အထပ်မြင့်တိုက်ခန်းများ၊ လူနေတိုက်ခန်းများ ဆောက်လုပ်လိုသည့် လုပ်ငန်းရှင်များအနေဖြင့် ကန် ထရိုက်တာ လိုင်စင်ကြေး ပေးသွင်းရခြင်းကို ရှောင်ရှားနိုင်ရန်အတွက်အဆောက်အအုံ ဆောက်လုပ်ခွင့်လိုင်စင် တရားဝင်ရရှိထားသူများထံမှ လိုင်စင်ငှားရမ်းဆောက်လုပ်နေမှုများမှာ တရားမဝင်သည့်အပြင် ပြဿနာအရှုပ် အရှင်းများလည်းဖြစ်ပေါ်လာနေသဖြင့် စိစစ်အရေးယူလျက်ရှိကြောင်း ရန်ကုန်မြို့တော်စည်ပင်သာယာရေး ကော်မတီ၊ အဆောက်အအုံနှင့် မြေယာဌာနမှတာဝန်ရှိသူတစ်ဦးက ပြောသည်။
အဆောက်အအုံ ဆောက်လုပ်ခွင့် တင်ပြရာတွင် လိုင်စင်ရ ကန်ထရိုက်တာ၊ အင်ဂျင်နီယာလက်မှတ် လိုအပ်သည့်အတွက် ယခုကဲ့သို့လိုင်စင်ရ ကန်ထရိုက်တာများထံမှတစ်ဆင့် ငှားရမ်းဆောက်လုပ်နေကြခြင်း ဖြစ်ကာ ငှားရမ်းရာတွင်လည်းနားလည်မှုဖြင့် အခကြေးငွေ သတ်မှတ်ကာ လုပ်ကိုင်နေခြင်းဖြစ်သည်။
”တရားဝင်လိုင်စင် လွှဲပြောင်းပြီး ဆောက်လုပ်ခွင့် မရှိပါဘူး။ နားလည်မှုနဲ့ လုပ်နေတယ်လို့လည်း အပြင်မှာ ကြားနေရတယ်။ ဒီလိုင်စင်ငှားပြီး ဆောက်နေတဲ့ ကိစ္စကိုလည်းပြန်လည်စိစစ်ပြီး အရေးယူသွားမယ့် အပြင် လက်ရှိမှာလည်း အရေးယူထားတာတွေ ရှိနေတယ်။ အဓိကကတော့ တရားဝင်လိုင်စင်ကြေး မပေး သွင်းချင်လို့ နားလည်မှုတွေနဲ့ လိုင်စင်ငှား၊ နာမည်ခံပြီး ဆောက်နေကြတာပါ” ဟု ၎င်းက ပြောသည်။
အဆောက်အအုံ ဆောက်လုပ်ခွင့် တရားဝင်လိုင်စင်ကို အကြီးစားလိုင်စင်နှင့် အသေးစားလိုင်စင်ဟူ၍ သတ်မှတ်ထားရာ လိုင်စင်လျှောက်ထားသူများအနေဖြင့် လိုင်စင်ရယူလိုပါက အကြီးစားလိုင်စင်အတွက် ရန်ကုန်မြို့တော် စည်ပင်သာယာရေးကော်မတီထံ ကျပ် သိန်း ၅ဝဝ ပေးသွင်းပြီး အဆောက်အအုံ ၁၅ လုံး တည်ဆောက်ရမည် ဖြစ်ကြောင်း၊ လိုင်စင်ကြေးအနေဖြင့် ကျပ် သိန်း ၅ဝဝ ပေးသွင်းထားရမည် ဖြစ်ပြီး အထပ်အမြင့် လေးထပ်နှင့်အထက်အဆောက်အအုံများ ဆောက်လုပ်နိုင်သည့် ကန်ထရိုက်တာလိုင်စင် ရယူနိုင်ကြောင်း သိရသည်။
