မလေးရှားတွင် အငြိမ်းစား ကျောင်းဆရာကြီးတစ်ဦးက အနိစ္စရောက်သွားပြီဖြစ်သော ဖခင်ကြီး၏ ကားနံပါတ်ကို ထီထိုးရာ ရင်းဂစ် ၆ ဒသမ ၇ သန်း ထီဆုကြီးကံထူး၊ နွမ်းပါးချို့တဲ့သော ကျောင်းသားများကို ထောက်ပံ့ကူညီ မည်ဟုဆို

မလေးရှားနိုင်ငံ ကွာလာလမ်ပူမြို့တွင် နေထိုင်သော အငြိမ်းစားကျောင်းဆရာကြီးတစ်ဦး ရင်းဂစ် ၆ ဒသမ ၇ သန်း ထီဆုကြီး ကံထူးသွားသည်။

ဆရာကြီးက ကွယ်လွန်အနိစ္စရောက်သွားပြီဖြစ်သော ဖခင်ကြီး၏ ကားနံပါတ်နှင့် ၎င်းတို့ယခင်နေထိုင်ခဲ့သော အိမ်နံပါတ်ဟောင်းတို့ကို ထီထိုးကံစမ်းခဲ့ခြင်း ဖြစ်သည်။

လွန်ခဲ့သော ဒီဇင်ဘာ ၂၉ ရက်က မလေးရှားနိုင်ငံတဝန်းတွင် Da Ma Cai Jackpot ဆုများနှုင့် Bonus ဆုပေါင်းများစွာကို လူအများအပြားကံထူးခဲ့ကြရာ စုစုပေါင်း ဆုကြေးငွေ ရင်းဂစ် ၉ ဒသမ ၀၄ သန်းဖိုး ရှိခဲ့သည်။

အငြိမ်းစားကျောင်းဆရာကြီးသည် 1+3D Jackpot ဆုကြီး ကံထူးခဲ့ရာတွင် ဆုငွေ ရင်းဂစ် ၆၇၇၇၈၀၇ ရရှိခဲ့သည်။

ဆရာကြီးက ရရှိလာသောဆုငွေကို မိသားစုနေအိမ် ပြန်လည်ပြင်ဆင်ရာတွင် အသုံးပြုမည့်အပြင် ဆင်းရဲနွမ်းပါးသော ကျောင်းသားများအတွက် ရန်ပုံငွေတစ်ရပ် ထူထောင်ထားမည်ဟု ပြောသည်။

“ပညာရေးဟာ တစ်ဦးချင်းစီအတွက် အခွင့်အလမ်းတွေ ဖန်တီးပေးနိုင်တဲ့အပြင် လူ့အသိုက်အဝန်းရဲ့ သာယာဝပြောမှုကို မြင့်တက်စေမှာဖြစ်တယ်လို့ ကျောင်းဆရာတစ်ဦးအနေနဲ့ ယုံကြည်ပါတယ်”

“ကလေးတိုင်းဟာ အရည်အသွေးမြင့်တဲ့ပညာဆည်းပူးဖို့ ထိုက်တန်ပါတယ်။ ဒီအတွက် ပံ့ပိုးသွားဖိို့ ကျွန်တော် ကတိပြုပါတယ်” ဟု အငြိမ်းစားဆရာကြီးက ထီဌာနသို့ ပြောသည်။

ဆလန်ဂေါပြည်နယ်၊ ပူချွန်မြို့တွင် နေထိုင်သူတစ်ဦးသည်လည်း 1+3D Jackpot ဆုကြီး ကံထူးခဲ့သည်။

ပူချွန်မြို့သား ကံထူးသူမှာမူ ကလေးများ၏ မွေးနေ့များနှင့် လရာသီဖွားကာလတို့ကို ကံစမ်းခဲ့ခြင်းဖြစ်ပြီး 3+3D Bonus ၏ ပထမဆု ကံထူးခဲ့ရာ ရင်းဂစ် ၁၀၇၁၁၄၆ ရရှိသွားသည်။

ကွာလာလမ်ပူမြို့၏ တောင်ဘက်ရှိ Port Dickson မြို့နေ မိသားစုစီးပွားရေးလုပ်ငန်း လုပ်ကိုင်နေသူတစ်ဦးသည်လည်း 3D Jackpot ဆုကြီး ကံထူးခဲ့ရာ ရင်းဂစ် ၈၇၁၅၀၆ ရရှိခဲ့သည်။

၎င်းကမူ အိပ်မက်အရ ထီထိုးခဲ့ခြင်းဖြစ်ပြီး အိပ်မက်ထဲတွင် ကျယ်ပြောသော ပင်လယ်ပြင်ကြီး၏ အထက်ကောင်းကင်ဆီတွင် ကိန်းဂဏန်း နံပါတ်များကို တွေ့မြင်ခဲ့ခြင်း ဖြစ်သည်။

“ထီပေါက်လာတဲ့ငွေနဲ့ ကာလကြာရှည် စိတ်ကူးခဲ့တဲ့ မိသားစုအပန်းဖြေခရီးသွားဖို့ စီစဉ်ထားပါတယ်” ဟု ၎င်းက ပြောသည်။

အိမ်ခြံမြေ ကိစ္စအဝဝနှင့် ပတ်သက်၍ ဥပဒေအကြံပေးပညာရှင်များနှင့် ဆွေးနွေးတိုင်ပင်လိုပါက iMyanmarHouse.com (အိုင်မြန်မာဟောက်စ်ဒေါ့ကွန်း) ၏ ဖုန်းနံပါတ်များဖြစ်သော 09-268022352 , 09-966901767 သို့ ဆက်သွယ်နိုင်ပါသည်။ အသေးစိတ်ကြည့်ရန် ဤနေရာကို နှိပ်ပါ။

ရောင်းရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။

ငှားရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။

(iMyanmarHouse.com Team မှ ရေးသား ဖော်ပြသည်။)

Credit: iMyanmarHouse.com

Ref: Retiree hits RM6.7 million jackpot, pledges to help underprivileged students