Home Alone ရုပ်ရှင်ဇာတ်ကားဖြင့် ကမ္ဘာကျော်ခဲ့သော သရုပ်ဆောင် မက်ကောလေးက ဇာတ်ကားရိုက်ကူးခဲ့သည့် အိမ်ကြီးကို ကန်ဒေါ်လာ ၅ ဒသမ ၂၅ သန်းဖြင့် ဝယ်ယူရန် စဉ်းစားနေ

၁၉၉၀ ပြည့်နှစ်က ဝက်ဝက်ကွဲအောင်မြင်ခဲ့သော ဟာသဇာတ်မြူး Home Alone ရုပ်ရှင်တွင် ၈ နှစ်သားအရွယ် ကလေးငယ် ကီဗင် မက်ခ်ကာလစ္စတာအဖြစ် ပါဝင်သရုပ်ဆောင်ကာ လျှမ်းလျှမ်းတောက် အောင်မြင်ခဲ့သူ မက်ကောလေး (Macaulay Culkin) သည် Home Alone ရုပ်ရှင်ရိုက်ကူးခဲ့သော အမေရိကန်ပြည်၊ အီလီနွိုက်စ် ပြည်နယ်ရှိ စံအိမ်ကြီးကို ဝယ်ယူရန် နီးစပ်နေကြောင်း ၎င်းကိုယ်တိုင် ထုတ်ဖော်ပြောပြလာသည်။

မက်ကောလေးသည် ရုပ်ရှင်သရုပ်ဆောင်အဖြစ် အောင်မြင်ခဲ့သည့်အပြင် အဆိုတော်အဖြစ်လည်း ဖြတ်သန်းခဲ့သည်။

၂၀၀၄ ခုနှစ်တွင် Junior ဟူသောအမည်ဖြင့် ကိုယ်တိုင်ရေးအတ္ထုပ္ပတ္တိစာအုပ် ရေးသားထုတ်ဝေခဲ့ရာ သူ၏ အနုပညာလောကအတွေ့အကြုံများနှင့် သူ၏ဖခင်နှင့်ဆက်ဆံရေး အကြောင်းများ ရေးသားဖော်ပြခဲ့သည်။

ယခုအခါ အသက် ၄၄ နှစ်ရှိပြီဖြစ်သူ မက်ကောလေးသည် A Nostalgic night with Macaulay Culkin အမည်ရှိ tour တစ်ခုထွက်နေရာ မကြာသေးမီက ပြီးဆုံးသွားသည်။

သူ၏ လျှမ်းလျှမ်းတောက်ခဲ့သော Home Alone ရုပ်ရှင်ကို ပြသကာ ပရိသတ်များနှင့် အမေး၊ အဖြေလုပ်သည့် ပွဲများဖြစ်သည်။

Home Alone ပွဲတွင် ပရိသတ်များ၏ မေးမြန်းမှုကို မက်ကောလေးက ဖြေကြားသည်မှာ အဆိုပါရုပ်ရှင်ရိုက်ကူးခဲ့သည့် စံအိမ်သည် ယခုနှစ် မေလအတွင်း ကန်ဒေါ်လာ ၅ ဒသမ ၂၅ သန်းဖြင့် အရောင်းဈေးကွက်ဝင်နေရာ မိသားစုနေအိမ်အဖြစ် ဝယ်ယူရန် စိတ်ဝင်စားနေကြောင်း ပြောသည်။

“ကျွန်တော် အဲဒီအိမ်ကို အပျော်သက်သက်အတွက် ဝယ်ဖို့စဉ်းစားမိနေပါတယ်” ဟု မက်ကောလေးက အီလီနွိုက်စ်ပြည်နယ်၊ Rosemont Theater တွင် ပရိသတ်များကို ပြောသည်။

ရုပ်ရှင်ပရိသတ်များ အပျော်ကြည့်ရှုလည်ပတ်စရာအိမ်အဖြစ် ရည်ရွယ်ကြောင်း၊ Home Alone ရုပ်ရှင်ထဲတွင် ကလေးငယ် Kevin လုပ်သကဲ့သို့ လှေကားလက်ရန်းမှ လျှောစီးခြင်းများ ပြုလုပ်နိုင်မည်ဖြစ်ကြောင်း မက်ကောလေးက ပြောသည်။

“ကျွန်တော့်မှာ ကလေးတွေရှိနေပါပြီ။ ကျွန်တော်က အလုပ်များတဲ့သူပါ” ဟု မက်ကောလေးက ရှင်းပြသည်။