အသေးစားလိုင်စင်များ အတွက်တရားဝင်သတ်မှတ်နှုန်း ကျပ် သိန်း ၃ဝဝ သတ်မှတ်ထားပြီး လေးထပ် ခွဲအထိ ဆောက်လုပ်နိုင်သည့်အပြင်လက်ရှိအချိန်အထိ အကြီးစားနှင့်အသေးစား လိုင်စင် ၆ဝဝ ကျော်ထုတ်ပေး ထားရှိပြီးဖြစ်ကာ တရားဝင်လျှောက်ထားသူများကိုလည်းဆောက်လုပ်ခွင့်လိုင်စင်များချထားပေးနေဆဲဖြစ်သည်။
”ကန်ထရိုက်လုပ်ငန်းတွေမှာ လိုင်စင်ငှားဆောက်လုပ်ခြင်းတွေကရှိနေတာပါပဲ။ စည်ပင်သာယာရေး ကော်မတီက ခွင့်ပြုထားခြင်း မရှိပါဘူး။ နားလည်မှုနဲ့ လုပ်ဆောင်နေကြတာ” ဟု ပြည်တွင်းဆောက်လုပ်ရေး ကုမ္ပဏီတစ်ခုမှ တာဝန်ရှိသူတစ်ဦးက ပြောသည်။
ရန်ကုန်မြို့တော်သို့ အနယ်နယ်အရပ်ရပ်မှ ပြောင်းရွှေ့အခြေစိုက်မှုများ များပြားလာနေသည့်အတွက် အဆောက်အအုံနှင့် အိမ်ရာ လိုအပ်ချက်များ ရှိလာနေခြင်းကြောင့် ဆောက်လုပ်ရေးကုမ္ပဏီများ၊ ကန်ထ ရိုက်တာများက မြေရှင်များနှင့်ပူးပေါင်းကာ ကန်ထရိုက်တိုက်များဆောက်လုပ်ခြင်း၊ ကုမ္ပဏီများက မြေဝယ်ပြီး အဆောက်အအုံဆောက်လုပ်ခြင်းတို့ကို မြို့တွင်းခြောက်မြို့နယ်တွင်သာမက ယခုအခါ သင်္ဃန်းကျွန်း၊ တောင် ဥက္ကလာပ၊ ဒေါပုံ၊ သာကေတ၊ ဒဂုံမြို့သစ်တို့တွင်လည်းပြုလုပ်လျက်ရှိသည်။
”စည်ပင်ဘဏ်မှာ သိန်း ၅ဝဝ သွားပြီးသွင်းထားရတယ်။ ဒီအလုပ်မလုပ်တော့ပါဘူးဆိုမှ အဲဒီပိုက်ဆံ ပြန်ထုတ်လို့ရတယ်။ အဲဒီတော့လိုင်စင်ရှိတဲ့သူတွေဆီကနေ ငှားပြီး လုပ်လာကြတယ်” ဟု မြန်မာဇာတိမြေ ဆောက်လုပ်ရေးမှ အင်ဂျင်နီယာ ဦးမေအောင်က ပြောသည်။
ကန်ထရိုက်တာလိုင်စင် ငှားရမ်းဆောက်လုပ်ခြင်းသာမက မြို့သစ်များတွင် အဆောက်အအုံ တရား မဝင်ဆောက်လုပ်မှု များပြားနေသည့်အပြင် ထိုသို့ဆောက်လုပ်ခြင်းများကိုစည်ပင်သာယာက စိစစ်တွေ့ရှိပါက တစ်ရက်လျှင် ကျပ် ၁ဝ,ဝဝဝ ဒဏ်ကြေး ပေးဆောင်ရကြောင်း၊ ထိုဒဏ်ကြေးကို ဆောက်လုပ်ခွင့် တရားဝင် လိုင်စင် လျှောက်ထား၍ ပြန်လည်ရရှိသည်အထိ ပေးဆောင်ရကြောင်းပြည်တွင်းဆောက်လုပ်ရေးလုပ်ငန်း လုပ်ကိုင်သူများထံမှ သိရသည်။
Credit : The Trade Times
