ယခင် အစိုးရ အဆက်ဆက်လက်ထက်တွင် မသမာသော ဝန်ထမ်းအချို့၏ဥပဒေမဲ့ဆောင်ရွက်ခဲ့မှုများ၊ အထက်အဆင့်ဆင့် တာဝန်ရှိသူများ၏ ကြီးကြပ်မှု အားနည်းခဲ့မှုများစသည့် အမှားများကြောင့် ယခုအစိုးရ လက်ထက်တွင်လည်း မြေယာအရှုပ်အရှင်းများ၊ ပိုင်ဆိုင်မှုဆိုင်ရာ ပြဿနာများ ဖြစ်ပွားရခြင်းဖြစ်သဖြင့် ယင်းအခြေအနေများကိုပြန်လည်သုံးသပ်ကာ ဆောင်ရွက်ပေးသွားမည်ဖြစ်ကြောင်း မြို့ရွာနှင့် အိုးအိမ်ဖွံ့ဖြိုးမှု ဦးစီးဌာန ညွှန်ကြားရေးမှူးချုပ်ဦးမင်းထိန်က ပြောသည်။
”ပြီးခဲ့တဲ့ ခေတ်ကာလတွေတုန်းက ကိုယ့်ရဲ့ ဝန်ထမ်းတွေကလည်း ဥပဒေနဲ့မညီတဲ့ ချိုးဖောက်မှုတွေ လုပ်ခဲ့ပါတယ်။ အထက် တာဝန်ရှိသူတွေကလည်း ဒီကိစ္စတွေအပေါ်မှာ ကြီးကြပ်မှု အားနည်းခဲ့ပါတယ်။ တချို့ ဝန်ထမ်းတွေ မလိမ့်တစ်ပတ်နဲ့ ချထားပေးခဲ့တာတွေကို ကိုယ့်ရဲ့ဝန်ထမ်းတွေကလည်း မသိလိုက်ဘဲ လုပ်လိုက် ရသလို ဖြစ်သွားပါတယ်။ အဲဒီကိစ္စတွေကို နောက်ပိုင်းမှာ ပြန်လည်သုံးသပ်ပြီး အကောင်းဆုံးဖြစ်အောင် ဆောင်ရွက်ပေးသွားမှာ ဖြစ်ပါတယ်” ဟု ၎င်းက ပြောသည်။
ခေတ်အဆက်ဆက်တွင် မြေသိမ်းခံခဲ့ရသည့် ပြည်သူများက ယင်းတို့၏ ပိုင်ဆိုင်မှုများကို ပြန်လည်ရယူ ရန် အရေးဆိုမှုများ ပြုလုပ်လျက်ရှိသော်လည်း အခြေအနေ၊ အချိန်အခါ၊ ပထဝီအနေအထား ပြောင်းလဲမှုနှင့် ပိုင်ဆိုင်မှုဆိုင်ရာ နောက်ကြောင်း ရာဇဝင်များကို ပြန်လည်စိစစ်ကာ နစ်နာသူများအတွက် ဖြေရှင်းပေးနိုင်ရန် ဆိုသည်မှာ များပြားသော လုပ်ထုံးလုပ်နည်းများကို ဖြတ်ကျော်ရမည် ဖြစ်သည့်အပြင် ပါဝင်ပတ်သက်မှု များရှိခဲ့သည့် ဝန်ကြီးဌာနများ၊ တပ်မတော်အဖွဲ့အစည်းနှင့် မြေသိမ်းခဲ့သည့် ကုမ္ပဏီကြီးများအနေဖြင့် ဥပဒေနှင့်အညီ အတူတကွပူးပေါင်းပါဝင်ကူညီဆောင်ရွက်ပေးရန် လိုအပ်လျက်ရှိသဖြင့် ထိုသို့ အားလုံး ပြေလည်နိုင်ရေးအတွက် ဆောင်ရွက်ရန်မှာ အလှမ်းကွာဝေးလျက်ရှိနေဆဲဖြစ်သည်။
”ဖြစ်ပေါ်ခဲ့တဲ့ အခြေအနေတွေကို လက်ရှိဥပဒေတွေနဲ့သွားဖို့ ခက်နေသေးတဲ့ အခြေအနေပါ။ ဒါတွေကို ပြန်ပြီး သုံးသပ်သွားမှာပါ” ဟု ဦးမင်းထိန်က ဆက်လက်ပြောသည်။
ဝန်ကြီးဌာနများနှင့် တပ်မတော်က ပုဂ္ဂလိကကုမ္ပဏီများနှင့်ပေါင်းကာ လယ်ယာမြေများကို လျော်ကြေး လုံးဝမပေးဘဲ ဥပဒေမဲ့သိမ်းပိုက်ခဲ့ခြင်းများ၊ မဆိုစလောက်သောလျော်ကြေးငွေမျှသာ ပေးအပ်ကာ အတင်း အကျပ် သိမ်းယူခဲ့ခြင်းများ စသည့်ဖြစ်စဉ်တို့ ယခင်အစိုးရအဆက်ဆက်လက်ထက်တွင် ပြုလုပ်ခဲ့သဖြင့် ယခု အစိုးရလက်ထက်၌ ထိုသို့ အဓမ္မအသိမ်းခံခဲ့ရသော မြေရှင်များကမိမိတို့သဘောမပါဘဲ လက်လွှတ်ခဲ့ရသော