ဒဂုံမြို့သစ်မြောက်ပိုင်း၊ ၄၂ ရပ်ကွက် ဗိုလ်မင်းရောင်လမ်းရှိ ဗိုလ်မင်းရောင်တန်ဖိုးမျှတအိမ်ရာစီမံကိန်းရှိ အိမ်ရာများ ဒုတိယအကြိမ် မဲနှိုက်ပေးမှုကို ဇွန်၂၄ ရက် နံနက်ပိုင်းက ရန်ကုန်မြို့၊ ရှင်စောပုလမ်းရှိ Myanmar Event Park တွင်ပြုလုပ်ခဲ့သည်။
ယခုဒုတိယအကြိမ်မဲနှိုက်မှုမှာ အများပြည်သူ၊ အငြိမ်းစားဝန်ထမ်းနှင့် အသင်းအဖွဲ့များမှ ၀ယ်ယူခွင့်လျှောက်ထားသူ ၅၇၀၀ ကျော်ရှိခဲ့ပြီး တိုက်ခန်းပေါင်း ၃၅၀ ကို မဲနှိုက်ပေးခဲ့ခြင်းဖြစ်သည်။ ယခုလိုမဲနှိုက်မှုကို ရန်ကုန်တိုင်းဒေသကြီးအစိုးရအဖွဲ့နှင့် ရန်ကုန်မြို့တော်စည်ပင်သာယာရေးကော်မတီမှ တာဝန်ရှိသူများမှ မဲနှိုက်ပေးခဲ့ခြင်းဖြစ်သည်။ ယင်းကဲ့သို့ မဲနှိုက်မှုအတွက် လွဲမှားမှုတစ်စုံတစ်ရာရှိပါကလည်း သက်ဆိုင်ရာ စည်ပင်သာယာရေးကော်မတီမှ ပြန်လည်စိစစ်ပေးသွားမည်ဖြစ်ကြောင်း မဲနှိုက်မှုတွင်ပါဝင်ခဲ့သည့် ရန်ကုန်တိုင်းဒေသကြီး အထွေထွေအုပ်ချုပ်ရေးဦးစီးဌာန ညွှန်ကြားရေးမှူး ဦးနေ၀င်းအောင်ကဆိုသည်။
"ဒီနေ့ကတော့ အများပြည်သူ၊ အငြိမ်းစားဝန်ထမ်း၊ အသင်းအဖွဲ့တွေအတွက် တိုက်ခန်းပေါင်း ၃၅၀ ကို မဲနှိုက်ပေးတာဖြစ်ပါတယ်။ ပေါက်တဲ့လျှောက်လွှာတွေကို တိုင်းဒေသကြီးလွှတ်တော်ကိုတင်ပြကာ တိုင်းဒေသကြီးလွှတ်တော်ကအတည်ပြုပြီး စည်ပင်သာယာကိုပေးမယ်။ စည်ပင်သာယာက စာရင်းထုတ်ပြန်မယ်" ဟု ရန်ကုန်တိုင်းဒေသကြီး အထွေထွေအုပ်ချုပ်ရေးဦးစီးဌာန ညွှန်ကြားရေးမှူး ဦးနေ၀င်းအောင်က ပြောကြားသည်။
ယခုမဲနှိုက်မှုမှ ၀ယ်ယူခွင့်ရရှိသူများစာရင်းကို ရန်ကုန်တိုင်းဒေသကြီးအစိုးရအဖွဲ့သို့တင်ပြပြီး ထိုမှတစ်ဆင့် ရန်ကုန်မြို့တော်စည်ပင်သာယာရေးရုံးတွင် မကြာမီထုတ်ပြန်ပေးမည်ဖြစ်ကြောင်း သိရသည်။
"လျှောက်လွှာပုံစံတွေကို ထုတ်ယူပြီးတော့ လက်ရေးမူနဲ့ ဖောင်ဖြည့်ရတယ်။ အဲဒီမှာနှစ်ခုရှိတယ်။ ဘဏ်ချေးငွေနဲ့ဝယ်မလား၊ အရစ်ကျနဲ့ဝယ်မလား။ အန်တီကတော့ အရစ်ကျနဲ့ပဲဝယ်ယူဖို့ စာရင်းပေးခဲ့တယ်" ဟု တိုက်ခန်းဝယ်ယူခွင့်လျှောက်ထားသူ စည်ပင်ဈေးများဌာန၊ အငြိမ်းစားဝန်ထမ်းတစ်ဦးဖြစ်သူ ဒေါ်မြင့်မြင့်အေးက ပြောကြားသည်။
ဗိုလ်မင်းရောင်တန်ဖိုးမျှတအိမ်ရာတွင် တိုက်ခန်းပေါင်း ၆၀၀ ကျော်ပါဝင်မည်ဖြစ်ပြီး တိုက်ခန်းအမှတ် ယူ ၉၀၀ နှင့် ယူ ၆၀၀ ဟု အမျိုးအစားခွဲခြားထားသည်ဟု သိရသည်။ ယူ ၉၀၀ အမျိုးအစား၌ တိုက်အေနှင့် တိုက်ဘီဟု ခွဲခြားထားပြီး တိုက်အေမှာ အကျယ်အ၀န်း ၉၂၇ စတုရန်းပေရှိပြီး ဈေးနှုန်းကို ငွေကျပ် ၃၄၇ သိန်းသတ်မှတ်ထားကာ တိုက်ဘီအကျယ်အ၀န်းမှာ ၈၈၇ စတုရန်းပေရှိပြီး ဈေးနှုန်းမှာ ငွေကျပ် ၃၂၉ သိန်း သတ်မှတ်ထားသည်။
ဗိုလ်မင်းရောင်တန်ဖိုးမျှတအိမ်ရာစီမံကိန်းတိုက်ခန်းများ မဲနှိုက်ပေးမှုမှာ ဒုတိယအကြိမ်ဖြစ်ပြီး ပထမအကြိမ် မဲနှိုက်ပေးမှုကို ပြီးခဲ့သည့်ဇွန် ၇ ရက်က ပြုလုပ်ခဲ့ကာ လုပ်သက် ၂၀ နှစ်နှင့်အထက် ၀န်ထမ်းများကို မဲနှိုက်ပေးခဲ့ခြင်းဖြစ်သည်။
Credit: Eleven Media Group
