တရုတ်ပြည်တွင် ပြန်ပေးဆွဲခံရသော ကလေးတစ်ဦး ၂၆ နှစ်အကြာ၌ ဆောက်လုပ်ရေးကုမ္ပဏီ ပိုင်ရှင် မိဘများနှင့် ပြန်လည်ဆုံစည်း၊ ဖခင်ဖြစ်သူက တိုက်ခန်း ၃ ခန်းနှင့် မော်တော်ကားများ လက်ဆောင်ပေး သော်လည်း လက်မခံဘဲ ရိုးရှင်းသောဘဝတွင်သာ နေထိုင်ဖြတ်သန်း

ရုပ်ရှင်ပရိသတ်များအနေဖြင့် ဇာတ်ဆောင်မင်းသား၊ မင်းသမီးမှာ စားရမဲ့ သောက်ရမဲ့ ဆင်းဆင်းရဲရဲ ဘဝမျိုးမှ နောင်အခါတွင် မိဘများမှာ သူဌေးကြီးများဖြစ်သည်ကို သိလိုက်ရပုံဇာတ်လမ်းများ မကြာခဏ ကြည့်ဖူးကြမည် ဖြစ်သည်။

ထိုသို့သော ဇာတ်လမ်းမျိုးမှာ စိတ်ကူးယဉ် ဝတ္ထု၊ ရုပ်ရှင်များတွင်သာ တွေ့ရသည်မဟုတ်ဘဲ အပြင်လောကတွင် လည်း ရှိနေသည်။

တကယ့်ဖြစ်ရပ်သည် ရုပ်ရှင်ထက်ဆန်းကြယ်သည်ဟူသော စကားလည်းရှိသည်။

တရုတ်ပြည်တွင် လူငယ်တစ်ဦးသည် မိဘမဲ့ဘဝဖြင့် ငယ်ဘဝကို ဖြတ်သန်းခဲ့ရပြီး မိဘများမှာ သန်းကြွယ်သူဌေးများဖြစ်ကြောင်း မကြာသေးမီက သိရှိလာသည်။

အဆိုပါလူငယ်သည် နို့စို့ကလေးအရွယ်ကတည်းက ပြန်ပေးဆွဲခံခဲ့ရပြီး ပြီးခဲ့သော ၂၀၂၃ ခုနှစ်ကမှ မိဘများနှင့် ပြန်လည်ဆုံစည်းခဲ့ခြင်းဖြစ်သည်။

ချမ်းသာကြွယ်ဝသော ဖခင်ကြီးက ပြန်လည်ဆုံစည်းရသောသားကို တိုက်ခန်း ၃ ခန်းနှင့် ကားတစ်စင်း ပေးခဲ့သော်လည်း လူ့ပေါ်ကြော့ မဖြစ်လိုသော လူငယ်က ငြင်းပယ်ခဲ့မှုကြောင့် သူ၏ဖြစ်ရပ်မှာ ထိပ်တန်း သတင်းတစ်ပုဒ် ဖြစ်လာသည်။

လူငယ်၏ အမည်မှာ ရှဲ့ကျင်းရွှေ (Xie Qingshuai) ဖြစ်ပြီး အသက် ၂၆ နှစ်ဖြစ်ကာ လက်ရှိအားဖြင့် တရုတ်ပြည်မြောက်ပိုင်း ဟီဘေးပြည်နယ်၊ Xingtai မြို့တွင် နေထိုင်သူ ဖြစ်သည်။

ရှဲ့ကျင်းသည် ၁၉၉၉ ခုနှစ်၊ ဇန်နဝါရီလ ၂၀ ရက်တွင် ပြန်ပေးဆွဲခံခဲ့ရပြီး ထိုစဉ်က ၃ လသားအရွယ်သာ ရှိသေးသည်။

ရှဲ့ကျင်း၏ မိဘများမှာ ဆောက်လုပ်ရေးကုမ္ပဏီများစွာ ပိုင်ဆိုင်ထားသော အောင်မြင်သည့် လုပ်ငန်းရှင်များ ဖြစ်ကြသည်။

ရှဲ့ကျင်း၏ မိဘများသည် သားဖြစ်သူကို ဆယ်စုနှစ်နှင့်ချီပြီး လိုက်လံရှာဖွေခဲ့ရာတွင် ယွမ် ၁ သန်း (ကန်ဒေါ်လာ ၁၄၀၀၀၀ ) ခန့် ကုန်ကျခဲ့သည်။

ရှဲ့ကျင်းနှင့် သူ၏ မိဘများသည် ဆယ်စုနှစ် ၂ ခုကျော်အကြာ ပြီးခဲ့သော ၂၀၂၃ ခုနှစ်၊ ဒီဇင်ဘာလ ၁ ရက်တွင်မှ ပြန်လည်ဆုံစည်းခဲ့ကြသည်။

ဒီဇင်ဘာ ၅ ရက်တွင် ရှဲ့ကျင်းသည် “ရှန်တုံ ရေဒီယိုနှင့် ရုပ်မြင်သံကြား” ဌာနနှင့် တွေ့ဆုံမေးမြန်းခန်းတွင် ဖခင်ဖြစ်သူက တိုက်ခန်းများနှင့် မော်တော်ကား ပေးခဲ့သော်လည်း မိမိက ငြင်းပယ်ခဲ့ကြောင်း ထုတ်ဖော်ပြောပြခဲ့သည်။