မြေများကို ပြန်လည်ရရှိရန် အရေးဆိုတောင်းခံနေသော ဆန္ဒထုတ်ဖော်ပွဲများ ပြုလုပ်လာနေကြသည်။ ထိုသို့ တောင်းခံလျက်ရှိကြသော မြေယာမူလပိုင်ဆိုင်သူ လယ်သမားများအနေဖြင့် ယခင်ပိုင်ဆိုင်မှု အထောက်အထား များ အပြည့်အဝလက်ဝယ်ရှိထားကြပြီး မိမိတို့မြေယာများ မိမိတို့လက်ဝယ်သို့ တရားသဖြင့် ပြန်လည်ရောက် ရှိလာစေရန် ဆောင်ရွက်လိုကြခြင်းသာ ဖြစ်သည်။
ထိုသို့ ဆန္ဒထုတ်ဖော်ပွဲများ၊ အရေးဆိုပွဲများ နေ့စဉ်နှင့်အမျှ ဆိုသလိုဖြစ်ပေါ်နေရခြင်းမှာ ယခင်အစိုးရ အဆက်ဆက်လက်ထက် တာဝန်ရှိသူများ၏ ဥပဒေမဲ့ဆောင်ရွက်မှုကြောင့် ဖြစ်ပွားခဲ့ရခြင်းသာ ဖြစ်ကြောင်း မြေသိမ်းခံလယ်သမားများက ပြောသည်။
”အရင် အိုးအိမ်ဦးစီးဌာန ညွှန်ချုပ် ဦးအံ့ကျော် လက်ထက်တုန်းကကျွန်တော်တို့လယ်ကိုသိမ်းတာ တစ် ဧက ၂ဝ,ဝဝဝ ပဲ ရတယ်။ သူပြောတာက လျော်ကြေးယူမလား၊ ဟိုမှာရပ်ထားတဲ့ အချုပ်ကားပေါ် တက်မလား လို့ ဆိုပြီး ကျွန်တော်တို့လယ်တွေကို သိမ်းခဲ့တယ်” ဟု လယ်မြေများအဓမ္မအသိမ်းခံခဲ့ရသည့် သီလဝါ ဒေသခံ လယ်သမားကြီး ဦးမြင့်လှိုင်က မြန်မာဂျာနယ်လစ်ကွန်ရက်ရုံးခန်းတွင် ပြုလုပ်ခဲ့သည့် စာနယ်ဇင်းရှင်းလင်းပွဲ၌ ပြောသည်။
အစိုးရစီမံကိန်းလုပ်ငန်းကြီးများ၊ ကုမ္ပဏီကြီးများ၏ စိုက်ပျိုးရေး စီမံကိန်းကြီးများအတွက် မြေနေရာများ ရယူသိမ်းပိုက်ခဲ့ရာတွင် လယ်ယာမြေများသာမက ဥယျာဉ်ခြံမြေများ၊ ရွာမြေများပါ သိမ်းပိုက်ခံခဲ့ရပြီး လျော်ကြေး မရရှိသူများမှာ အများစု ဖြစ်သည့်အတွက် လုပ်ကိုင်စားစရာ မြေကွက်နှင့် နေထိုင်စရာ နေရာထိုင်ခင်း မပြည့်စုံမှုကြောင့် မြို့ကြီးများအနီး ကျူးကျော်နေထိုင်သူများဘဝဖြင့် အသက်ရှင်ရပ်တည်ရေးအတွက် ရုန်းကန် ဖြတ်ကျော်ခဲ့ရသည်။ ပွင့်လင်းလွတ်လပ်မှု အထိုက်အလျောက်ရှိလာပြီဖြစ်သော ယခုအစိုးရလက်ထက်တွင် နစ်နာသူများက အခြေခံလုပ်သားပြည်သူများအရေး ဆောင်ရွက်ပေးလျက်ရှိသည့် နိုင်ငံရေးပါတီများနှင့် လူမှုရေးအသင်းအဖွဲ့များမှတစ်ဆင့် တာဝန်ရှိသူများ သိစေရေးအတွက် တိုင်တန်း အရေးဆိုမှုများပြုလုပ်လာ လျက်ရှိသည်။
”ကျွန်တော့ခြံကို အမြန်လမ်းနဲ့မလွတ်လို့ဆိုပြီး သိမ်းသွားတုန်းကလျော်ကြေး တစ်ပြားမှ မရခဲ့ပါဘူး။ အစိုးရအဆက်ဆက် အခွန်ဆောင်ထားတဲ့ စာရွက်တွေလည်း အခုထိ ကျွန်တော့မှာ ရှိသေးတယ်။ အခုခွပ် ဒေါင်းပါတီကို ဒီကိစ္စ တိုင်ထားပြီးပါပြီ။ သူတို့က လိုက်လုပ်ပေးမယ် လို့တော့ ပြောတယ်” ဟု ရန်ကုန်-မန္တလေး အမြန်လမ်းမကြီး ဘေးရှိဘိုကုန်ကျေးရွာမှ တောင်သူ ဦးအုံးလှိုင်က ပြောသည်။
Credit : The Trade Times
