လော့စ်အိန်ဂျလိတွင် တောမီးသင့်ခဲ့သောနေရာများရှိ မြေကွက်များ အရောင်းသွက်နေ

မိမိ၏ နေရာဟောင်းတွင် ပြန်လည်အခြေမချနိုင်တော့ကြောင်း ဟူဂို ဒါလင်ဂါတစ်ယောက် သုံးသပ်မိသည်။

လော့စ်အိန်ဂျလိခရိုင်၊ Altadena အရပ်ရှိ သူ၏ ဖြူလွလွတိုက်အိမ်မှာ ဇန်နဝါရီလအတွင်းက လောင်ကျွမ်းခဲ့သော တောမီးထဲ ပါသွားသည်။

ထိုဒေသရှိ နေအိမ်အများစုမှာ တောမီးကြောင့် ပြာကျသွားသည်။

နေအိမ်ခြံနေရာဟောင်းတွင် ပြန်လည်အခြေမချတော့သည်မှာ တောမီးကြောင့်မဟုတ်။ အရာရာကို အစမှပြန်စရန် ဟူဂိုတွင် ငွေလိုသောကြောင့် ဖြစ်သည်။

ထို့ကြောင့် အိမ်ခြံမြေအကျိုးဆောင်မိတ်ဆွေတစ်ဦးထံ ဆက်သွယ်ကာ အကူအညီတောင်းရသည်။

အိမ်ခြံမြေအကျိုးဆောင် ရာမီရို ရီဗတ်စ်မှာ ကနဦးတွင် သို့လောသို့လော ဖြစ်နေသည်။ အိမ်ခြံမြေအကျိုးဆောင်အဖြစ် ၂၁ နှစ်တာ ဖြတ်သန်းခဲ့သည့် ဘဝတလျှောက် Altadena ဝန်းကျင်မှ နေအိမ်ပေါင်း ရာနှင့်ချီကာ ရောင်းပေးဖူးသည်။

သို့သော် မီးလောင်ထားသော မြေနေရာကိုမူ တစ်ခါမှ မရောင်းပေးဖူးသေး။ ရာမီရိုက စတုရန်းပေ ၁၀၅၀၀ ကျယ်ဝန်းကာ ပြာအတိလွှမ်းနေသော မြေကွက်ကို ဖေဖော်ဝါရီ ၃ ရက်တွင် အရောင်းတင်ပေးခဲ့သည်။

“မိမိလိုရာပုံဖော်နိုင်သည့် ကင်းဗတ်လွတ်တစ်ခုသဖွယ် အံ့မခန်းမြေနေရာ” ဟု ညွှန်းဆိုကာ အရောင်းဈေးကွက်တင်ခဲ့ခြင်း ဖြစ်သည်။

ရာမီရိုမှာ မီးလောင်မြေဖြစ်သောကြောင့် များစွာမျှော်လင့်မထားသော်လည်း ရက်အနည်းငယ်အတွင်း ဝယ်ယူရန် ကမ်းလှမ်းသူများစွာရှိလာရာ များစွာအံ့အားသင့်ခဲ့ရသည်။

အရောင်းဈေးကွက်တင်ပြီး ၉ ရက်အတွင်း မီးလောင်မြေကို ရာမီရို ရောင်းထုတ်ပေးနိုင်ခဲ့သည်။

ဟူဂိုတို့မိသားစုက အနီးရှိ Pasadena အရပ်မှ နေအိမ်ငယ်တစ်လုံးကို လက်ငင်းပေးချေငွေ ဒေါ်လာ ၆၀၃၀၀၀ ပေးကာ ဝယ်ယူခဲ့သည်။

ယင်းနောက်တွင်ကား ရာမီရိုသည် မီးလောင်မြေများစွာကို ဆက်လက်အရောင်းတင်ပေးတော့သည်။

“ကျွန်တော့်အတွက် တကယ့်ကို စိတ်ဒဏ်ရာရခဲ့ပါတယ်။” ဟု ဟူဂိုက ပြောသည်။

ဟူဂိုသည် အသက် ၇၀ ကျော်ပြီဖြစ်သော ဆရာဝန်တစ်ဦးဖြစ်ကာ မြေး ၁၂ ဦးအနက် အချို့ကို စောင့်ရှောက်ပေးနေသူ ဖြစ်သည်။

လွန်ခဲ့သော ၂ လခန့်က လောင်ကျွမ်းခဲ့သည့် လော့စ်အိန်ဂျလိတောမီးကြီးကြောင့် Altadena နှင့် Pacific Palisades တို့တွင် နေအိမ်ထောင်ပေါင်းများစွာ ပြာကျသွားခဲ့ပြီးနောက် မီးလောင်မြေများကို အုတ်အုတ်ကြက်ကြက် ဝယ်ယူလာကြမှုအပေါ် ဒေသတွင်း အိမ်ခြံမြေအကျိုးဆောင်များနှင့် အိမ်ခြံမြေလောက ကျွမ်းကျင်သူများမှာ များစွာ အံ့အားသင့်ကြရသည်။

အရောင်းအဝယ်ဖြစ်မှုနှင့် ဈေးနှုန်းမှာ အများခန့်မှန်းထားသည်ထက် မြင့်မားနေသည်။ မီးလောင်ထားသော အပျက်အစီးများကြောင့် အဝယ်တန့်မသွားဘဲ ပို၍ပင် အရောင်းသွက်နေသည်။

အိမ်ခြံမြေ ကိစ္စအဝဝနှင့် ပတ်သက်၍ ဥပဒေအကြံပေးပညာရှင်များနှင့် ဆွေးနွေးတိုင်ပင်လိုပါက iMyanmarHouse.com (အိုင်မြန်မာဟောက်စ်ဒေါ့ကွန်း) ၏ ဖုန်းနံပါတ်များဖြစ်သော 09-268022352 , 09-966901767 သို့ ဆက်သွယ်နိုင်ပါသည်။ အသေးစိတ်ကြည့်ရန် ဤနေရာကို နှိပ်ပါ။

ရောင်းရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။

ငှားရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။

(iMyanmarHouse.com Team မှ ရေးသား ဖော်ပြသည်။)

Credit: iMyanmarHouse.com

Ref: ‘Cash offers only’: After L.A. fires, scorched lots are selling fast