ရန်ကုန်မြို့ရှိ ခွင့်ပြုချက်မဲ့ ကန်ထရိုက်တိုက်များအား ဒဏ်ကြေးဖြင့်ခွင့်ပြုခြင်းကို လျှော့ချ၍ ပြန်လည်ဖြိုဖျက်ခြင်း ပိုမိုပြုလုပ်မည်

ရန်ကုန်မြို့ရှိ ခွင့်ပြုချက်မဲ့ ကန်ထရိုက်တိုက်များအား ဒဏ်ကြေးဖြင့်ခွင့်ပြုခြင်းကို လျှော့ချ၍ ပြန်လည်ဖြိုဖျက်ခြင်းကို ပိုမိုပြုလုပ်မည်ဖြစ်ကြောင်း ရန်ကုန်မြို့တော် စည်ပင်သာယာရေးကော်မတီ၊ အဆောက်အအုံဌာနမှ တာဝန်ရှိသူတစ်ဦးက ပြောကြားသည်။

ခွင့်ပြုချက်မဲ့ဆောက်လုပ်သည့် ကန်ထရိုက်တိုက်အား စည်ပင်ကတရားလိုပြုလုပ်ကာ တရားရုံးသို့ တရားစွဲဆိုတင်ပို့ပြီး တရားရုံးကချမှတ်သည့် ဒဏ်ကြေးမှာ တစ်ရက်လျှင် ကျပ်တစ်သောင်းကျော်သာ ပေးဆောင်ရကြောင်း၊ ထိုပမာဏမှာ နည်းပါး၍ ခွင့်ပြုချက်မဲ့ ဆောက်လုပ်သူများမှာ ဒဏ်ကြေးပေးဆောင်၍ အတင့်ရဲကာ ဆက်လက်ဆောက်လုပ်နေခြင်းဖြစ်ကြောင်း သိရသည်။

ထို့အတွက် ခွင့်ပြုချက်မဲ့ ဆောက်လုပ်မှုများအား ပိုမိုတင်းကျပ်တော့မည်ဖြစ်ပြီး ရန်ကုန်မြို့တော် လျှပ်စစ်ဓာတ်အားပေးရေးအဖွဲ့နှင့် ညှိနှိုင်းကာ မီးမပေးခြင်းကို ပြုလုပ်မည်ဖြစ်ပြီး ဒဏ်ကြေးပေးဆောင်စေခြင်းကို လျှော့ချကာ ခွင့်ပြုချက်မဲ့ ဆောက်လုပ်မှုအား ပြန်လည်ဖြိုဖျက်သည်အထိ အရေးယူမှုကို ပိုမိုပြုလုပ်ကာ တင်းကျပ်မည်ဖြစ်ကြောင်း အဆောက်အအုံဌာနမှ တာဝန်ရှိသူတစ်ဦးက ပြောကြားသည်။

“ခွင့်ပြုချက်မဲ့တွေက နည်းနည်းတော့လျော့သွားပါပြီ။ ဒါပေမဲ့ ထပ်ပြီးအတင့်မရဲအောင် ပိုမိုတင်းကျပ်သွားပါမယ်။ မီးလည်းမပေးတော့ဘူး။ ဒဏ်ကြေးထက် ပြန်လည်ဖြိုဖျက်တာကို ပိုလုပ်သွားမယ်” ဟု ယင်းတာဝန်ရှိသူက ဆိုသည်။

ခွင့်ပြုချက်မဲ့ဆောက်လုပ်သည့် ကန်ထရိုက်များမှာ ရန်ကုန်မြို့တော် စည်ပင်သာယာရေးကော်မတီတွင် လိုင်စင်ရယူထားခြင်းမရှိသည့် လိုင်စင်မဲ့ကန်ထရိုက်များဖြစ်ပြီး မြေပိုင်ရှင်များကို မက်လုံးပေးစည်းရုံးကာ ဆောက်လုပ်နေကြခြင်းဖြစ်ကာ တရားစွဲဆိုခံရရာတွင် ကန်ထရိုက်ထက်မြေရှင်က တရားစွဲခံနေရခြင်းဖြစ်သည်။

