မန္တလေးမြို့ အိမ်ရာများ အလှစိုက် ပန်းမျိုးစုံနှင့် အတူ လှပသော ငါးပုံပန်း အိုးကလေးများကို တွဲဖက် ရောင်းချ

မြို့ပြဒေသတိုက်ခန်းများနှင့် အိမ်ခန်းများ၏ ဝရံတာများတွင် စိတ်ကြည် လင်စေရန် အလှပန်းအိုးများစိုက်ပျိုး လေ့ရှိသည်။ သစ်ပင်ပန်းမန်များ စိုက်ပျိုး ကာ ယုယစွာပြုစု ပျိုးထောင်ခြင်းသည် စိတ်ကိုပျော်ရွှင်စေပေသည်။မန္တလေး မြို့ပေါ်ရှိ ခြံဝိုင်းများ၊ တိုက်ခန်းများတွင် အလှစိုက်ပျိုး နိုင်ရန် ကျုံးမြောက်ဘက် ရတနာပုံ တိရစ္ဆာန်ဥယျာဉ်အနီး ပျိုးပင်အရောင်းဆိုင်များက တွင်ကျယ်စွာ စိုက်ပျိုးရောင်းချ ပေးလျက်ရှိသည်။

လူသားတိုင်း သစ်တော၊ သစ်ပင်နှင့်ပန်းပင်မျိုးစုံကို ချစ်ခင်တတ်ကြပြီး သစ်ပင်ပန်းမန်မျိုးစုံ၊ ပန်းအိုးမျိုးစုံကို အမျိုးသမီးများက အများစုဝယ်ယူ၍ တစ်ပိုင်တစ်နိုင်စိုက် ပျိုးကြသည်။ နှင်းဆီပင်များမှာ တန်ဖိုးနည်းအပင် ဟု ခေါ်ဆိုနိုင်လောက်သည်အထိ ဈေးနှုန်းချိုသာလှသည်။ ယခုဝယ် ယခု စိုက်ကာ ပြုစုပေးရုံဖြင့် မကြာသောကာလတွင် ပန်းပွင့်ရောင်စုံ ကို မြင်တွေ့နိုင်သောအပင်ဖြစ်သည်။အများစုသော နှင်းဆီပန်းပင်များတွင် နှင်းဆီဖူး၊ နှင်းဆီ အပွင့်များပါနေသည့်အတွက် အမျိုးသမီးများပိုမိုနှစ်သက် ကြသည်။

နှင်းဆီပန်းနှင့်အတူ အခြားတန်ဖိုးနည်းပန်းမျိုးစုံကို လည်း စိုက်ပျိုးရောင်းချကြ သည်။ ပန်းများနှင့်အတူ ပန်းအိုးများကို တွဲဖက်ရောင်းချသည်။ ပန်းအိုးများမှာ အနုပညာမြောက်အောင်ပုံဖော်လေ့ရှိသည်။အနည်းဆုံး ငွေကျပ် တစ်ထောင် တန် ပန်းအိုးများမှသည် ခြောက်သောင်း တန်ပန်းအိုးများအထိ အရွယ် အစားနှင့် လက်ရာအပေါ် မူတည်ကာ ရောင်းချကြသည်။

လက်ရှိကာလတွင် ဇီးကွက်ပုံပန်းအိုးကလေး များနှင့်အတူ ငါးပုံပန်းအိုးကို စိတ်ဝင်စားမှု များပြားလာသည်။ ငါးပုံပန်းအိုးကိုပန်းပျိုးခြံများတွင် အလှပြကာ နမူနာအဖြစ် ထားပေးလေ့ရှိသည်။အချို့သော သူများမှာ အလှထားခြင်းကို ရိုးရိုးသာပြုလုပ်လေ့ရှိပြီး အများစုမှာ ခေတ်မီနည်းပညာဖြင့် ရေပန်းကလေး များ ပြုလုပ်ကြောင်း သိရသည်။

ရေပန်းကလေးများမှာ ငါးပါးစပ်အတွင်းမှ မှုတ်ထုတ်နေဟန်ပြုလုပ်ကြသည်။ လက်ရှိကာလတွင် ငါးပုံသဏ္ဌာန် ပန်းအိုးကလေးများကို စိတ်ဝင်စားမှု များပြားကြသည်။ ပုံသဏ္ဌာန်အစုံပန်းအိုးများနှင့်အတူ တန်ဖိုးနည်း အလှပန်းပင်မျိုးစုံမှာ ရောင်းအား ကောင်းလျက်ရှိကြောင်း သိရသည်။