ဗဟုသုတ | Posted by ရွှေစင်ဝင်း
ကြက်သွန်နီများ ပျော့သွားပြီဆိုပါက လွှင့်ပစ်လိုက်ရန်သာ ရှိတော့သည်။
ကြက်သွန်နီကို နည်းမှန်လမ်းမှန် သိမ်းဆည်းထားမည်ဆိုပါက နှစ်ဝက်ခန့် လတ်လတ်ဆတ်ဆတ် ထားနိုင်ကြောင်း Jerry James Stone ဆိုသော YouTuber တစ်ဦးက ပြောပြလာသည်။
ဟင်းလျာများစွာတွင် ထည့်သွင်းအသုံးပြုကြသော ကြက်သွန်နီကို ရေခဲသေတ္တာအတွင်း သိမ်းဆည်း မထားသင့်။
ရေခဲသေတ္တာထဲတွင် ကြက်သွန်နီမှာ ပျော့လာကာ လျင်မြန်စွာ ပုပ်သွားနိုင်သည်။ လေဝင်လေထွက် မကောင်းသော ကြောင်အိမ်၊ စတိုခန်းများတွင် ကြက်သွန်နီကို မထားသင့်ကြောင်းလည်း James Stone က ပြောသည်။
ကြက်သွန်နီတို့သည် ခြောက်သွေ့၊ အေးမြကာ လေဝင်လေထွက်ကောင်းသောနေရာများကို နှစ်သက်ကြောင်း ၎င်းက ပြောသည်။
ထို့ကြောင့် လေဝင်လေထွက်နည်းသော အလုံပိတ် အံဆွဲများ၊ ဗီရိုများထဲတွင် ကြက်သွန်နီသည် လတ်ဆတ်စွာ ရှိမနေနိုင်။
ထို့အပြင် ကြက်သွန်နီကို အာလူးများနှင့် နီးနီးကပ်ကပ် မထားသင့်။
အဘယ်ကြောင့်ဆိုလျှင် ကြက်သွန်နီနှင့် နီးကပ်စွာထားပါက အာလူးများ အညှောက်ထွက်လာနိုင်သောကြောင့် ဖြစ်သည်။
ကြက်သွန်နီကို ကြက်သွန်ဖြူတို့နှင့် ကပ်လျက်ထားရှိခြင်းမှာ အကောင်းဆုံးဖြစ်ကြောင်း James Stone က အခိုင်အမာပြောသည်။
ကြက်သွန်နီနှင့် ကြက်သွန်ဖြူတို့သည် တူညီသောဝန်းကျင်ကို နှစ်သက်ရာ အေးမြ၊ ခြောက်သွေ့၊ လေဝင်လေထွက်ကောင်းသော နေရာကို နှစ်သက်ပုံချင်း တူညီကြသည်။ ကြက်သွန်နီတို့ကို ကြက်သွန်ဖြူနှင့် ကပ်လျက်ထားပါက ၆ လအထိ အထားခံကြောင်း မစ္စတာ Stone က ကတိပေးသည်။
James Stone ၏ YouTube ဗွီဒီယိုတွင် ကြက်သွန်နီထားသိုနည်း မျှဝေပေးသည့်အတွက် ကျေးဇူးတင်ကြောင်း မှတ်ချက်ပြုသူများစွာရှိသည်။
တစ်ဦးက “အိုး…ကျွန်မက ကြက်သွန်နီကို အမြဲတမ်း အာလူးတွေဘေးမှာထားတာ။ အာလူးတွေက အမြဲတမ်းလို အညှောက်ထွက်လာတယ်။ အာလူးကို သိပ်မစားဖြစ်ဘူးထင်တယ်လို့ ကိုယ့်ဟာကိုယ် တွေးနေမိတာ။ ကျေးဇူးပါ” ဟု မှတ်ချက်ပြုသည်။
(ကြက်သွန်နီကို ကြက်သွန်ဖြူနှင့် ကပ်လျက်ထားသင့်သည်။)
“ကျွန်မက အာလူးနဲ့ ကြက်သွန်နီကို အမြဲတမ်း အတူတူထားတာ။ အာလူးတွေ အညှောက်ပေါက်တာ ဘာလို့ အရမ်းမြန်နေတာလဲလို့ ကျွန်မ သိချင်နေတာ။ အခုလို ပြောပြပေးတာ ကျေးဇူးအများကြီးတင်ပါတယ်။ ဒီအကြောင်းကို ကျွန်မရဲ့ သားမြေးမြစ်တွေအထိ လက်ဆင့်ကမ်းပေးသွားပါမယ်” ဟု အခြားတစ်ဦးက မှတ်ချက်ပေးသည်။
အိမ်ခြံမြေ ကိစ္စအဝဝနှင့် ပတ်သက်၍ ဥပဒေအကြံပေးပညာရှင်များနှင့် ဆွေးနွေးတိုင်ပင်လိုပါက iMyanmarHouse.com (အိုင်မြန်မာဟောက်စ်ဒေါ့ကွန်း) ၏ ဖုန်းနံပါတ်များဖြစ်သော 09-268022352 , 09-966901767 သို့ ဆက်သွယ်နိုင်ပါသည်။ အသေးစိတ်ကြည့်ရန် ဤနေရာကို နှိပ်ပါ။
ရောင်းရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။
ငှားရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။
(iMyanmarHouse.com Team မှ ရေးသား ဖော်ပြသည်။)
Credit: iMyanmarHouse.com
Ref: Onions will stay fresh for 'six months' when stored in an unexpected area of your home
Photo Credit-Getty
