အမေရိကန်နိုင်ငံသားတစ်ဦး တရုတ်ပြည်တွင် ၁၅ နှစ်တာ ကွန်ဖူးကျင့်ခဲ့ပြီးနောက် အမြဲအခြေချနေထိုင်ခွင့် PR ရရှိခဲ့သည့်အပြင် ဝူတန်ဂိုဏ်း၏ သိုင်းသူရဲကောင်းဖြစ်လာမှု တရုတ်ပြည်၌ သတင်းကြီးနေ

တရုတ်ပြည်တွင် ပြီးခဲ့သော ၁၅ နှစ်တာကာလအတွင်း ကွန်ဖူးလေ့ကျင့်ရင်း တာအိုဘာသာ လေ့လာခဲ့သော အမေရိကန် အမျိုးသားတစ်ဦးသည် တရုတ်ပြည်၌ အမြဲအခြေချနေထိုင်ခွင့် (PR) ရရှိသွားခဲ့သည်။

ထိုသို့ တရုတ်ပြည်တွင် အမြဲအခြေချနေထိုင်ခွင့် ရရှိသွားမှုအပေါ် ပြည်မကြီး လူမှုကွန်ရက်သုံးစွဲသူများကြား နာမည်ကြီးနေကာ ဝိုင်းဝန်းချီးကျူးလျက်ရှိရာ၌ အမေရိကန်ဆိုင်ရာ တရုတ်သံအမတ်ကြီးလည်း အပါအဝင် ဖြစ်သည်။

“ဂုဏ်ယူပါတယ်။ အီလီနွိုက်စ်ပြည်နယ်၊ ကီဝါးနီး (Kewanee) မြို့က ဂျိတ်ခ် ပင်းနစ် (Jake Pinnick) ပါ။ သူဟာ ဝူတန်ဂိုဏ်းရဲ့ ၁၆ ဆက်မြောက်မျိုးဆက် တပည့်တစ်ဦး ဖြစ်ပါတယ်။ သူဟာ တရုတ်ပြည်မှာ အမြဲအခြေချနေထိုင်ခွင့်လက်မှတ် ရရှိသွားပါတယ်” ဟု သံအမတ်ကြီး ရှဲ့ ဖန်ကွန်း (Xie Fengon) က လူမှုကွန်ရက်တွင် ဧပြီလ ၆ ရက်က ရေးသားဖော်ပြခဲ့သည်။

“တရုတ်ပြည်ကို ကွန်ဖူးသင်ဖို့ ရည်ရွယ်ချက်နဲ့ အသက် ၂၀ အရွယ်မှာ ရောက်လာတဲ့ လူငယ်တစ်ဦးဟာ အခုချိန်မှာ တကယ့် သိုင်းသူရဲကောင်းတစ်ဦး ဖြစ်လာခဲ့ပါပြီ။” သံအမတ်ကြီး ရှဲ့သည် ဂျိတ်ခ် ပင်းနစ်၏ ဇာတ်ကြောင်းကို ယခင်ကလည်း ရေးသားမျှဝေခဲ့ဖူးသည်။

ဂျိတ်ခ်ပင်းနစ်၏ ဇာတ်ကြောင်းမှာ တရုတ်ယဉ်ကျေးမှုကို စိတ်ဝင်စားသည့် နိုင်ငံခြားသားများအနက် အကောင်းဆုံး သာဓကတစ်ခုလည်း ဖြစ်သည်။

(▲ ဂျိတ်ခ် ပင်းနစ်က တရုတ်ပြည်တွင် အမြဲအခြေချနေထိုင်ခွင့်လက်မှတ် ရရှိမှုအပေါ် ကျေးဇူးတင်ကြောင်း ပြောသည်။ ဓာတ်ပုံ-Douyin)

ဂျိတ်ခ် ပင်းနစ်သည် တရုတ်ပြည်သို့ ၂၀၁၀ ပြည့်နှစ်တွင် ရောက်ရှိလာခဲ့ပြီး ထိုစဉ်က အသက် ၂၀ အရွယ်သာ ရှိသေးသည်။

ပင်းနစ်သည် ထိုအချိန်ကတည်းက တရုတ်ပြည်အလယ်ပိုင်း ဟူဘေးပြည်နယ်ရှိ ဝူတန်တောင်တွင် ကွန်ဖူးပညာနှင့် တာအိုဘာသာတို့ လေ့လာဆည်းပူးခဲ့ကြောင်း Beijing Daily သတင်းဌာနက ဖော်ပြသည်။

ဝူတန်တောင်သည် တရုတ်ပြည်တွင် အထွတ်အမြတ်အထားခံရဆုံးနေရာများတွင် တစ်ခုအပါအဝင်ဖြစ်သည်။

ဝူတန်ဂိုဏ်းချုပ် ကျန်းစန်းဖုံး တီထွင်ခဲ့သော ထိုက်ကျိ ၁၃ ကွက်မှာ နာမည်ကြီးသည်။

((မှတ်ချက်။ အပိုင်း ၃၀ ရှိသော “ဝူတန်ရဲ့ ဂန္ထဝင်ရွှေဓား” ဇာတ်လမ်းတွဲတွင် ထိုက်ကျိ ၁၃ ကွက်အကြောင်း ထည့်သွင်းရိုက်ကူး ထားသည်))

