အင်္ဂလန်တွင် နေအိမ်အောက်၌ လျှို့ဝှက်ဆန်းကြယ်သော မြေအောက်ဥမင်လှိုဏ်ခေါင်းကွန်ရက်များရှိနေသည့် ၁၂ ရာစု နေအိမ်တစ်လုံး ပေါင် ၁,၀၀၀,၀၀၀ ဖြင့် အရောင်းဈေးကွက်ဝင်လာ

အင်္ဂလန်နိုင်ငံ၊ ကန့်ခရိုင်ရှိ နေအိမ်တစ်လုံးမှာ အပြင်ပန်းမှကြည့်လျှင်မူ သားနားထည်ဝါမှု မရှိ။

သို့သော် အဆိုပါနေအိမ်အောက်ဘက်ဆီတွင် မြေအောက် ပေ ၅၀ အနက်အထိ ထိုးဆင်း ဖြန့်ကျက်တည်ရှိသော ဥမင်လှိုဏ်ခေါင်းကွန်ရက်တစ်ခု ရှိနေသည်။

မြေအောက်ဥမင်လှိုဏ်ခေါင်းကွန်ရက်ဆီသို့ ခြံဝန်းအတွင်း ပန်းဥယျာဉ်ရှိ အံဖုံးတံခါးတစ်ခုမှ ဝင်ရောက်ရပြီး အံဖုံးကို ဖွင့်လိုက်လျှင် ကျဉ်းမြောင်းသို့ အုတ်လှေကားတစ်ခုက မြေအောက်ဆီသို့ ဦးတည်နေသည်ကို တွေ့ရမည် ဖြစ်သည်။

ဈေးကွက်တင် ဓာတ်ပုံများတွင် တွေ့ရမှုအရ အတော်ကျဉ်းမြောင်းသော ဥမင်များ ဖြစ်သည်ကို တွေ့ရသည်။

ကျောက်ခင်း လူသွားလမ်းကလေးများမှာ သေးငယ်ကျဉ်းမြောင်းရာ မွန်းကြပ်ပိတ်လှောင်မှုကို ကြောက်တတ်သည့် စိတ်ရောဂါရှိသူများနှင့်မူ မသင့်တော်ချေ။

ကန့်ခရိုင်၊ Sandwich မြို့တွင် တည်ရှိပြီး လက်ရှိအားဖြင့် ပေါင် ၁ သန်း ဈေးခေါ်ထားသည်။

(▲ မြေအောက်ဥမင်များဆီသို့ အံဖုံးတံခါးတစ်ခုမှတဆင့် ဝင်ရောက်နိုင်သည်။ ဓာတ်ပုံ-Fine & Country/ BNPS)

မြေအောက်ဥမင်ကွန်ရက်ကို မည်သည့်ကာလက ဆောက်လုပ်ခဲ့သည်ကို မသိရသော်လည်း နေအိမ်မှာမူ ၁၂ ရာစုကတည်းက ဆောက်လုပ်ခဲ့ခြင်း ဖြစ်သည်။

ဒေသ ဒဏ္ဍာရီများအရ စိန့်သောမတ်သည် အဆိုပါ ဥမင်များထဲတွင် ဘုရင် ဟင်နရီ ၂ ၏ ရန်မှ ပုန်းအောင်းခဲ့ဖူးသည်ဟု ဆိုသည်။

ကက်သလစ်ဘာသာ၏ သူတော်စင်တစ်ပါးဟု လူသိများသူ စိန့်သောမတ် (Thomas Becket) သည် အင်္ဂလန်ပြည့်ရှင် Henry II နှင့် မသင့်မမြတ်ဖြစ်ခဲ့ရာ ဘုရင်၏ နောက်လိုက်များက ၁၁၇၀ ပြည့်နှစ်တွင် လုပ်ကြံ သတ်ဖြတ်ခြင်းခံခဲ့ရသည်။

