ဗဟုသုတ | Posted by ရွှေစင်ဝင်း
ဂျာမနီနိုင်ငံသား လေကြောင်းအင်ဂျင်နီယာတစ်ဦးသည် ပနားမားနိုင်ငံ၏ ကမ်းလွန်ပင်လယ်ရေအောက်တွင် Capsule အိမ်ငယ်ဖြင့် ရက်ပေါင်း ၁၂၀ နေထိုင်ခဲ့ရာ
depressurisation မရှိဘဲ ကမ္ဘာ့အချိန်အကြာဆုံး ရေအောက် နေထိုင်သူအဖြစ် စံချိန်တင်ခဲ့သည်။
၎င်း၏ အမည်မှာ ရူဒီဂါ ကို့ခ် (Rudiger Koch) ဖြစ်ပြီး အသက် ၅၉ နှစ် အရွယ် ဖြစ်သည်။
ရူဒီဂါသည် အကျယ်အဝန်း ၃၀ စတုရန်းမီတာ (စတုရန်းပေ ၃၂၀) ရှိ ရေအောက်အိမ်ဖြင့် ရေပေါ်သို့ ပြန်တက်လာချိန်တွင် ဂင်းနက်စ် ကမ္ဘာ့စံချိန်မှတ်တမ်းအဖွဲ့မှ အကဲဖြတ် အမျိုးသမီး ဆူဇန်နာ ရေးယက်စ် ရှိနေခဲ့သည်။
ရူဒီဂါသည် အမေရိကန်နိုင်ငံသား ယိုဆက် ဒီတူရီ၏ ယခင်စံချိန်ကို ဖြတ်ကျော်ခဲ့ကြောင်း ဆူဇန်နာက အတည်ပြုသည်။
ဒီတူရီသည် ဖလော်ရီဒါပြည်နယ်ရှိ ရေကန်ကြီးတစ်ခုတွင် ရေအောက်အိမ်တစ်ခု၌ ရက်ပေါင်း ၁၀၀ နေထိုင်ကာ စံချိန်တင်ခဲ့ခြင်း ဖြစ်သည်။
“ကြီးမားတဲ့ စွန့်စားခန်းတစ်ခုပါပဲ။ ကျွန်တော် ရေအောက်မှာ ဖြတ်သန်းရတာ နှစ်သက်ပျော်ရွှင်ခဲ့ပါတယ်”ဟု ရူဒီဂါက ရေအောက်အိမ်မှ ထွက်လာပြီးနောက် AFP သတင်းဌာနသို့ ပြောသည်။
“အရာအားလုံး တိတ်ဆိတ်မှောင်မဲပြီး ပင်လယ်ပြင်က အရောင်တောက်နေတာဟာ သိပ်ကို လှပါတယ်”ဟု ရူဒီဂါက ရေအောက် Capsule အိမ်၏ ပြတင်းမှ ကြည့်ရင်း ပြောသည်။
“ရှင်းပြဖို့တော့ မလွယ်ဘူး။ ကိုယ်တိုင်ကြုံမှ သိမှာပါ။”
ရူဒီဂါသည် အောင်ပွဲခံသည့်အနေဖြင့် ရှန်ပိန်တစ်ချက် မော့လိုက်ကာ စီးကရက် ၁ လိပ် သောက်ပြီးနောက် ကာရစ်ဘီယံ ပင်လယ်ထဲသို့ ခုန်ချသွားသည်။
လှေတစ်စင်းက ၎င်းကို ခေါ်ဆောင်သွားပြီး ကမ်းကပ်ပြီးလျှင် အောင်ပွဲခံကြမည် ဖြစ်သည်။
ရူဒီဂါ၏ ရေအောက်အိမ်ငယ်တွင် အိပ်ရာ၊ အိမ်သာ ၊ ရုပ်မြင်သံကြားစက်၊ ကွန်ပြူတာ၊ အင်တာနက်နှင့် လေ့ကျင့်ခန်းလုပ်သည့် စက်ဘီးတစ်စီးလျှင်ပင် ပါဝင်သည်။
သူ၏ ရေအောက်အိမ်သည် ပနားမားနိုင်ငံ မြောက်ဘက် ကမ်းရိုးတန်းမှ လှေဖြင့်သွားလျှင် ၁၅ မိနစ်ခန့် သွားရသည့် နေရာတွင် တည်ရှိသည်။
ရေအောက် Capsule အိမ်ကို ရေပေါ်ရှိ အခန်းတစ်ခုနှင့် ပြွန်တစ်ခုဖြင့် ဆက်သွယ်ထားသည်။
ပြွန်ထဲတွင် ခရုပတ်လှေကားတစ်ခု တပ်ဆင်ထားပြီး ရူဒီဂါ၏ အိမ်ရှိရာသို့ ဆင်းသက်နိုင်ကာ အစားအသောက်များ ပို့ဆောင်ပေးသည်။
ဆရာဝန်ကလည်း ကျန်းမာရေး လာရောက်ကြည့်ရှုပေးသည်။
ရေပြင်ပေါ်ရှိ ဆိုလာပြားများမှ တဆင့် လျှပ်စစ်ဓာတ်အား ရယူသည်။
Backup Generator တစ်ခုလည်း ရှိသည်။
(ရူဒီဂါ၏ ရေအောက်အိမ် အပေါ်ဆီတွင် တည်ရှိသော Seapod Alpha Deep ဟု အမည်ပေးထားသည့် ရေပေါ်အိမ်။)
ရူဒီဂါ၏ ရေအောက်အိမ်ထဲတွင် ကင်မရာ ၄ လုံး တပ်ဆင်ထားပြီး သူ၏ နေ့စဉ်ဘဝ၊ စိတ်ကျန်းမာရေးတို့ကို စောင့်ကြည့်သည်။
ထို့အပြင် ထိုကင်မရာများမှာ ရူဒီဂါ ရေပေါ်သို့ လုံးဝ တက်မလာကြောင်း သက်သေ အထောက်အထားလည်း ဖြစ်သည်။
အိမ်ခြံမြေ ကိစ္စအဝဝနှင့် ပတ်သက်၍ ဥပဒေအကြံပေးပညာရှင်များနှင့် ဆွေးနွေးတိုင်ပင်လိုပါက iMyanmarHouse.com (အိုင်မြန်မာဟောက်စ်ဒေါ့ကွန်း) ၏ ဖုန်းနံပါတ်များဖြစ်သော 09-268022352 , 09-966901767 သို့ ဆက်သွယ်နိုင်ပါသည်။ အသေးစိတ်ကြည့်ရန် ဤနေရာကို နှိပ်ပါ။
ရောင်းရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။
ငှားရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။
(iMyanmarHouse.com Team မှ ရေးသား ဖော်ပြသည်။)
Credit: iMyanmarHouse.com