မက်ကောလေးသည် လက်တွဲဖော် Brenda Song နှင့် သားသမီး ၂ ဦးထွန်းကားသည်။

Home Alone ဝက်ဝက်ကွဲအောင်မြင်ပြီးနောက် ၁၉၉၂ ခုနှစ်တွင် Home Alone 2: Lost In New York ကို ဆက်လက်ရိုက်ကူးခဲ့ကာ အဆိုပါရုပ်ရှင်တွင် ဒေါ်နယ်ထရမ့်ပင် Plaza Hotel ပိုင်ရှင်အဖြစ် ဧည့်သရုပ်ဆောင်နေရာမှ ပါဝင်ခဲ့ဖူးသည်။

(မှတ်ချက်။ ဒေါ်နယ်ထရမ့်သည် အမှန်တကယ်လည်း Plaza Hotel ၏ ပိုင်ရှင်ဖြစ်သည်)

(မက်ကောလေးသည် Home Alone ဇာတ်ကားရိုက်ကူးခဲ့သည့် စံအိမ်ကြီးကို ဝယ်ယူရန်စဉ်းစားနေသည်။ စံအိမ်တည်နေရာမှာ အီလီနွိုက်စ်ပြည်နယ်၊ Winnetka မြို့တွင်ဖြစ်သည်။ ဓာတ်ပုံ-Realtor)

(စံအိမ်အကျယ်အဝန်းမှာ စတုရန်းပေ ၉၀၀၀ ကျော်ရှိသည်။ ဓာတ်ပုံ-Realtor)

(မီးဖိုဆောင်။ ဓာတ်ပုံ-Realtor)

(အောက်ထပ်တွင် အရက်ဘားနှင့် အိမ်တွင်းရုပ်ရှင်ရုံတို့ရှိသည်။ ဓာတ်ပုံ-Realtor)

Home Alone ရုပ်ရှင်၏ ဇာတ်အိမ်မှာ ၈ နှစ်သားအရွယ် Kelvin သည် မိသားစုအပန်းဖြေခရီးထွက်ရန် စီစဉ်ချိန်တွင် အိမ်၌ တစ်ဦးတည်း မတော်တဆ ကျန်ရစ်ခဲ့သည်။

ထိုသို့ တစ်ဦးတည်းကျန်ခဲ့ချိန်တွင် အိမ်သို့ ဖောက်ထွင်းသူခိုးများ ဝင်လာမှုကို ကာကွယ်မှုများ ပြုလုပ်ခဲ့ပုံ ရိုက်ကူးထားခြင်း ဖြစ်သည်။

အဆိုပါရုပ်ရှင်သည် ကမ္ဘာတဝန်းတွင် ကန်ဒေါ်လာ ၄၇၆ ဒသမ ၇ သန်းရသည်အထိ ဝက်ဝက်ကွဲ အောင်မြင်ခဲ့ပြီး ၁၉၉၀ ပြည့်နှစ်က ရုံတင်ခဲ့သော ရုပ်ရှင်များအနက် ဒုတိယဝင်ငွေ အများဆုံးရုပ်ရှင်အဖြစ် ရပ်တည်ခဲ့သည်။

၁၉၉၀ ပြည့်နှစ်၏ ဝင်ငွေအကောင်းဆုံးရုပ်ရှင်မှာ ပက်ထရစ်ဆွေဇီနှင့် ဒမ်မီမိုးတို့ ပါဝင်သရုပ်ဆောင်ခဲ့သော Ghost ရုပ်ရှင်ဖြစ်သည်။

အိမ်ခြံမြေ ကိစ္စအဝဝနှင့် ပတ်သက်၍ ဥပဒေအကြံပေးပညာရှင်များနှင့် ဆွေးနွေးတိုင်ပင်လိုပါက iMyanmarHouse.com (အိုင်မြန်မာဟောက်စ်ဒေါ့ကွန်း) ၏ ဖုန်းနံပါတ်များဖြစ်သော 09-268022352 , 09-966901767 သို့ ဆက်သွယ်နိုင်ပါသည်။ အသေးစိတ်ကြည့်ရန် ဤနေရာကို နှိပ်ပါ။

ရောင်းရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။

ငှားရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။

(iMyanmarHouse.com Team မှ ရေးသား ဖော်ပြသည်။)

Credit: iMyanmarHouse.com

Ref: Macaulay Culkin Admits He Considered Buying $5.25 Million ‘Home Alone’ House ‘Just for Giggles’ Photo Credit-realtor