ပစ္စည်းလွှဲပြောင်းခြင်း ဥပဒေအကြောင်းကို ဥပဒေဗဟုသုတအနေဖြင့် ရေးသားဖော်ပြပေးလိုက်ပါသည်။

ပစ္စည်းလွှဲပြောင်းခြင်းဆိုသည်မှာ လူတစ်ဦးတစ်ယောက်မှ သက်ရှိထင်ရှားရှိစဉ် အခြားသူတစ်ဦးတစ်ယောက် (သို့) တစ်ဦးထက်ပိုသူများကိုဖြစ်စေ ပစ္စည်းအား တချိန်တည်း လွှဲပြောင်း၍ဖြစ်စေ၊ နောင်တွင် ပစ္စည်းတစ်စုံတစ်ရာအား လွှဲပြောင်းရန် ရည်ရွယ်၍ဖြစ်စေ စာချုပ်ချုပ်ဆို၍ ပေးအပ်ခြင်းကို ဆိုလိုပါသည်။

ပစ္စည်းလွှဲပြောင်းခြင်း ဥပဒေပုဒ်မ-၇ အရ ပဋိဉာဉ်ပြုလုပ်နိုင်ရန် အရည်အချင်းပြည့်မှီပါက ပစ္စည်းအား လုံးအားဖြစ်စေ၊ တချို့တစ်ဝက်အားဖြစ်စေ ၊ ပစ္စည်းလွှဲပြောင်းခြင်းအား တည်ဆဲဥပဒေပါ စည်းကမ်းချက် ခွင့်ပြု နည်းလမ်းများနှင့်အညီ ဆောင်ရွက်ခြင်းပြုနိုင်ပါသည်။

ရောင်းချခြင်းဆိုရာတွင်လဲ အဖိုးစားနားအား ကတိပြုပေးချေခြင်း (သို့) တချို့တစ်ဝက်ပေးချေခြင်းပြုကာ ပစ္စည်းတစ်စုံတစ်ရာအား လွှဲပြောင်းပေးအပ်ခြင်းပင်ဖြစ်ပြီး တန်ဖိုးငွေ ၁၀၀/- အထက်ရှိပါက အဆိုပါအရောင်း အဝယ်စာချုပ်အား မှတ်ပုံတင် စာချုပ်ချုပ်ဆိုရမည်ဖြစ်ပါသည်။

ပစ္စည်းပိုင်ရှင်မှ အဖိုးစားနားဖြင့် ပစ္စည်းတစ်စုံတစ်ရာအား လွှဲပြောင်းပေးပြီး ပစ္စည်းလွှဲပြောင်းခြင်းဥပဒေ ပုဒ်မ - ၄၁ အရ လက်ခံသူမှ သဘောရိုးဖြင့် လက်ခံသောပစ္စည်းမှာ ပုဒ်မ-၉ အရ လွှဲပြောင်းခြင်း အတည်ဖြစ်ပြီး မပျက်ပြယ်ပါ။ မြေအား လွှဲပြောင်းခြင်းများတွင် မြေတွင်ပူးတွဲနေသောအရာများ ထာဝရသုံးစွဲရန် ရည်ရွယ်ထားသည့် အရာဝတ္ထုများ၊ မြေမှ ဖြစ်ပေါ်လာသော အခငွေနှင့် အမြတ်အစွန်းများလဲ ပါဝင်ပါသည်။

မရွှေ့မပြောင်းနိုင်သော ပစ္စည်းအား အဖိုးစားနား မပါဝင်ဘဲ လိမ်လည်ရန် အကြံဖြင့် လွှဲပြောင်းရယူ ပေးအပ်မှုများမှာလဲ ပျက်ပြယ်မည်ဖြစ်ပါသည်။ အရောင်းအဝယ်ဖြစ်ပါက ရောင်းချသူမှ ဝယ်ယူသူသို့ဖြစ်စေ၊ ဝယ်ယူသူမှ ညွှန်ပြသူသို့ဖြစ်စေ လက်ရောက် လွှဲပြောင်းပေးအပ်ခြင်း ပြုရမည်ဖြစ်ပါသည်။

ပူးတွဲပိုင်ဆိုင်မှုရှိသော ပစ္စည်းအား ဝယ်ယူရာတွင် လွှဲပြောင်းပေးသူပိုင်ဆိုင်သော ဝေစုသည်သာ အရောင်း အဝယ်အတည်ဖြစ်ပြီး မိသားစု အမွေခွဲဝေခြင်း မပြုရသေးသော ပစ္စည်းတစ်စုံတစ်ရာအား ဝယ်ယူခြင်းဖြစ်ပါက ယင်းပစ္စည်းကို ခွဲဝေလွှဲပြောင်းပေးရန် တောင်းဆိုခြင်းလဲ မပြုနိုင်သေးပါ။ တရားရုံးတွင် တရားမှုဖြစ်ပွှားနေသော အမှုအခင်း၏ ပစ္စည်းတစ်စုံအား တဖက်အမှုသည်ကို ထိခိုက်နစ်နာစေရန် အခြားသူတစ်ဦးအား လွှဲပြောင်းရောင်း ချ ခြင်း၊ အခြားစီမံခြင်းများ ဆောင်ရွက်မရပေ။

ပစ္စည်းလွှဲပြောင်းခြင်း ဥပဒေပုဒ်မ-၉ အရ ပစ္စည်းလွှဲပြောင်းခြင်းအား စာဖြင့်ရေးသား၍ လွှဲပြောင်းခြင်း ပြုရန် အတိအလင်းဖော်ပြထားခြင်းမရှိသော ကိစ္စရပ်များတွင် နှုတ်ဖြင့် လွှဲပြောင်းခြင်းလဲ ဆောင်ရွက်နိုင်ကြောင်း ဥပဒေဗဟုသုတအနေဖြင့် ရေးသားဖော်ပြပေးလိုက်ပါသည်။

အိမ်ခြံမြေ ကိစ္စအဝဝနှင့် ပတ်သက်၍ ဥပဒေအကြံပေးပညာရှင်များနှင့် ဆွေးနွေးတိုင်ပင်လိုပါက iMyanmarHouse.com (အိုင်မြန်မာဟောက်စ်ဒေါ့ကွန်း) ၏ ဖုန်းနံပါတ်များဖြစ်သော 09-268022352 , 09-966901767 သို့ ဆက်သွယ်နိုင်ပါသည်။ အသေးစိတ်ကြည့်ရန် ဤနေရာကို နှိပ်ပါ။

ရောင်းရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။

ငှားရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။

iMyanmarHouse.com ၏ ဥပ​ဒေအကြံ​ပေး ပညာရှင်​အဖွဲ့ မှ အထူးရေးသားဖော်ပြသည်။

Credit: iMyanmarHouse.com