ရန်ကုန်တိုင်းဒေသကြီး ဧရိယာအတွင်းရှိ မုတ္တမကမ်းရိုးတန်းတစ်လျှောက် ဒီရေတောဧကသုံးထောင်ကို ကြိုးပြင်ကာကွယ်တောအဖြစ် သတ်မှတ်မည်ဟု သတင်းရရှိသည်။
ရန်ကုန်တိုင်းဒေသကြီး ဧရိယာအတွင်းရှိ ကျောက်တန်း၊ ခရမ်း၊ သုံးခွ၊ ကွမ်းခြံကုန်းမြို့နယ်အတွင်းရှိ မုတ္တမပင်လယ်ကမ်းရိုးတန်းတစ်လျှောက်ရှိ ဒီရေတောဧကသုံးထောင်ကို ကြိုးပြင်ကာကွယ်တောအဖြစ် သတ်မှတ်သွားမည်ဖြစ်ကြောင်း သစ်တောဦးစီးဌာန၊ ရေဝေရေလဲဒေသ အုပ်ချုပ်ရေးဌာန ညွှန်ကြားရေးမှူးဦးဘိုနီက ပြောသည်။
ယင်းမုတ္တမကမ်းရိုးတန်းတစ်လျှောက်တွင် ယခင်က ဒီရေတောဧရိယာ အနည်းငယ်သာရှိရာမှ နာဂစ်မုန်တိုင်းပြီးနောက်တွင် ထပ်မံပေါက်ရောက်လာသည့် ဒီရေတောများဖြစ်သည်ဟု ၎င်းကပြောကြားသည်။
ကြိုးပြင်ကာကွယ်တောအဖြစ် ဖွဲ့စည်းနိုင်ရန် ကွင်းဆင်းတိုင်းတာခြင်း၊ ဒေသခံများ၏ သဘောထားကောက်ခံခြင်း စသည့်လုပ်ငန်းစဉ်များကို လုပ်ဆောင်လျက်ရှိကြောင်း ၎င်းကပြောသည်။
‘‘ကမ်းရိုးတန်းတစ်လျှောက် မျောလာတဲ့ ဒီရေတောမျိုးစေ့တွေက နုန်းတင်ပြီးတော့ ပေါက်လာတဲ့ ဒီရေတောပင်တွေဖြစ်တယ်။ အရင်က အပင်နည်းတာကနေ အခုအပင်တွေများလာတော့ အဲဒီနေရာက ဇီဝမျိုးစုံမျိုးကွဲတွေအတွက် ပိုကောင်းလာတယ်’’ဟု ရခိုင်ကမ်းရိုးတန်းဒေသတွင် ပတ်ဝန်းကျင်ထိန်းသိမ်းရေး လုပ်ဆောင်နေသည့် CLEARR ပရောဂျက်မန်နေဂျာ ဦးဝင်းမောင်က ပြောကြားသည်။
မြန်မာနိုင်ငံသည် ဒီရေတောတည်ရှိမှုအများဆုံး သတ္တမမြောက်နေရာတွင်ရှိကြောင်း ၂၀၁၀ ပြည့်နှစ်က FAO မှထုတ်သော World Atlas of Mangrove တွင် ဖော်ပြထားသည်။
မြန်မာ့ကမ်းရိုးတန်း တစ်လျှောက်၌ ဒီရေတော၊ သန္တာကျောက်တန်းနှင့် ပင်လယ်မြက်ခင်းဂေဟစနစ်များကို ထိန်းသိမ်းကာကွယ်ခြင်းနှင့် သုတေသနပြုလုပ်ခြင်းတို့ကို ပိုမိုတိုးမြှင့်ဆောင်ရွက်နိုင်ရန် ဒီရေတောနှင့် ကမ်းရိုးတန်းဂေဟစနစ်များ ထိန်းသိမ်းရေးဆိုင်ရာ နိုင်ငံတကာအဖွဲ့အစည်းတစ်ခုဖြစ်သည့် ‘‘အနာဂတ်အတွက် ဒီရေတောများအဖွဲ့ (Mangroves for the Future)’’ တွင် အဖွဲ့ဝင်အဖြစ် ပူးပေါင်းဆောင်ရွက်ရန် လုပ်ဆောင်လျက်ရှိပြီး ဒီရေတောဌာနသစ်တစ်ခုကို ဖွဲ့စည်းရန် လုပ်ဆောင်လျက်ရှိသည်။
ထို့အပြင် ဒီရေတောကြိုးဝိုင်း၊ ကြိုးပြင် ကာကွယ်တောစုစုပေါင်း ၁၃ ခု၊ ဧရိယာပေါင်း ၈၃၉,၉၈၀ ဧကကို ထူထောင်ထားရှိပြီး ဒီရေတောဂေဟစနစ်၊ သန္တာကျောက်တန်းဂေဟစနစ်နှင့် ပင်လယ်ပြင် မြက်ခင်းဂေဟစနစ်များ ပါဝင်သော သဘာဝနယ်မြေလေးခုကို ကာကွယ်ထားရှိကြောင်း သိရသည်။
Credit : 7Day Daily
