ပြည်ထောင်စုဝန်ကြီး ဦးစိုးသိန်း ဧရာဝဏ်နှင့် ရတနာအိမ်ရာစီမံကိန်းလုပ်ငန်းများ ကြည့်ရှုစစ်ဆေး

သမ္မတရုံးဝန်ကြီးဌာန ပြည်ထောင်စု ဝန်ကြီး ဦးစိုးသိန်းသည် ဒီဇင်ဘာ ၁၃ရက် နံနက်ပိုင်းတွင် ရန်ကုန်တိုင်း ဒေသကြီး ဒဂုံ(ဆိပ်ကမ်း)မြို့နယ် အတွင်း ဆောင်ရွက်လျက်ရှိသည့် ဧရာဝဏ်နှင့် ရတနာအထပ်မြင့် အိမ်ရာစီမံကိန်းလုပ်ငန်းများ ကြည့်ရှုစစ်ဆေးပြီး အိမ်ရာစီမံကိန်းနှင့် ပတ်သက်၍ တာဝန်ရှိသူများအားတွေ့ဆုံမှာကြားသည်။

ရှေးဦးစွာ ပြည်ထောင်စုဝန်ကြီး ဦးစိုးသိန်းက အိမ်ရာစီမံကိန်း ဆောင်ရွက်ပေးခြင်းဖြင့် ပြည်သူတို့၏ နေထိုင်ရေး အဆင်ပြေစေရန် အိမ်ရာများ ဆောက်လုပ်ရာတွင် ဆောက်လုပ် ရေးဝန်ကြီးဌာနမှ ဦးဆောင်၍ စီစဉ်ပြီး ဆောက်လုပ်ရေးကုမ္ပဏီများ ပါဝင်၍ တစ်ပြိုင်တည်းဆောင်ရွက် နိုင်ရန် စီစဉ်ပေးခဲ့ခြင်းဖြစ်ကြောင်း၊ ရန်ကုန်မြို့တွင်းပြည်သူတို့၏ နေရေး အတွက် အိမ်ရာစီမံကိန်းများ ဆောင်ရွက်သကဲ့သို့ မြို့တွင်းသွားလာရေး လွယ်ကူအဆင်ပြေစေရန် ခုံးကျော်တံတားများအား တည်ဆောက်ပေးလျက်ရှိသည်ကို တွေ့မြင် ရမှာဖြစ်ကြောင်း၊ ယခု ဧရာဝဏ်နှင့် ရတနာအိမ်ရာစီမံကိန်းလုပ်ငန်းများ အောင်မြင်စွာ အကောင်အထည်ဖော် ဆောင်ရွက်နိုင်ရေး ကြိုတင်မျှော်မှန်း ၍ နိုင်ငံတော်အစိုးရအနေဖြင့် မြို့ပြ နှင့် အိမ်ရာဖွံ့ဖြိုးရေးဘဏ်အားဖွဲ့စည်း တည်ထောင်ပေးထားခဲ့ ကြောင်း၊ နှစ်စဉ်လူဦးရေတိုးတက်နှုန်း များနှင့် နေထိုင်ရန် အဆောက်အအုံများ လိုအပ်ချက်များရှိနေမည်သာ ဖြစ်ပါ၍ စီမံကိန်းလုပ်ငန်းများအား ဆက်လက်ပြီး ကြိုးစားဆောင်ရွက်ကြရန် မှာကြားသည်။

ဆက်လက်၍ ဧရာဝဏ်နှင့် ရတနာ အထပ်မြင့် အိမ်ရာစီမံကိန်းလုပ်ငန်းများတာဝန်ခံ ဒုတိယညွှန်ကြားရေးမှူး ချုပ်က အိမ်ရာစီမံကိန်းဆိုင်ရာ အချက်အလက်များဌာနမှ ဆောင်ရွက်သည့် ပထမဦးစားပေးအဆောက် အအုံ ၁၁ လုံး ဆောင်ရွက်ပြီးစီးမှု၊ ကုမ္ပဏီများမှ ဆောင်ရွက်သည့် ဒုတိယဦးစားပေး ၃၈ လုံးတို့၏ ဆောင်ရွက်ပြီးစီးမှု၊ လျှပ်စစ်မီးနှင့် ရေရရှိရေး ဆောင်ရွက်ပြီးစီးမှုကို ရှင်းလင်းတင်ပြပြီး ညွှန်ကြားရေးမှူး ချုပ်နှင့် ဒုတိယဝန်ကြီး ဦးစိုးတင့်တို့က ဖြည့်စွက် ရှင်းလင်းတင်ပြသည်။ ရှင်းလင်းတင်ပြချက်များအပေါ် ပြည်ထောင်စုဝန်ကြီး ဦးစိုးသိန်းက လိုအပ်သည်များမှာကြားပြီး စီမံကိန်း လုပ်ငန်းများကို လှည့်လည်ကြည့်ရှုစစ် ဆေးခဲ့ကြောင်း သိရသည်။

Credit: MOI Webportal Myanmar