ဂျပန်တွင် ကုမ္ပဏီတစ်ခုက ဝန်ထမ်းများအား ၎င်းတို့ စွဲလမ်းနေသည့် အကျော်အမော်တစ်ဦး ချစ်သူရည်းစားရခြင်း၊ အိမ်ထောင်ပြုခြင်းတို့ကြောင့် အသည်းကွဲပါက အလုပ်မှ ခွင့်ယူခွင့်ပေး

ဂျပန်တွင် မကြာသေးမီနှစ်များအတွင်း ဝန်ထမ်းအင်အားကျဆင်းမှု အကျပ်အတည်းနှင့် ရင်ဆိုင်နေရသည်။

ဝန်ထမ်းရှားပါးနေချိန်မျိုးတွင် ဂျပန်ကုမ္ပဏီတစ်ခုက ဝန်ထမ်းသစ်ဆွဲဆောင်နိုင်ရေးအတွက် တမူထူးသော နည်းလမ်းတစ်ခုကို အသုံးပြုလာသည်။

အိုဆာကာမြို့အခြေစိုက် နည်းပညာကုမ္ပဏီတစ်ခုက အခြားကုမ္ပဏီများနှင့် ဝန်ထမ်းခေါ်ယူမှုတွင် ယှဉ်ပြိုင်နိုင်စွမ်းရှိရေးအတွက် ထူးခြားသော ခွင့်ရက်ပေးသည့်နည်းလမ်းကို အသုံးပြုလာသည်။

၎င်းတို့ကုမ္ပဏီမှာ အနည်းဆုံးအခြေခံလစာ ယန်း ၂၂၂၀၀၀ သာ ပေးနိုင်ပြီး ထိုလစာမှာ အချိန်ပို နာရီ ၂၀ ခန့် ပါဝင်ပြီး ဖြစ်သည်။

ဂျပန် ကျန်းမာရေး၊ အလုပ်သမားရေးရာနှင့် လူမှုဖူလုံရေးဝန်ကြီးဌာန၏ အချက်အလက်များအရ ၂၀၂၃ ခုနှစ် အတွင်း ဂျပန်တွင် ဝန်ထမ်းသစ်တစ်ဦးအတွက် ပျမ်းမျှလစာမှာ ယန်း ၂၇၃၃၀၀ ဖြစ်သည်။

ထိုကုမ္ပဏီမှ ခွင့်ပေးခြင်းများအနက် အရက်သောက်ပြီးနောက် အရက်နာကျနေလျှင် ပြန်လည် လန်းလန်းဆန်းဆန်း ဖြစ်လာပြီးမှ အလုပ်လာနိုင်ရန် ခွင့်ပေးခြင်း ဖြစ်သည်။

ဝန်ထမ်းအမျိုးသမီးတစ်ဦးက ပြောပြသည်မှာ ပုံမှန်အလုပ်ချိန် ၉ နာရီအစား ၁၂ နာရီမှ အလုပ်သို့လာခွင့် ရရှိခဲ့ကြောင်း၊ ကုမ္ပဏီက ခွင့်ပြုပေးသည့် “အရက်နာ” ခွင့် စနစ်ကို အသုံးပြုခဲ့ရခြင်းဖြစ်ကြောင်း ပြောသည်။

“ကျွန်မအတွက် အိပ်ချိန် ၂ နာရီ၊ ၃ နာရီလောက် ပိုရသွားတယ်။ လူက လန်းဆန်းသွားတာကြောင့် အလုပ်မှာ စွမ်းဆောင်ရည်ပိုကောင်းလာစေတယ်လို့ ထင်ပါတယ်” ဟု အဆိုပါ ဝန်ထမ်းက ပြောကြောင်း South China Morning Post သတင်းဌာနက ဖော်ပြသည်။

ထို့အပြင် အဆိုပါကုမ္ပဏီသည် “ဆယ်လီ ဆုံးရှုံးမှု ခွင့်” လည်း ခွင့်ပြုပေးသည်။

အကျော်အမော်တစ်ဦးနှင့် ပတ်သက်သည့် သတင်းတစ်ခုခုကြောင့် အလုပ်တွင် အာရုံမစိုက်နိုင်လောက်အောင် စိတ်ထိခိုက်နေသည်ဆိုပါက ခွင့်ယူခွင့် ပေးခြင်းဖြစ်သည်။

ဥပမာအားဖြင့် အဆိုပါကုမ္ပဏီမှ ဝန်ထမ်းမိန်းကလေးတစ်ဦးသည် ဂျပန်ဂီတသမားတစ်ဦးဖြစ်သော Gen Hoshino ကို စွဲလမ်းခဲ့သည်မှာ ၁၀ စုနှစ် တစ်ခုကျော် ရှိခဲ့သည်။

၂၀၂၁ ခုနှစ်အတွင်း Hoshino သည် ရုပ်ရှင်မင်းသမီး Yui Aragaki နှင့် လက်ထပ်သွားရာ အဆိုပါဝန်ထမ်းမိန်းကလေးမှာ ကြေကွဲဝမ်းနည်းခဲ့ရသောကြောင့် အလုပ်မှ ခွင့်ယူခဲ့ခြင်း ဖြစ်သည်။

အဆိုပါကုမ္ပဏီမှာ လုပ်ခလစာနည်းပါးသော်လည်း အထက်ပါကဲ့သို့ တမူထူးသည့် ခွင့်ရက်များ ပေးသောကြောင့် ဝန်ထမ်းများ၏ performance များ ကောင်းမွန်သည်ကို တွေ့ရပြီး ပြီးခဲ့သော ၃ နှစ်တာအတွင်း ကုမ္ပဏီမှ အလုပ်ထွက်သူ တစ်ဦးမှ မရှိခဲ့ကြောင်း သိရသည်။

အိမ်ခြံမြေ ကိစ္စအဝဝနှင့် ပတ်သက်၍ ဥပဒေအကြံပေးပညာရှင်များနှင့် ဆွေးနွေးတိုင်ပင်လိုပါက iMyanmarHouse.com (အိုင်မြန်မာဟောက်စ်ဒေါ့ကွန်း) ၏ ဖုန်းနံပါတ်များဖြစ်သော 09-268022352 , 09-966901767 သို့ ဆက်သွယ်နိုင်ပါသည်။ အသေးစိတ်ကြည့်ရန် ဤနေရာကို နှိပ်ပါ။

ရောင်းရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။

ငှားရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။

(iMyanmarHouse.com Team မှ ရေးသား ဖော်ပြသည်။)

Credit: iMyanmarHouse.com

Ref: Japanese company offers hangover, “celebrity loss” leaves, marks low turnover rate