ကျေးရွာ ၁၃ ရွာတွင် မှီခိုနေရသည့် နာဂစ်ဒုက္ခသည်များ နေရာချထားရေးအတွက် ဒသမပုံမှန်လွှတ်တော်အစည်းအဝေးမှသာ အဖြေ

လပွတ္တာမြို့နယ် ကြာကန်၊ မြွေဟောက်၊ ကသပေါင်း၊ မောင်းတီး၊ ပိန္နဲတောင်၊ မင်းကုန်းစသည့် ကျေးရွာ ၁၃ ရွာတွင် ယခင်အစိုးရလက်ထက်က ယာယီနေရာချထားပေးခဲ့သော နာဂစ်ဒုက္ခသည်စခန်းများမှ ဒုက္ခသည်များ နေရာအတည်တကျပိုင်ဆိုင်ချထားပေးနိုင်ရန်အတွက် လာမည့် ဧရာဝတီတိုင်းဒေသကြီး လွှတ်တော်ဒသမပုံမှန်အစည်းအဝေးတွင် အဖြေပေါ်ထွက်မည်ဖြစ်ကြောင်း သတင်းရရှိသည်။

လက်ရှိအချိန်ထိ ဒုက္ခသည်စခန်းများတွင် မှီခိုနေရသည့် ဒုက္ခသည်များအတွက် နေရာပြန်လည်ချထားပေးရန် လွှတ်တော်ကိုယ်စားလှယ်များနှင့် ဒုက္ခသည်များမှ တောင်းဆိုရာတွင် အစိုးရအဖွဲ့မှ ယခင်ကတိပေးထားသည့်အတိုင်း နာဂစ်ဒုက္ခသည်များအတွက် ရည်ရွယ်တည်ဆောက်ထားသည့် သုံးမိုင်မြို့သစ်နေရာတွင် ချပေးခြင်း မပြုခြင်း၊ မြေနေရာအပိုင်ပေးခြင်းများမရှိသောကြောင့် တိုင်းဒေသကြီးလွှတ်တော်မှ စုံစမ်းစစ်ဆေးရေးကော်မတီဖွဲ့ကာ စစ်ဆေးခဲ့ရကြောင်း သိရသည်။

"အရင်အစိုးရလက်ထက်က ဒုက္ခသည်တွေအတွက် မြေနေရာပေးထားပြီးသား၊ အခုမှအစိုးရအဖွဲ့က ပေးမယ် မပေးဘူး၊ အငြင်းပွားနေတာ၊ ဒုက္ခသည်အားလုံးကို မြေနေရာတွေ အပိုင်ပေးထားပြီးသား အခုကျေးရွာ ၁၃ ရွာက ဒုက္ခသည်တွေကိုသာ မြေနေရာအပိုင်မပေးတာ၊ သုံးမိုင်မှာပေးဖို့လုပ်ပြီး ဒေသဆိုင်ရာအဖွဲ့တွေနဲ့ တိုင်ပင်တယ်၊ မြို့မိမြို့ဖတွေရဲ့ သဘောထားမှတ်ချက်ယူတယ်။ အစိုးရအဖွဲ့ပိုင်မြေဖြစ်နေလျက်နဲ့ လုပ်နေတာတွေက လုပ်ရိုးလုပ်နည်းနဲ့မညီဘူးလို့ထင်တယ်၊ အစိုးရအဖွဲ့က လွှတ်တော်ကို ပြန်အကူအညီတောင်းလို့ လွှတ်တော်က စုံစမ်းစစ်ဆေးပေးပြီးပါပြီ။ အစီရင်ခံစာကို လာမည့်လွှတ်တော်မှာတင်ပါမယ်။ အဲဒီမှာ အစိုးရအဖွဲ့က အဆုံးဖြတ်ပေးမယ်လို့ထင်တယ်" ဟု လွှတ်တော်စုံစမ်းစစ်ဆေးရေးကော်မတီတွင်ပါဝင်သူ ဧရာဝတီတိုင်းဒေသကြီးလွှတ်တော် လပွတ္တာမြို့နယ်မဲဆန္ဒနယ်(၁)မှ တိုင်းဒေသကြီးလွှတ်တော်ကိုယ်စားလှယ် ဦးဇော်ဝင်းကပြောကြားသည်။

Credit: Eleven Media