(▲ ဝူတန်ရဲ့ ဂန္ထဝင်ရွှေဓား ဇာတ်လမ်းတွဲတွင် ကျန်းစန်းဖုံးအဖြစ် သရုပ်ဆောင်ထားသည့် ဇာတ်ကောင်ကို တွေ့ရပုံ)

(▲ ဝူတန်ရဲ့ ဂန္ထဝင်ရွှေဓား ဇာတ်လမ်းတွဲတွင် ဆရာဖြစ်သူ ကျန်းစန်းဖုံးအား ကျန်းဝူကျိက ထိုက်ကျိ ၁၃ ကွက် ကစားပြနေပုံ)

ဂျိတ်ခ် ပင်းနစ်က တရုတ်ပြည်တွင် အမြဲအခြေချနေထိုင်ခွင့်ရရှိခဲ့သည့် လက်မှတ်ကို ဧပြီလအစောပိုင်းက လူမှုကွန်ရက်တွင် မျှဝေခဲ့သည်။

အဆိုပါ ကတ်ကို တရုတ်ပြည်တွင် ကြယ်ငါးပွင့်ကတ်ဟုလည်း လူသိများသည်။

“တရုတ်ယဉ်ကျေးမှုကို ချစ်မြတ်နိုးတဲ့ နိုင်ငံခြားတစ်ယောက်အတွက် အကောင်းဆုံးအသိအမှတ်ပြု ခံရမှုပါပဲ။ ဒါကြောင့် ကျေးဇူးပြုပြီး ကျွန်တော့်ကို နိုင်ငံခြားသားလို့ ထပ်ပြီး မခေါ်ကြပါနဲ့တော့…” ဟု ၎င်းက အရွှန်းဖောက် ပြောကြားသည်။

ဂျိတ်ခ် ပင်းနစ်၏ တရုတ်အမည်မှာ လီကျိဂန်ဖြစ်ပြီး ဝူတန်ဂိုဏ်းမှ ဆရာသခင်တစ်ဦးက ရွေးချယ်ပေးသော နာမည်ဖြစ်သည်။

လီဟူသော အမည်ကို ကိုယ်တိုင်ရွေးချယ်ခဲ့ခြင်းဖြစ်ပြီး ကျိဂန်မှာ ဆရာပေးသော နာမည်ဖြစ်သည်။

ပင်းနစ်က လီဟူသောအမည်ကို ရွေးချယ်ထားခြင်းတွင် ရည်ရွယ်ချက်များရှိသည်။

တာအိုဘာသာတည်ထောင်သူ လောင်ဇူးနှင့် ဟောင်ကောင်အက်ရှင်မင်းသား ဘရုစလီတို့ကို ရည်စူးသောအားဖြင့် လီကို ရွေးချယ်ထားခြင်း ဖြစ်သည်။

ဝူတန်တောင်သို့ ဂျိတ်ခ်ပင်းနစ် ပထမဆုံး စတင်ရောက်ရှိလာစဉ်က ၎င်း၏ ရည်ရွယ်ချက်မှာ ကွန်ဖူးပညာ လေ့လာကာ ကျန်းမာရေးကောင်းမွန်လာစေရန်သာ ဖြစ်သည်။

ယင်းနောက် ဆရာသခင်တို့နှင့်အတူ တာအိုအယူဝါဒများ လေ့လာခြင်း၊ ကွန်ဖူးလေ့ကျင့်ခြင်းတို့ ပြုလုပ်ခဲ့ရာ ကွန်ဖူးသည် စိတ်ဖိအားများမှုကို ကုစားပေးနိုင်ကြောင်း တွေ့ရှိလာပြီး ကိုယ်ကျင့်တရားနှင့် self-development တို့အတွက် အထောက်အကူဖြစ်စေသည်ကို တွေ့လာသည်။

ယခုအခါ ဂျိတ်ခ် ပင်းနစ်သည် ဝူတန်ဂိုဏ်းတွင် ဆရာတစ်ဆူဖြစ်လာပြီး တရုတ်နိုင်ငံသားများသာမက နိုင်ငံခြားသားများကိုပါ ကွန်ဖူးပညာ လက်ဆင့်ကမ်း သင်ကြားပေးလျက် ရှိသည်။

အိမ်ခြံမြေ ကိစ္စအဝဝနှင့် ပတ်သက်၍ ဥပဒေအကြံပေးပညာရှင်များနှင့် ဆွေးနွေးတိုင်ပင်လိုပါက iMyanmarHouse.com (အိုင်မြန်မာဟောက်စ်ဒေါ့ကွန်း) ၏ ဖုန်းနံပါတ်များဖြစ်သော 09-268022352 , 09-966901767 သို့ ဆက်သွယ်နိုင်ပါသည်။ အသေးစိတ်ကြည့်ရန် ဤနေရာကို နှိပ်ပါ။

ရောင်းရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။

ငှားရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။

(iMyanmarHouse.com Team မှ ရေးသား ဖော်ပြသည်။)

Credit: iMyanmarHouse.com 

Ref: US man gains Chinese residency after 15 years in country, learns martial arts, Taoism Photo Credit-Douyin, 5 series