တောင်ကိုရီးယားတွင် အမျိုးသမီးတစ်ဦးက ဝမ်ငွေ ၂၆ သန်းကို အမှိုက်များနှင့်ရောကာ မတော်တဆ လွှင့်ပစ်မိရာ စည်ပင်ဝန်ထမ်းများက ၈ နာရီခန့် အချိန်ယူကာ အမှိုက်ပုံထဲမှ တစ်ရွက်ချင်း လိုက်ကောက် ပေးခဲ့ရပုံ

တောင်ကိုရီးယားနိုင်ငံတွင် အမျိုးသမီးတစ်ဦးသည် သားဖြစ်သူကို ခွဲစိတ်ကုသပေးရန် စုဆောင်းထားသော ဝမ်ငွေ ၂၆ သန်း (ကန်ဒေါ်လာ ၁၈၀၀၀) အား အမှိုက်များနှင့်အတူ မတော်တဆ လွှင့်ပစ်ခဲ့မိသည်။

စည်ပင်သာယာရေးဌာနက ဝန်ထမ်းများက အမှိုက်ပုံကြီးအတွင်း နာရီပေါင်းများစွာ ဝိုင်းဝန်းရှာဖွေပေးခဲ့ကြကာ အပြန်အလှန်အနေဖြင့် မည်သည့်အရာမှ အကျိုးခံစားခွင့် မတောင်းခံခဲ့ကြ။

ဝမ် ၂၆ သန်းကို လွှင့်ပစ်မိသော အမျိုးသမီးကြီးမှာ အသက် ၆၀ ကျော်အရွယ်ဖြစ်ပြီး တောင်ကိုရီးယားနိုင်ငံ၊ Sejong မြို့တွင် နေထိုင်သူ ဖြစ်သည်။

မြို့မှ အရာရှိတို့က ပြောသည်မှာ ဖေဖော်ဝါရီလ ၂၄ ရက်၊ မနက် ၁၀ နာရီခန့်တွင် ထိတ်လန့်တုန်လှုပ်နေသည့် အသံဖြင့် ဖုန်းဆက်လာသူတစ်ဦးရှိကြောင်း ပြောသည်။

အဆိုပါ ဖုန်းဆက်သွယ်မှုကို အစိုးရဝန်ထမ်းတစ်ဦးဖြစ်သူ Kang Hyun-kyu က လက်ခံဖြေကြားပေးခဲ့ခြင်း ဖြစ်သည်။

ဖုန်းခေါ်ဆို ဆက်သွယ်သူမှာ စည်ပင်ရုံးအနီး လူနေတိုက်ခန်းတစ်ခုတွင် နေထိုင်သော အမျိုးသမီးကြီးတစ်ဦး ဖြစ်သည်။

၎င်းက ပြောပြသည်မှာ အိမ်ရာရှိ အမှိုက်စွန့်ပစ် စက်ထဲသို့ ငွေထုပ်ကို မှားယွင်းလွှင့်ပစ်ခဲ့မိသည်ဟု ဆိုသည်။

တောင်ကိုရီးယားရှိ လူနေအိမ်ရာအချို့တွင် အမှိုက်စွန့်ပစ် စနစ်တစ်ခုရှိသည်။

အမှိုက်ထုပ်များကို ဖုန်စုပ်စက်ကဲ့သို့ စုပ်ယူလိုက်ပြီး မြေအောက်ပိုက်လိုင်းမှတဆင့် ဗဟိုအမှိုက်ချေဖျက်သည့် နေရာသို့ ပို့ဆောင်ပေးလိုက်သည်။

ထိုအခါ မေးခွန်းဖြေကြားပေးသူ Kang Hyun-kyu က အဆိုပါအမှိုက်ကို process မလုပ်စေရန် ရပ်တန့်ပေးထားခဲ့သည်။

အမျိုးသမီးကြီးသည် အမှိုက်များကို ခြေဖျက်သည့် ဗဟို waste processing နေရာသို့ ကတိုက်ကရိုက် သွားရောက် ကြည့်ရှုခဲ့ရာ များစွာစိတ်ပျက်သွားခဲ့ရသည်။

၂၄ တန်ခန့်ရှိသော တောင်လိုပုံနေသည့် အမှိုက်ပုံကြီးကို တွေ့လိုက်ရပြီး သူ၏ အမှိုက်ထုပ်မှာ ကောက်ရိုးပုံအတွင်းရောက်ရှိသွားသည့် အပ်တစ်စင်းသဖွယ် ဖြစ်သွားသည်။

ထို့ကြောင့် လက်မြှောက်အရှုံးပေးရတော့မည့် အခြေအနေတွင် သူ၏ အဖြစ်ကိုသိရှိသွားကြသော စည်ပင်ဝန်ထမ်းများက ကူညီရှာဖွေပေးမည်ဟု ပြောလာကြသည်။

အမှိုက်ပုံးအတွင်းထည့်လိုက်သည့် သူ၏ ပိုက်ဆံများမှာ ကြီးမားလှသည့် အမှိုက်ပုံကြီးအတွင်း ပြန့်ကျဲထွက်သွားသည်ဖြစ်ရာ စည်ပင်ဝန်ထမ်းများမှာ တစ်ရွက်ချင်း ဂရုတစိုက် လိုက်ရှာရသည်။

သို့သော် စည်ပင်ဝန်ထမ်းတို့က တတ်နိုင်သမျှ ကောက်ယူပေးမည်ဟု ဆုံးဖြတ်ထားကြသည်။

စည်ပင်ဝန်ထမ်းတို့မှာ အမှိုက်များကို မွှေနှောက်ပြီး လိုက်ရှာကြရသည်။

တစ်နေရာတွင်ကား စည်ပင်ဝန်ထမ်းတစ်ဦးက ဝမ် ၅၀၀၀၀ တန် တစ်ရွက်တွေ့ပြီဖြစ်ကြောင်း အော်ပြောသည်။

ခေတ္တအကြာတွင် အခြားဝန်ထမ်းတစ်ဦးကလည်း ၁၀၀၀၀ တန် ငွေစက္ကူများတွေ့ကြောင်း အော်ပြောသည်။

သို့နှင့် ၎င်းတို့ ဆက်လက်ရှာဖွေကြသည်။

၈ နာရီခန့် ရှာဖွေပြီးချိန်တွင် ဝမ်ငွေ ၁၈ ဒသမ ၂၈ သန်း ပြန်လည်တွေ့ရှိခဲ့ပြီး ကျန်ငွေများမှာမူ ပျောက်ဆုံးခြင်း (သို့မဟုတ်) ဖျက်ဆီးခံလိုက်ရခြင်းဖြစ်နိုင်ကြောင်း အရာရှိတို့က ပြောသည်။

အိမ်ခြံမြေ ကိစ္စအဝဝနှင့် ပတ်သက်၍ ဥပဒေအကြံပေးပညာရှင်များနှင့် ဆွေးနွေးတိုင်ပင်လိုပါက iMyanmarHouse.com (အိုင်မြန်မာဟောက်စ်ဒေါ့ကွန်း) ၏ ဖုန်းနံပါတ်များဖြစ်သော 09-268022352 , 09-966901767 သို့ ဆက်သွယ်နိုင်ပါသည်။ အသေးစိတ်ကြည့်ရန် ဤနေရာကို နှိပ်ပါ။

ရောင်းရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။

ငှားရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။

(iMyanmarHouse.com Team မှ ရေးသား ဖော်ပြသည်။)

Credit: iMyanmarHouse.com

Ref: South Korea govt workers search through trash for eight hours to find woman’s lost money