မြို့တည်ဆောက်ပုံ အဆောက်အအုံများ လေ့လာခြင်းဖြင့် ရှေးလူများ၏ လူနေမှု စနစ်ကို မှတ်တမ်းပြုနိုင်

မြို့တည်ဆောက်ပုံအနေအထားနှင့် အဆောက်အအုံများ တည်ရှိမှု ပုံသဏ္ဌာန် တို့ကို လေ့လာခြင်းအားဖြင့် ရှေးခေတ်လူများ မည်သို့မည်ပုံ တည်ဆောက် ထားရှိခဲ့သည်၊ မည်သည့် ပစ္စည်းများထည့်သွင်း အသုံးပြုခဲ့သည် စသည် များကို လေ့လာသိရှိနိုင်ခြင်းနှင့် မူလဇာစ်မြစ် အခြေခံတို့ကို သုတေသနပြု၍ လူနေမှုစနစ်ကို ကောက်ချက်ချ မှတ်တမ်းပြုနိုင်မည်ဖြစ်ကြောင်း စစ်ကိုင်း တိုင်းဒေသကြီး ရှေးဟောင်းသုတေသနနှင့် အမျိုးသား ပြတိုက် ဦးစီးဌာန မှ ဒေါက်တာသန်းထိုက်ထံမှ သိရသည်။

ယခုအချိန်တွင် လွန်ခဲ့သော နှစ်သုံးသောင်းခန့်က သမိုင်းအဆက်ဆက် တီထွင်ဖန်တီးထုတ်လုပ်ခဲ့ကြသည့် ယဉ်ကျေးမှုအမွေအနှစ် ပစ္စည်းများ ထဲတွင် ရွှေ့ပြောင်းနိုင်သော ပစ္စည်းများနှင့်မရွှေ့ပြောင်းနိုင်သောပစ္စည်း ဟူ၍နှစ်မျိုးခွဲခြားထားကြောင်း သိရသည်။ ရွှေ့ပြောင်းနိုင် သော ပစ္စည်းများ ထဲတွင် လက်မှုအနုပညာဖြင့် ဖန်တီးထုတ်လုပ်ခဲ့သည့် ပန်းဆယ်မျိုးအပါအဝင် ပစ္စည်းများ၊ ရှေးဟောင်း အဆောက်အအုံနှင့် တွဲ၍ဖန်တီးထားသော လက်ရာ ပစ္စည်းများ ပါဝင်ကြောင်း သိရသည်။

ပန်းချီကားများ၊ ပန်းတော့နှင့် ပန်းတမော့လက်ရာများ၊ ပန်းထိမ်လက်ရာ ပစ္စည်းများ၊ သစ်သား၊ ဆင်စွယ်၊ အရိုး ပန်းပုလက်ရာပစ္စည်းများ၊ မြေထည် စဥ့်သုတ်လက်ရာများ၊ မြေထည် မီးဖုတ်လက်ရာများ၊ ကျောက်သားဖြင့် ပြုလုပ် ထား သောပစ္စည်းများ၊ ရှေးဟောင်းအဝတ်အထည်များ၊ ဓာတ်သတ္တုပစ္စည်း များဖြင့် ပြုလုပ်ထားသောပစ္စည်းများ၊ ရှေးခေတ် လူ့အသုံးအဆောင် ပစ္စည်း အမျိုးမျိုးနှင့် ရှေးဟောင်း သုတေသနဆိုင်ရာ သမိုင်းဝင် ပစ္စည်းများ သည် ရွှေ့ပြောင်းနိုင်သော ပစ္စည်းများဖြစ်ကာ အဆိုပါ ပစ္စည်း များကိုရွှေ ထည်၊ ငွေထည်၊ သံထည်၊ ကြေးထည်ခံသတ္တု၊ ပိုးထည်ချည်ထည်၊ ကျောက် အမျိုးမျိုး၊ တန်ဖိုးရှိသော ကျောက်များ၊ ရွံ့နှင့်မြေထည်၊ သစ်သား၊ အရိုး၊ ဆင်စွယ်၊ သစ်ခေါက်၊ ပေရွက်၊ စက္ကူစသည့် အခြေခံပစ္စည်းများဖြင့် ပြုလုပ် ထားခြင်း ဖြစ်ကြောင်း သိရသည်။

Credit: MOI Webportal Myanmar