တောအုပ်ထဲမှ ထူးဆန်းသော ဂျက်လေယာဉ် ဟိုတယ်ကြီးတစ်ခုအကြောင်း

အကယ်၍ သင်သည် လေယာဉ်ဖြင့် ခရီးသွားနေစဉ် ကော့စတာရီကာရှိ တောအုပ်ကြီးတစ်ခုအတွင်းမှ 727 Fuselage Home ဟိုတယ်ကို ငုံ့ကြည့်မိမည်ဆိုပါက တောနက်အတွင်း ပျက်ကျနေသော လေယာဉ်ကြီးတစ်စင်းဟု မှတ်ထင်မိမည် ဖြစ်သည်။

စင်စစ်ကား အဆိုပါ 727 ဂျက်လေယာဉ်ကြီးသည် ကော့စတာရီကာ၏ အထူးခြားဆုံးဟိုတယ်တစ်ခု ဖြစ်ရုံမျှမက တစ်ကမ္ဘာလုံးရှိ အထူးခြားဆုံးဟိုတယ်များတွင်လည်း တစ်ခု အပါအဝင် ဖြစ်သည်။

၁၉၆၅ ခုနှစ်ထုတ် Boeing 727 လေယာဉ်ကြီးသည် တချိန်က ကမ္ဘာတဝန်း လူးလာပျံသန်းခဲ့ပြီး တောင်အာဖရိက လေကြောင်းလိုင်းအတွက် အလုပ်လုပ်ပေးခဲ့သည်။

ယင်းနောက် ကိုလံဘီယာနိုင်ငံ၏ အကြီးမားဆုံးလေကြောင်းလိုင်းဖြစ်သော Avianca Colombia သို့ ရောက်ခဲ့သည်။

နောက်ဆုံးတွင် San Jose ၌ စွန့်ပစ်ခံဘဝသို့ ဆိုက်ရောက်သွားသည်။

သို့သော် 727 ၏ တောက်ပသည့်နေ့ရက်များ မကုန်ဆုံးသေး။

လေကြောင်းဝါသနာအိုးအချို့က 727 ကို ကယ်တင်ကာ ဘဝသစ်သို့ ပို့ဆောင်ပေးရန် ဆုံးဖြတ်ခဲ့ကြသည်။

လေယာဉ်ကြီးကို ၅ ပိုင်းခွဲကာ Manuel Antonio အမျိုးသားဥယျာဉ်အနီးရှိ တောအုပ်ထဲသို့ သယ်ယူခဲ့ပြီး တမူထူးသော အပန်းဖြေအိမ်အဖြစ် ပြောင်းလဲခဲ့သည်။

((အိပ်ခန်း ၂ ခန်း၊ ရေချိုးခန်း ၂ ခန်း))

Fuselage Home ဟု အမည်ပေးထားသော လေယာဉ်အိမ်ကြီးတွင် အိပ်ခန်း ၂ ခန်း၊ ရေချိုးခန်း ၂ ခန်းပါဝင်ရာ အုပ်စုလိုက်သူငယ်ချင်းများ (သို့မဟုတ်) နေရာကျယ်ကျယ်ဝန်းဝန်းဖြင့် အပန်းဖြေလိုသည့် စုံတွဲများအတွက် အထူးသင့်တော်သည်။

လေယာဉ်အိမ်ကြီးအတွင်း အရက်ပုလင်းဟောင်းများကို recycle လုပ်ထားသည့် မီးလုံးများ၊ လက်မှုအနုပညာများ ပုံဖော်ထားသည့် သစ်ပရိဘောဂများထည့်ပေးထားခြင်းမှာ retro vibe မျိုး ခံစားရစေမည် ဖြစ်သည်။

((မီးဖိုဆောင်))

လေယာဉ်အိမ်ကြီး၏ အလယ်ဗဟိုတွင် ကြီးမားသော မီးဖိုဆောင်ကြီးတစ်ခုရှိပြီး တည်းခိုနေထိုင်စဉ်အတွင်း ချက်ပြုတ်စားသောက်ရန် လိုအပ်သည့်ပစ္စည်းကိရိယာအားလုံးရှိသည်။

Full-sized ရေခဲသေတ္တာ၊ freezer ၊ မီးဖို၊ အကင်ဖို၊ မိုက္ကရိုဝေ့ဖ်နှင့် ကော်ဖီအိုးတို့ ရှိသည်။

(လသာဆောင်များ))

မီးဖိုဆောင်တံခါးတစ်ခုမှ အပြင်သို့ထွက်လိုက်လျှင် အံ့မခန်း လသာဆောင်ရှိရာသို့ ရောက်မည် ဖြစ်သည်။

လသာဆောင်မှတဆင့် Manuel Antonio အမျိုးသားဥယျာဉ်ကို လှမ်းမျှော်တွေ့မြင်ရသည်။

အမျိုးသားဥယျာဉ်သို့ လေယာဉ်အိမ်မှ ကားမောင်းသွားလျှင် အချိန်တိုအတွင်း ရောက်သည်။

ထို့အပြင် လသာဆောင်မှတဆင့် တောအုပ်အတွင်းရှိ သစ်ကိုင်းများတွင် တွဲလွဲခိုနေသော မျောက်များ၊ ကျောက်ဆောင်ထူသော ကမ်းရိုးတန်းနှင့် ပြာလဲ့လဲ့ ပစိဖိတ်သမုဒ္ဒရာအတွင်းမှ တဝုန်းဝုန်းရိုက်ခတ်နေသော လှိုင်းလုံးများကို တွေ့မြင်ခံစားနိုင်မည် ဖြစ်သည်။

((ဧည့်ခန်း))

မီးဖိုဆောင်ကို ဖြတ်သွားလျှင် ဧည့်ခန်းဆီသို့ ရောက်မည် ဖြစ်သည်။

သက်သောင့်သက်သာရှိသော ကုလားထိုင်များနှင့် ရုပ်မြင်သံကြားစက်တစ်လုံးတို့ ရှိသည်။

ဧည့်ခန်းဆောင်တွင် ဂျင်အရက်ပုလင်းများကို recycle လုပ်ထားသည့် မီးလုံးများ၏ နွေးထွေးသောအလင်းဖျဖျ အောက်တွင် အပြင်ဘက်သစ်တောတွင် မုတ်သုန်မိုးများ ရွာသွန်းဖြိုးနေသည်ကို ကြည့်ရှုခံစားနိုင်သည်။

အိမ်ခြံမြေ ကိစ္စအဝဝနှင့် ပတ်သက်၍ ဥပဒေအကြံပေးပညာရှင်များနှင့် ဆွေးနွေးတိုင်ပင်လိုပါက iMyanmarHouse.com (အိုင်မြန်မာဟောက်စ်ဒေါ့ကွန်း) ၏ ဖုန်းနံပါတ်များဖြစ်သော 09-268022352 , 09-966901767 သို့ ဆက်သွယ်နိုင်ပါသည်။ အသေးစိတ်ကြည့်ရန် ဤနေရာကို နှိပ်ပါ။

ရောင်းရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။

ငှားရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။

(iMyanmarHouse.com Team မှ ရေးသား ဖော်ပြသည်။)

Credit: iMyanmarHouse.com

Ref: This Abandoned Plane Was Transformed into a Luxury Jungle Hotel  (creators)