(▲ ကျဉ်းမြောင်းပိတ်လှောင်သည့်နေရာ ကြောက်ရွံ့သည့်စိတ်ရောဂါရှိသူများအတွက်မူ မသင့်တော်ချေ။ ဓာတ်ပုံ-Fine & Country/ BNPS)

ထူးခြားလှသည့် မြေအောက်ဥမင်များ ပါဝင်မှုအပြင် နေအိမ်အတွင်းတွင်လည်း ရှေးခေတ်ဟောင်း လက်ရာများ များစွာ တွေ့ရရာ ထုတ်တန်းဖော် မျက်နှာကြက်များ၊ မီးလင်းဖိုများ၊ မူရင်းအမိုးနှင့် ကြမ်းခင်းများ အပါအဝင် ဖြစ်သည်။

ထို့အပြင် မူရင်းလက်ရာ ဂျော်ဂျီယာ ရှေ့တံခါးမကြီး၊ ပြတင်းပေါက်များနှင့် ဝက်သစ်ချသား လှေကားများလည်း ရှိသည်။

နေအိမ်အကျယ်အဝန်းမှာ ၂၅၃၁ စတုရန်းပေရှိပြီး မီးဖိုဆောင်၊ မနက်စာစားခန်း၊ ညစာစားခန်း၊ နားနေခန်း၊ ဧည့်ခန်း၊ အိပ်ခန်း ၅ ခန်းနှင့် ရေချိုးခန်း ၂ ခန်းပါသည်။

ခြံဝန်းအတွင်း ကား ၄ စင်းရပ်နားနိုင်သောနေရာ၊ ဂိုဒေါင်၊ အတော်အတန် ကျယ်ဝန်းသော ပန်းဥယျာဉ်တို့ ရှိသည်။

ပန်းဥယျာဉ်တွင် ရေကန်၊ သစ်ပင်အိမ်နှင့် ဝိတိုရိယခေတ်မြင်းဇောင်းတစ်ခုတို့ တွေ့ရသည်။

(▲ မြေအောက်ဥမင်များ။ ဓာတ်ပုံ-Fine & Country/ BNPS)

(▲ နေအိမ်မှာ ၁၂ ရာစုက ဆောက်လုပ်ခဲ့သောအိမ်ဖြစ်သည်ဟု ယူဆရသည်။ ဓာတ်ပုံ-Fine & Country/ BNPS)

(▲ မြေအောက်ဥမင်မှာ လမ်းများ၊ ကွင်းပြင်များ၊ ရွာအတွင်းရှိ နေအိမ်များအောက်မှ ဖြတ်သန်းကာ ရှည်လျားစွာ ဖောက်လုပ်ထားသည်။ ဓာတ်ပုံ-Fine & Country/ BNPS)

(▲ အနီးရှိ Sandwich မြို့တွင် အလယ်ခေတ် အဆောက်အအုံများ များပြားစွာ တွေ့ရနိုင်သည်။ ဓာတ်ပုံ-Fine & Country/ BNPS)

(▲ နေအိမ်အတွင်းပိုင်း မွမ်းမံထားပုံ။ ဓာတ်ပုံ-Fine & Country/ BNPS)

အိမ်ခြံမြေ ကိစ္စအဝဝနှင့် ပတ်သက်၍ ဥပဒေအကြံပေးပညာရှင်များနှင့် ဆွေးနွေးတိုင်ပင်လိုပါက iMyanmarHouse.com (အိုင်မြန်မာဟောက်စ်ဒေါ့ကွန်း) ၏ ဖုန်းနံပါတ်များဖြစ်သော 09-268022352 , 09-966901767 သို့ ဆက်သွယ်နိုင်ပါသည်။ အသေးစိတ်ကြည့်ရန် ဤနေရာကို နှိပ်ပါ။

ရောင်းရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။

ငှားရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။

(iMyanmarHouse.com Team မှ ရေးသား ဖော်ပြသည်။)

Credit: iMyanmarHouse.com

Ref: This £1,000,000 property in Kent hides a mysterious underground tunnel network Photo Credit- Fine & Country/ BNPS