ရုတ်တရက်ကြွယ်ဝချမ်းသာသွားမှုကို လက်ခံလိုက်လျှင် မိမိ၏ ခံယူရပ်တည်ချက်များကို ပြောင်းလဲသွားစေ နိုင်ပြီး မဆင်မခြင် သုံးဖြုန်းနေထိုင်သည့် လူ့ပေါ်ကြော့တစ်ဦး ဖြစ်သွားမည်ကို စိုးရိမ်ကြောင်း ရှဲ့ကျင်းက ပြောသည်။

(ရုတ်တရက် ချမ်းသာသွားမှုသည် ရုပ်ဝတ္ထုပစ္စည်းပိုင်ဆိုင်မှုနှင့်စပ်လျဉ်းသည့် ခံယူချက်ပြောင်းလဲသွားမည်ကို ရှဲ့ကျင်းက ရတက်မအေးဖြစ်နေသည်။ ဓာတ်ပုံ-Baidu)

“ဒါတွေကို လက်ခံလိုက်ရင် ကျွန်တော့်ရဲ့ ခံယူချက် ပြောင်းလဲသွားမှာ စိုးရိမ်ပါတယ်။ ရုတ်တရက် သူဌေးသား လူ့ပေါ်ကြော့ ဖြစ်သွားတာဟာ Hello Mr Billionaire ရုပ်ရှင်ဇာတ်ကားက ဇာတ်လိုက်မင်းသားကို သတိရစေပါတယ်။ ဆင်းဆင်းရဲရဲကနေ ရုတ်တရက်ချမ်းသာသွားပြီး သုံးဖြုန်းပျော်ပါးနေတဲ့ ဇာတ်လမ်းပါ။ ကျွန်တော် အဲ့လိုဘဝမျိုးနဲ့ အဆုံးသတ်ရမလား” ဟု ရှဲ့ကျင်းက ပြောသည်။

(Hello Mr Billionaire သည် ၂၀၁၈ ခုနှစ်က ရုံတင်ခဲ့သော တရုတ်ဟာသဇာတ်မြူးရုပ်ရှင်ဖြစ်သည်။ အောင်မြင်မှုမရသော ဂိုးသမား၊ ဘောလုံးသမားဘဝဖြင့် ဖြတ်သန်းနေရသော ဇာတ်ဆောင်သည် ဘီလျံနာ သူဌေးကြီးတစ်ဦး၏ အမွေခံဖြစ်ကြောင်း သိလာရသည်။ ထိုသို့ သိလာရပြီးနောက် ယွမ် ၃၀ ဘီလီယံ အမွေကို ဆက်ခံနိုင်ရန်အတွက် ရက်ပေါင်း ၃၀ အတွင်း ယွမ် ၁ ဘီလီယံကို သုံးဖြုန်းပြရပုံ ရိုက်ကူးထားခြင်း ဖြစ်သည်)

ရှဲ့ကျင်းက ချစ်သူမိန်းကလေးနှင့် လက်ထပ်လိုကြောင်း၊ မိမိ၏ ဝင်ငွေမှာ ယွမ် ထောင်ဂဏန်းမျှသာရှိသော်လည်း မိမိဘာသာ ကားဝယ်နိုင်ကြောင်း ဖခင်အား ပြောကြားခဲ့သည်။

(မိသားစုနှင့် ပြန်လည်ဆုံစည်းပြီးနောက် ရှဲ့ကျင်းသည် live-streaming အလုပ် လုပ်ကိုင်လျက်ရှိသည်။ ဓာတ်ပုံ-Baidu)

သူ၏ ပထမဆုံး live-stream ၅ ခုမှာ ကြည့်ရှုမှုအကြိမ်ရေ သန်း ၂၀ ကျော်ရှိခဲ့ပြီး ယွမ်ငွေ သန်း ၅၀ ကျော် (ကန်ဒေါ်လာ ၇ သန်း) ဖိုး ရောင်းချခဲ့ရသည်။

အိမ်ခြံမြေ ကိစ္စအဝဝနှင့် ပတ်သက်၍ ဥပဒေအကြံပေးပညာရှင်များနှင့် ဆွေးနွေးတိုင်ပင်လိုပါက iMyanmarHouse.com (အိုင်မြန်မာဟောက်စ်ဒေါ့ကွန်း) ၏ ဖုန်းနံပါတ်များဖြစ်သော 09-268022352 , 09-966901767 သို့ ဆက်သွယ်နိုင်ပါသည်။ အသေးစိတ်ကြည့်ရန် ဤနေရာကို နှိပ်ပါ။

ရောင်းရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။

ငှားရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။

(iMyanmarHouse.com Team မှ ရေးသား ဖော်ပြသည်။)

Credit: iMyanmarHouse.com

Ref: Chinese man reunites with millionaire parents after 26 years, rejects wealth to stay humble (scmp) Photo Credit-Baidu