ ၊ စတုထ္ထအထပ်က ကျပ် ၁၃၅ သိန်းဖြစ်တယ်လို့ မန္တလေးတိုင်းဒေသကြီး မြို့ပြနှင့် အိမ်ရာဖွံ့ဖြိုးရေး ဦးစီးဌာနက သိရပါတယ်။

Credit: The Kumudra