ခွင့်ပြုချက်မဲ့ အဆောက်အအုံများမှာ ခွင့်ပြုချက်ဖြင့် ဆောက်လုပ်ခြင်းမဟုတ်သည့်အတွက် စည်ပင်သို့ပေးသွင်းရသည့် အဆောက်အအုံဆိုင်ရာ နှုန်းထားများ ကင်းလွတ်ခွင့်ရသည့်အတွက် ပိုမိုဆောက်လုပ်လာကြခြင်းဖြစ်ပြီး အဆိုပါဆောက်လုပ်မှုများကို တင်းကျပ်သည့် စည်ပင်သာယာ၏ စစ်ဆေးမှုအပိုင်း အားနည်းမှုကြောင့်လည်းဖြစ်ကာ ယခုနောက်ပိုင်း တင်းကျပ်စွာစစ်ဆေးမှု ပြုလုပ်နေပြီဟု ပြောကြားခဲ့သည်။

ရန်ကုန်မြို့တွင် ခွင့်ပြုချက်မဲ့ ကန်ထရိုက်တိုက်ဆောက်လုပ်မှု အများဆုံးမှာ သင်္ဃန်းကျွန်းမြို့နယ်တွင်ဖြစ်ပြီး ခွင့်ပြုချက်မဲ့ဆောက်လုပ်၍ တရားစွဲဆိုထားမှု ၆၀၀ ကျော်ရှိနေကြောင်း၊ ယင်းအထဲတွင် မဖြစ်မနေ ပြန်လည်ဖြိုဖျက်ခဲ့သည့် အဆောက်အအုံမှာ ငါးလုံးခန့်သာရှိပြီး ထိုသို့ ပြန်လည်ဖြိုဖျက်ခဲ့သည့် အဆောက်အအုံများ နည်းပါးခြင်းကြောင့်လည်း ခွင့်ပြုချက်မဲ့ဆောက်လုပ်သူများ အတင့်ရဲနေခြင်းဖြစ်ကြောင်း သုံးသပ်နေကြသည်။

သင်္ဃန်းကျွန်းမြို့နယ် ဆ/က ရပ်ကွက် ခိုင်သဇင်လမ်းရှိ ခွင့်ပြုချက်မဲ့ ကန်ထရိုက်တိုက်တစ်လုံးအား ပြန်လည်ဖြိုဖျက်ရန် စည်ပင်ကညွှန်ကြားခဲ့၍ ပြန်လည်ဖြိုဖျက်နေပြီး ယင်းတိုက်မှအခန်းများအား ကြိုပွိုင့်ဖြင့် ရောင်းချခဲ့ပြီးဖြစ်ကြောင်းနှင့် ကန်ထရိုက်မှာလည်း လိုင်စင်မဲ့ကန်ထရိုက်ဖြစ်နေပြီး တိမ်းရှောင်နေကြောင်း၊ ယခုအဆိုပါတိုက်အား ပြန်လည်ဖြိုဖျက်ခ ကျပ်သိန်း ၃၀ ကျော်အပါအ၀င် တရားစွဲခံထားရသည့် ဒဏ်ကြေးများအား မြေရှင်ဖြစ်သူကသာ အကုန်အကျခံ ပေးဆောင်နေရကြောင်း သိရပါသည်။

မြေရှင်မှာလည်း ငွေကြေးမတတ်နိုင်ခြင်းကြောင့် တရားစွဲဒဏ်ကြေး ကင်းလွတ်ခွင့်ရရန် အသနားခံစာအား စည်ပင်သို့တင်ပြမည်ဟု ယင်းတိုက်၏ မြေပိုင်ရှင်ဦးစိုးမြင့်က ပြောကြားသည်။

ရန်ကုန်တစ်မြို့လုံးတွင် ခွင့်ပြုချက်မဲ့ဆောက်လုပ်၍ တရားစွဲဆိုထားမှု ၁၉၀၀ ကျော်ရှိနေကြောင်း သိရသည်။

Credit: eleven media group