တရုတ်ပြည်တွင် နာမည်ကြီး influencer အမျိုးသားက အိမ်အလုပ်များ လုပ်ဆောင်ရန်နှင့် အပြင်သွားရာတွင် အဖော်အဖြစ် လိုက်ပါပေးရန် စက်ရုပ်တစ်ရုပ်ကို ယွမ် ၁၀၀၀၀ ဖြင့် ငှားရမ်းထားမှု လူမှုကွန်ရက်သုံးစွဲသူတို့ အကြား နာမည်ကြီးနေ

တရုတ်ပြည်တွင် အိမ်အလုပ်များ လုပ်ကိုင်ရန်နှင့် အပြင်သို့ သွားလာရာတွင် အဖော်အဖြစ် လိုက်ပါပေးစေရန် အတွက် နာမည်ကြီး influencer တစ်ဦးက ယွမ် ၁၀၀၀၀ ဖြင့် ငှားရမ်းခဲ့မှုမှာ နာမည်ကြီးနေသည်။

နယူးယောက်တက္ကသိုလ်မှ စီးပွားရေးဖြင့် ကျောင်းပြီးခဲ့သော အသက် ၂၅ နှစ်အရွယ် ကျန်းကန်းယွမ် (Zhang Genyuan) အမည်ရှိ လူရွယ်တစ်ဦးသည် တရုတ်ပြည်မကြီးရှိ dating reality show တစ်ခုတွင် ၂၀၂၂ ခုနှစ်အတွင်း ပါဝင်ခဲ့ပြီးနောက် နာမည်ကြီးလာခဲ့သည်။

တရုတ်ပြည်တွင်း လူမှုကွန်ရက်တွင် ကျန်းကန်းယွမ်သည် follower ၁ ဒသမ ၄ သန်းရှိသည်။

လက်ရှိအားဖြင့် ကျန်းသည် ခရီးသွားအကြောင်းအရာများကို လူမှုကွန်ရက်တွင် မျှဝေလျက်ရှိသည်။

မတ်လ ၁၃ ရက်က ကျန်းသည် G1 စက်ရုပ်နှင့်အတူ တစ်နေ့တာဖြတ်သန်းခဲ့ပုံကို လူမှုကွန်ရက်တွင် ဗွီဒီယိုဖိုင်တစ်ခု မျှဝေခဲ့ရာ Like ပေးသူပေါင်း ၄၀၀၀၀ ကျော် ရှိခဲ့သည်။

G1 စက်ရုပ်ကို ဟန်ကျိုးမြို့အခြေစိုက် Unitree Robotics ကုမ္ပဏီက ထုတ်လုပ်ခြင်းဖြစ်ပြီး ယွမ် ၉၉၀၀၀ (ကန်ဒေါ်လာ ၁၃၆၅၇) ဖြင့် ပြီးခဲ့သောနှစ် မေလက စတင်ရောင်းချပေးခဲ့သည်။

စက်ရုပ်၏ အရပ်အမြင့်မှာ ၁၂၇ စင်တီမီတာ (၅၀ လက်မ) ဖြစ်ပြီး အလေးချိန်မှာ ၃၅ ကီလိုဂရမ် ရှိသည်။

G1 သည် ပေါ့ပါးဖျတ်လတ်ပြီး ကိုယ်ခံပညာ သိုင်းကွက်များပါ လျင်မြန်စွာ ကစားပြနိုင်ကြောင်း South China Morning Post သတင်းဌာနက ဖော်ပြသည်။

တရုတ်ပြည်တွင် G1 ဝယ်ယူထားသော စက်ရုပ်ပိုင်ရှင်များက အွန်လိုင်းမှတဆင့် စက်ရုပ်ကို ပြန်လည်အငှားချထားခြင်းများပြုလုပ်ကာ ဝင်ငွေရှာကြသည်။

ငှားရမ်းခ ဈေးတန်းမှာ တစ်ရက်လျှင် ယွမ် ၈၀၀၀ မှ ၁၆၀၀၀ ကြား (ကန်ဒေါ်လာ ၁၁၀၃ မှ ၂၂၀၇ ကြား) ရှိသည်။

