ယခင်နှစ်က အိမ်ခြံမြေဈေးနှုန်းထိန်းချုပ်မှုများ အတင်းကြပ်ဆုံး ပြုလုပ်ခဲ့သည့် မြို့များဖြစ်သော ဟောင်ကောင်နှင့် စင်္ကာပူတို့တွင် အိမ်ခြံမြေကုမ္ပဏီများသည် ပြည်တွင်းဈေးကွက် ကောင်းမွန်မှု မရှိခြင်းကြောင့် အမေရိကား၊ တရုတ်နှင့် အင်္ဂလန်တို့ကို အာရုံစိုက်လာကြသည်။
ယခင်နှစ်က အမေရိကန် ကယ်လီဖိုးနီးယားပြည်နယ်၏ အမြင့်ဆုံးအဆောက်အဦးကိုဝယ်ယူရန် သဘောတူညီမှုများ ပြုလုပ်ခဲ့သည့် စင်္ကာပူကုမ္ပဏီ OUE Ltd သည် အမေရိကန်သို့ ဖြန့်ကျက်သည့်အနေဖြင့် နယူးယောက်နှင့်မိုင်ယာမီတို့တွင်လည်း ရင်းနှီးမြှပ်နှံမှုများပြုလုပ်ရန် ချိန်ဆနေသည်။
ဈေးဝယ်ကုန်တိုက်ကြီးများနှင့် လူနေအိမ်ရာများကို ဆောက်လုပ်သော ဟောင်ကောင်ကုမ္ပဏီ Wharf Holding Ltd. သည်လည်း အနည်းဆုံးတရုတ်ပြည်မကြီး၏မြို့ပေါင်း ၁၄ ခုတွင် ဖြန့်ကျက်မှုများ ပြုလုပ်တော့မည်ဖြစ်ပြီး စင်္ကာပူကုမ္ပဏီ Oxley Holdings Ltd. က လန်ဒန်တွင် အိမ်ပေါင်း ၃၄၀၀ ကို အစီအစဉ်ဆွဲထားသည်။
ဇိမ်ခံလူနေအိမ်များဝယ်ယူရန် အာရှတွင် ဈေးအကြီးဆုံး မြို့များဖြစ်သော ဟောင်ကောင်နှင့်စင်္ကာပူတို့၏ အိမ်ခြံမြေ ကုမ္ပဏီများသည် ငွေချေးဌားမှုများကို အစိုးရမှတင်းကြပ်လာခြင်းနှင့် ပြည်တွင်းအပေါင်နှုန်းထားများ မြင့်တက်လာခြင်းတို့ကြောင့် နိုင်ငံခြားသို့ ထွက်လာကြခြင်းဖြစ်သည်။
၂၀၁၃တွင် ဟောင်ကောင်၏ အိမ်ရောင်းအားမှာ ယခင်နှစ် ကထက် ၃၈ ရာခိုင်နှုန်းကျဆင်းခဲ့ပြီး ယခုနှစ်တွင်လည်း အရင်တိုင်းပဲ ဆက်ရှိနေမည်ဖြစ်ကြောင်း အိမ်ခြံမြေပွဲစားကုမ္ပဏီ Jones Lang LaSalle Inc. က ပြောကြားခဲ့သည်။ စင်္ကာပူနိုင်ငံတွင် အိမ်ခြံမြေပွဲစားကုမ္ပဏီ UOB-Kay Hian Pte. ၏အဆိုအရ ၂၀၁၃ တွင် ၃၅ ရာခိုင်နှုန်းကျခဲ့ပြီးနောက် ယခုနှစ်တွင်လည်း ၃၀ ရာခိုင်နှုန်းကျဆင်းနိုင်သည်ဟုဆိုသည်။
အာရှအိမ်ခြံမြေကုမ္ပဏီတွေက ပိုဖွံဖြိုးမယ့် ဈေးကွက်ဆီ သွားနေကြပါပြီ။ ပိုပြီးလုပ်လို့ကောင်းမယ့် ရင်းနှီးမြှပ်နှံမှု ဈေးကွက်တွေမှာ လုပ်ကိုင်ဖို့နဲ့ ဆုံးရှုံးမှုတွေကိုလျှော့ချဖို့မှာ သူတို့ကို အကူအညီဖြစ်စေပါတယ်” ဟု စင်္ကာပူနိုင်ငံမှ Knight Frank LLP ၏ အာရှပစိဖိတ်သုသေတန ဒါရိုက်တာ နစ်ကိုးလတ်စ်ဟော့ က ပြောကြားခဲ့သည်။ ဒေသတွင်းရှိ ထိပ်တန်း အိမ်ခြံမြေများသည် အလွန်ထိရောက်သော ဈေးကွက်ကိုင်တွယ်မှုများကို ခံခဲ့ရပြီး ဟောင်ကောင်နှင့် စင်္ကာပူတို့မှာ အများဆုံးခံခဲ့ရကြောင်း ၄င်းကပြောကြားသည်။
www.iMyanmarHouse.com