သိပ္ပံဆန်းကြယ်ရုပ်ရှင်များတွင် စက်ရုပ်များနှင့်အတူနေထိုင်ပုံကို ကြည့်ရှုရပြီးနောက် ကျန်းက ကိုယ်တိုင် လက်တွေ့စမ်းသပ်ကြည့်ရန် ဆုံးဖြတ်ခဲ့သည်။

ဗွီဒီယိုထဲတွင် ကျန်းက စက်ရုပ်ကို ခလုပ်ဖွင့် (activate) လိုက်ရာ ချက်ချင်းပင် မတ်တပ်ထကာ မိမိကိုယ်ကို မိတ်ဆက်လာသည်။

“ဟဲလို…မစ္စတာကျန်း…တွေ့ရတာ ဝမ်းသာပါတယ်” ဟု G1 က နှုတ်ဆက်လိုက်ပြီးနောက် ၎င်းလုပ်ဆောင်နိုင်သည်များကို ပြောပြရာ ချက်ပြုတ်ခြင်း၊ သန့်ရှင်းရေးလုပ်ခြင်းနှင့် အပြင်သို့ သွားလာချိန်များတွင် အဖော်လိုက်ပေးခြင်းများ ပါဝင်လေသည်။

ကျန်းက မိမိမည်သူဆိုသည်ကို သိပါသလားဟု မေးရာတွင် G1 စက်ရုပ်က ကျန်း၏ အလုပ်အကိုင်နှင့် လူမှုကွန်ရက်တွင် follower မည်မျှရှိသည်ကို ပြောပြရုံမျှမက follower အင်အားများသည့်အပေါ် ချီးကျူးစကားပင် ပြောလိုက်သေးသည်။

ထိုအခါ ကျန်းက ရယ်လျက် “ငါ့အတွက် အလုပ်တောင် လုပ်မပေးရသေးဘူး။ မြှောက်ပင့်နေပြီ” ဟု မှတ်ချက်ပေးသည်။

သို့သော် G1 ၏ အိမ်အလုပ်လုပ်ပုံမှာမူ စိတ်ကျေနပ်ဖွယ် များစွာမကောင်းလှ။

ကြက်ဥခွဲရာတွင် ပရမ်းပတာနိုင်ခြင်း၊ ချက်ပြုတ်ချိန်တွင် နို့များ စင်ထွက်ခြင်း၊ တံမြက်စည်းလှည်းခြင်းနှင့် ကြမ်းတိုက်ခြင်းတို့တွင် ခက်ခက်ခဲခဲ လုပ်နေရခြင်း၊ ကျန်းကို မကြာခဏ ဝင်တိုက်မိခြင်းများ ဖြစ်နေသည်ကို တွေ့ရသည်။

ထိုသို့ အားနည်းချက်များရှိစေကာမူ စက်ရုပ်တစ်ရုပ်နှင့် ဖြတ်သန်းရမှု အတွေ့အကြုံမှာ ပျော်ရွှင်ဖွယ်ရာပင်။

ယင်းနောက် ကျန်းက G1 ကိုခေါ်ကာ လက်ချင်းချိတ်ပြီး အပြင်သို့ လမ်းလျှောက်ထွက်ခဲ့ရာ လမ်းမှ အတားအဆီးများကို ညွှန်ပြပေးနိုင်ရုံမျှမက ကျန်း၏ဘေးမှ အတူလိုက်၍ ပြေးပေးနိုင်သည်။

G1 ကို ကပြခိုင်းသောအခါ မကြာခဏ ဟန်ချက်ထိန်းမရ ဖြစ်တတ်သည်ကို တွေ့ရသည်။

သို့သော် G1 က ထိုသို့ဖြစ်တိုင်း ကျန်းကို တောင်းပန်စကားဆိုလေ့ရှိသည်။

“ခင်ဗျား…ကျွန်တော့်ကို စိတ်မပျက်ဘူးဆိုတာ သိပါတယ်။ ကျွန်တော် ကောင်းကောင်း မလုပ်ဆောင်နိုင်ခဲ့ဘူး” ဟု G1 က ဆိုသည်။

G1 ၏ ရိုးသားမှုကို သဘောကျသွားသောကြောင့် ကျန်းက “ငါတော့ စိတ်လှုပ်ရှားစေဖို့အတွက်ဆိုရင် ချစ်သူကောင်မလေးတောင် မလိုတော့ဘူး” ဟု ပြော၏။

ယင်းနောက် ၎င်းတို့နှစ်ဦး၏ တစ်နေ့တာ ဖြတ်သန်းမှုမှာ အဆုံးသတ်တော့မည့် အချိန်သို့ နီးကပ်လာသည်။

ကျန်းက G1 နှင့်အတူ မြစ်ကမ်းဘေးတွင်ထိုင်ရင်း အအေးသောက်ကာ တစ်နေ့တာအတွေ့အကြုံကို ပြန်လည်တွေးတောနေမိသည်။

“ဒီစက်ရုပ်က ကျွန်တော့်ကို လုံးဝ အထီးမကျန်စေဘူး” ဟု ကျန်းက ပြောသည်။

ယင်းနောက် G1 က ကျန်းကို ဖက်ထားချိန်တွင် ကျန်းက ပြောဆိုလိုက်သော စကားတစ်ခွန်းဖြင့် ဗွီဒီယိုကို အဆုံးသတ်ထားသည်။

ကျန်းက ပြောသည်မှာ “ငါ..မနက်ဖြန် မင်းကို ပြန်အပ်ရတော့မယ်။ ငါတော့ မင်းကို လွမ်းနေရတော့မှာပဲ” ဟု ဆိုသည်။

လူမှုကွန်ရက်သုံးစွဲသူတစ်ဦးက မှတ်ချက်ပြုသည်မှာ “G1 က အိမ်အလုပ်တွေလုပ်တာ မတော်ဘူး။ ဒါပေမယ့် နားထောင်ပေးတတ်တဲ့ သူငယ်ချင်းကောင်းတစ်ယောက်ပါပဲ” ဟု ဆိုသည်။

အခြားတစ်ဦးက အရွှန်းဖောက် မှတ်ချက်ပြုသည်မှာ “တစ်ရက်ကို ယွမ် ၁၀၀၀၀ တောင် ပေးရတာလား။ မစ္စတာကျန်းရေ…ကျွန်မကိုသာ ငှားလိုက်ပါ။ တစ်ရက်ကို ယွမ် ၈၀၀ ပဲပေး။ ချက်ပြုတ်၊ သန့်ရှင်းရေးလုပ်ပေးမယ့်အပြင် ကလေးတွေရဲ့ အိမ်စာတွေပါ ကူလုပ်ပေးနိုင်ပါတယ်” ဟု ဆိုသည်။

တရုတ်ပြည်တွင် စက်ရုပ်ငှားသည့်အလုပ်မှာ အလွန်ခေတ်စားလာနေသည်။

ပြီးခဲ့သော ဖေဖော်ဝါရီလအတွင်းက တရုတ်ပြည်တောင်ပိုင်းတွင် စက်ရုပ်များနှင့်အတူ ကင်းလှည့်နေသော ရဲတပ်ဖွဲ့ဝင်များကို တွေ့ခဲ့ရဖူးသည်။

အိမ်ခြံမြေ ကိစ္စအဝဝနှင့် ပတ်သက်၍ ဥပဒေအကြံပေးပညာရှင်များနှင့် ဆွေးနွေးတိုင်ပင်လိုပါက iMyanmarHouse.com (အိုင်မြန်မာဟောက်စ်ဒေါ့ကွန်း) ၏ ဖုန်းနံပါတ်များဖြစ်သော 09-268022352 , 09-966901767 သို့ ဆက်သွယ်နိုင်ပါသည်။ အသေးစိတ်ကြည့်ရန် ဤနေရာကို နှိပ်ပါ။

ရောင်းရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။

ငှားရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။

(iMyanmarHouse.com Team မှ ရေးသား ဖော်ပြသည်။)

Credit: iMyanmarHouse.com

Ref: China influencer splurges over RM6k to rent a robot for house chores and a “date”